ຮອງຫົວໜ້າກົມໃຫຍ່ການເມືອງກອງທັບພົບປະໂອ້ລົມ ກ້ອນກຳລັງສວນສະໜາມກອງທັບປະຊາຊົນລາວ

ວັນທີ 29 ເມສາ 2025 ນີ້, ຢູ່ທີ່ ນະຄອນໂຮ່ຈິມິນ ສສ ຫວຽດນາມ, ສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ ພ້ອມຄະນະ ໄດ້ພົບປະໂອ້ລົມ ນາຍ ແລະ ພົນທະຫານ ທີ່ເຂົ້າຮ່ວມພິທີສະເຫຼີມສະຫຼອງວັນປົດປ່ອຍພາກໃຕ້ ສສ ຫວຽດນາມ ຄົບຮອບ 50 ປີ ຄື ວັນທີ (30 ເມສາ 1975-30 ເມສາ 2025).
ສະຫາຍ ສະຫາຍ ພົນຕີ ໄພວັນ ຈັນທະພົມມາ ໄດ້ສະເເດງຄວາມຍ້ອງຍໍຊົມເຊີຍ ຕໍ່ຫົວໜ້າຄະນະຊີ້ນໍາກ້ອນກຳລັງສວນສະໜາມກອງທັບປະຊາຊົນລາວ ຕະຫຼອດຮອດພະນັກງານ-ນັກຮົບທຸກສະຫາຍ, ທີ່ໄດ້ເອົາໃຈໃສ່ຈັດຕັ້ງຫັດເເອບສວນສະໜາມ ເຖິງວ່າສະພາບອາກາດຈະຮ້ອນອົບເອົ້າ ແລະ ພົບຄວາມຫຍຸ້ງຍາກພຽງໃດກໍ່ຕາມ ແຕ່ລະສະຫາຍກໍ່ມີຄວາມ ອົດທົນ, ສູ້ຊົນ ແລະ ພ້ອມກັນເຮັດສຳເລັດໜ້າທີ່ ໃນການເຂົ້າຮ່ວມສວນສະໜາມໃນພິທີສະເຫຼີມສະຫຼອງວັນປົດປ່ອຍພາກໃຕ້ ສສ ຫວຽດນາມ ຄົບຮອບ 50 ປີ, ທີ່ນະຄອນໂຮ່ຈີມິນ. ພ້ອມທັງ, ຮຽກຮ້ອງໃຫ້ເເຕ່ລະສະຫາຍ ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນຢ່າງຕັ້ງໜ້າ, ເອົາໃຈໃນການເຝິກຊ້ອມຫັດແອບໃນເເຕ່ວັນ, ເອົາໃຈໃສ່ປະຕິບັດແຜນການຫັດແອບທີ່ທາງຫວຽດນາມກຳນົດໃຫ້ຢ່າງເຂັ້ມງວດ, ປະຕິບັດຮັບປະກັນການກິນ, ການຢູ່, ການນຸ່ງຖືເຄື່ອງເເບບ ຂອງນາຍ ເເລະ ພົນທະຫານໃຫ້ຖືກຕ້ອງ, ເປັນເຈົ້າການຕ້ານ ເເລະ ສະກັດກັ້ນປາກົດການຫຍໍ້ທໍ້ຕ່າງໆ ທີ່ຈະເກີດຂຶ້ນໃນທຸກກໍລະນີ, ເປັນເຈົ້າການເຕົ້າໂຮມຄວາມສາມັກຄີໃຫ້ເປັນປຶກເເຜນ ເພື່ອພ້ອມກັນເຮັດສຳເລັດໜ້າທີ່ ທີ່ການຈັດຕັ້ງຂັ້ນເທິງກໍ່ຄືປະຊາຊົນມອບໝາຍໃຫ້ສຳເລັດ ແລະ ໄດ້ຮັບໝາກຜົນສູງ.
ພາບ-ຂ່າວ: ມິກກີ້ ແກ້ວສຸວັນ (ໂທລະພາບກອງທັບ)