ຫົວໜ້າກົມໂຄສະນາອົບຮົມ ຕ້ອນຮັບຮອງຜູ້ບັນຊາການທະຫານພາກພິເສດ ແຫ່ງ ຣາຊະອານາຈັກກໍາປູເຈຍ

ວັນທີ 23 ທັນວາ 2024 ນີ້, ທ່ານ ພັນເອກ ແກ້ວສຸວັນ ຜາງພິລາວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງ ກອງທັບປະຊາຊົນລາວ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ພົນຕີ ເມັດ ຈັນນາ ຮອງຜູ້ບັນຊາການທະຫານພາກພິເສດ ແຫ່ງ ຣາຊະອານາຈັກກຳປູເຈຍ ພ້ອມດ້ວຍຄະນະ ໃນໂອກາດທີ່ໄດ້ເດີນທາງມາຢ້ຽມຢາມ ແລະ ພັກຜ່ອນ ຢູ່ ສປປ ລາວ ໃນລະຫວ່າງ ວັນທີ 22-31 ທັນວາ 2024.
ໂອກາດນີ້, ທ່ານ ພັນເອກ ແກ້ວສຸວັນ ຜາງພິລາວົງ ໄດ້ສະແດງຄວາມຍິນດີຕ້ອນຮັບ ທ່ານ ພົນຕີ ເມັດ ຈັນນາ ພ້ອມຄະນະ ດ້ວຍໄມຕີຈິດມິດຕະພາບອັນອົບອຸ່ນ ທັງຕີລາຄາສູງຕໍ່ສາຍພົວພັນການຮ່ວມມືອັນດີງາມລະຫວ່າງສອງພັກ, ສອງລັດ, ສອງກອງທັບ ຂອງ ສປປ ລາວ-ຣາຊະອານາຈັກກຳປູເຈຍ ກໍຄືໃນໄລຍະຜ່ານມາ ໄດ້ຮັບການເສີມຂະຫຍາຍສາຍພົວພັນທີ່ໃກ້ຊິດ ແລະ ເພີ່ມທະວີການຮ່ວມມືຢ່າງກວ້າງຂວາງ ເຂົ້າສູ່ລວງເລິກ ພ້ອມທັງ ອວຍພອນໃຫ້ ທ່ານຮອງຜູ້ບັນຊາການທະຫານພາກພິເສດ ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ແລະ ພັກຜ່ອນຢູ່ ສປປ ລາວ ໃນຄັ້ງນີ້ ຈົ່ງມີຄວາມເບີກບານມ່ວນຊື່ນ, ມີພະລານະໄມແຂງ, ມີຜົນສຳເລັດອັນໃຫຍ່ຫຼວງໃນໜ້າທີ່ວຽກງານ ແລະ ມີຄວາມສຸກໃນຊີວິດສ່ວນຕົວ ແລະ ຄອບຄົວ.
ທ່ານ ພົນຕີ ເມັດ ຈັນນາ ໄດ້ສະແດງຄວາມຂອບໃຈ ຕໍ່ ທ່ານ ພັນເອກ ແກ້ວສຸວັນ ຜາງພິລາວົງ ພ້ອມຄະນະ ທີ່ໃຫ້ການຕ້ອນຮັບທີ່ອົບອຸ່ນ ເຕັມໄປດ້ວຍໄມຕີຈິດມິດຕະພາບ ອັນສະໜິດສະໜົມ ພ້ອມທັງກ່າວຕື່ມວ່າ: ຈະເປັນຂົວຕໍ່ທີ່ດີໃນການພັດທະນາສາຍພົວພັນມິດຕະພາບ ແລະ ການຮ່ວມມື ເພື່ອການພັດທະນາ ຂອງສອງພັກ, ສອງລັດ ກໍຄືສອງກອງທັບ ລະຫວ່າງ ສປປ ລາວ-ຣາຊະອານາຈັກກຳປູເຈຍ ໃຫ້ຈະເລີນງອກງາມຍິ່ງໆຂຶ້ນ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ