ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ອວຍພອນປີໃໝ່ລາວ ພສ 2560

ເນື່ອງໃນໂອກາດສົ່ງທ້າຍປີເກົ່າ ພສ 2559 ແລະ ຕ້ອນຮັບປີໃໝ່ ພສ 2560.
ວັນທີ  11 ເມສາ 2017 ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ໄດ້ອວຍພອນປວງ
ຊົນລາວ ຫຼິ້ນບຸນປີໃໝ່ລາວດ້ວຍຄວາມເບີກບານມ່ວນຊື່ນ.

ພີ່ນ້ອງຊາວລາວ, ເຊື້ອຊາດລາວ ທີ່ຢູ່ທັງພາຍໃນ ແລະ ຕ່າງປະເທດ ທີ່ຮັກແພງທັງຫຼາຍ !

ມື້ນີ້, ເນື່ອງໃນໂອກາດສົ່ງທ້າຍປີເກົ່າ ປີວອກ ພສ 2559 ແລະ ຕ້ອນຮັບປີໃໝ່ ປີລະກາ ພສ 2560, ຂ້າພະເຈົ້າ
ມີຄວາມປິຕິຊົມຊື່ນເປັນຢ່າງຍິ່ງ ຂໍສົ່ງພອນອັນປະເສີດມາຍັງພີ່ນ້ອງຮ່ວມຊາດທີ່ຢູ່ທັງພາຍໃນ ແລະ ຕ່າງປະ
ເທດ, ຊາວຕ່າງປະເທດ ທີ່ດຳລົງຊີວິດ ແລະ ປະຕິບັດໜ້າທີ່ຂອງຕົນຢູ່ ສປປ ລາວ ຂໍໃຫ້ທຸກໆຄົນຈົ່ງມີແຕ່
ຄວາມສຸກ, ມີຄວາມເບີກບານມ່ວນຊື່ນ ແລະ ໄດ້ຮັບຜົນສຳເລັດໃໝ່ໃຫຍ່ຫຼວງກວ່າປີທີ່ຜ່ານມາ.

ດັ່ງທີ່ພວກເຮົາຮູ້ນຳກັນແລ້ວວ່າ ປີວອກ ພສ 2559 ທີ່ຜ່ານພົ້ນໄປນີ້, ເປັນປີໜຶ່ງທີ່ມີຄວາມໝາຍສຳຄັນຂອງ
ປະເທດເຮົາ ເຊິ່ງເປັນປີທຳອິດແຫ່ງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນ
ພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ເຖິງແມ່ນວ່າສະພາບການພາກ ພື້ນ-ສາກົນ ແລະ
ພາຍໃນປະເທດເຮົາມີຄວາມຫຍຸ້ງຍາກ ແລະ ທ້າທາຍທົດສອບຫຼາຍປະການກໍຕາມ, ແຕ່ຍ້ອນຄວາມສາມັກ
ຄີເປັນຈິດໜຶ່ງໃຈດຽວກັນ ແລະ ຄວາມບຸກບືນສູ້ຊົນຂອງປວງຊົນລາວທັງຊາດ ຢູ່ພາຍໃຕ້ການນຳພາຂອງ
ພັກ-ລັດຖະບານ ສົມທົບກັບການສະໜັບສະໜູນຊ່ວຍເຫຼືອຂອງປະເທດເພື່ອນມິດອ້າຍນ້ອງ ແລະ ອົງການ
ຈັດຕັ້ງສາກົນ, ສປປ ລາວ ພວກເຮົາສາມາດສືບຕໍ່ປົກປັກຮັກສາ ແລະ ພັດທະນາປະເທດຊາດຂອງຕົນຢ່າງ
ຕັ້ງໜ້າ, ຮັບປະກັນມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ
ມີຄວາມເປັນລະບຽບຮຽບຮ້ອຍ, ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນ
ພາຍໃນ ສະເລ່ຍຫົວຄົນໄດ້ 2.027 ໂດລາສະຫະລັດ, ສປປ ລາວ ໄດ້ເຮັດສຳເລັດຢ່າງຈົບງາມ ການເປັນປະທານ
ໝູນວຽນອາຊຽນ ແລະ ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28-29 ແລະ ບັນດາກອງປະຊຸມ
ກ່ຽວຂ້ອງອື່ນໆ. ທັງໝົດນັ້ນ, ໄດ້ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າ ໄດ້ຮັບການສືບຕໍ່ປັບ
ປຸງໃຫ້ດີຂຶ້ນ, ຖານະບົດບາດ ແລະ ອິດທິພົນ ຂອງ ສປປ ລາວ ໄດ້ສູງເດັ່ນຂຶ້ນຕື່ມອີກໃນພາກພື້ນ ແລະ ສາກົນ.

ພີ່ນ້ອງຮ່ວມຊາດທັງຫຼາຍ !. ປີລະກາ ພສ 2560 ທີ່ກ້າວມາເຖິງນີ້, ເປັນປີທີ່ພັກ ແລະ ລັດຖະບານສືບຕໍ່ສຸມໃສ່
ນຳພາຈັດຕັ້ງປະຕິບັດຢ່າງແຂງແຮງ ບັນດາຄາດໝາຍສູ້ຊົນທີ່ໄດ້ກຳນົດໄວ້ໃນມະຕິກອງປະຊຸມໃຫຍ່ ຄັ້ງທີ X
ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ກໍຄືຍຸດທະສາດຂອງການພັດ
ທະນາ ຮອດປີ 2025 ແລະ ວິໄສທັດຮອດປີ 2030, ສູ້ຊົນເຮັດໃຫ້ປະເທດເຮົາໄດ້ຮັບການພັດທະນາຕາມທິດຍືນ
ຍົງ ແລະ ໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ໃນປີ 2020.

ດ້ວຍເຫດນີ້, ຂ້າພະເຈົ້າ ຈຶ່ງຮຽກຮ້ອງມາຍັງພີ່ນ້ອງຮ່ວມຊາດ ຈົ່ງພ້ອມກັນເພີ່ມທະວີຮັກສາມູນເຊື້ອຄວາມ
ສາມັກຄີອັນເປັນປຶກແຜ່ນແໜ້ນໜາ ຢູ່ພາຍໃຕ້ການນຳພາຂອງພັກ ຜ່ານຜ່າຄວາມຫຍຸ້ງຍາກ ແລະ ສິ່ງ
ທ້າທາຍທົດສອບ, ສືບຕໍ່ເສີມຂະຫຍາຍຜົນສຳເລັດອັນດີງາມ ແລະ ຕັ້ງໜ້າແກ້ໄຂຈຸດອ່ອນຂໍ້ຄົງຄ້າງໃນປີທີ່
ຜ່ານມາ. ທັງນີ້ ກໍເພື່ອເຮັດໃຫ້ປະເທດຊາດທີ່ແສນຮັກຂອງພວກເຮົາມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ,
ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທຳ ແລະ ສີວິໄລຍິ່ງໆຂຶ້ນໄປ.

ໃນໂອກາດເລີກງາມຍາມດີ ອັນເປັນສິລິມຸງຄຸນ, ຂ້າພະເຈົ້າ ຕາງໜ້າໃຫ້ການນຳຂອງພັກ-ລັດ ແຫ່ງ ສປປ
ລາວ ແລະ ໃນນາມສ່ວນຕົວ ຂໍສົ່ງພອນໄຊອັນປະເສີດມາຍັງສະມາຊິກພັກ, ພະນັກງານ, ທະຫານ,​ ຕຳຫຼວດ
ແລະ ພີ່ນ້ອງຊາວລາວທຸກຖ້ວນໜ້າ ທີ່ຢູ່ພາຍໃນ ແລະ ຕ່າງປະເທດ, ຕະຫຼອດຮອດຊາວຕ່າງປະເທດທີ່ດຳ
ລົງຊີວິດ ແລະ ປະຕິບັດວຽກງານຢູ່ ສປປ ລາວ ຈົ່ງປະສົບແຕ່ຄວາມສຸກໃນຊີວິດສ່ວນຕົວ, ຄອບຄົວ ແລະ ມີ
ຜົນສຳເລັດໃນໜ້າທີ່ວຽກງານຍາດໄດ້ໄຊຊະນະໃໝ່ທີ່ຍິ່ງໃຫຍ່ກວ່າເກົ່າ.

ພິເສດ, ຂ້າພະເຈົ້າ ຂໍຝາກຄວາມຢ້ຽມຢາມຖາມຂ່າວ, ຄວາມເປັນຫ່ວງເປັນໄຍ ແລະ ອວຍພອນໄຊອັນອົບອຸ່ນ
ມາຍັງພະນັກງານ,​ ທະຫານ, ຕຳຫຼວດ, ຖັນແຖວກຳລັງປະກອບອາວຸດ ທີ່ພວມປະຕິບັດໜ້າທີ່ອັນສູງສົ່ງ ແລະ
ມີກຽດສະຫງ່າ ໃນການປົກປັກຮັກສາເຂດນ້ຳແດນດິນອັນຄົບຖ້ວນຂອງຊາດລາວ ຈົ່ງມີ ສຸຂະພາບ ແລະ ພະ
ລານາໄມສົມບູນ, ເຂັ້ມແຂງແຮງກ້າສະເໝີໄປ. ພ້ອມດຽວກັນນີ້, ຂ້າພະເຈົ້າ ກໍຂໍຝາກຄວາມຢ້ຽມຢາມຖາມ
ຂ່າວມາຍັງພະນັກງານບຳນານ ແລະ ຜູ້ອາວຸໂສ, ຜູ້ເສຍອົງຄະ ແລະ ປະຊາຊົນບັນດາເຜົ່າທຸກຖ້ວນໜ້າ ທີ່ກຳ
ລັງຮັກສາປິ່ນປົວຢູ່ຕາມໂຮງໝໍແຫ່ງຕ່າງໆ ຈົ່ງຫາຍຈາກພະຍາດໂລຄາໂດຍ ໄວ ກັບຄືນເມືອຫາຄອບຄົວ, ກົມ
ກອງ ເພື່ອສືບຕໍ່ປະຕິບັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ.

ອີກເທື່ອໜຶ່ງ ໃນປີລະກາ ພສ 2560 ນີ້, ໃຫ້ທຸກໆຄົນຈົ່ງມີຄວາມສຸກກາຍສະບາຍໃຈ, ປາສະຈາກພະຍາດໂລຄາ
ທັງປວງ ແລະ ມີໂຊກໃຫຍ່ໄຊງາມຕະຫຼອດປີເທີ້ນ.