ພິທີພົບປະລະຫວ່າງຄູອາຈານ ສສ ຫວຽດນາມ

ກັບນັກສຶກສານາຍທະຫານລາວ ທີ່ ວປກ

      ເນື່ອງໃນໂອກາດຈັດຕັ້ງສະເຫຼີມສະຫຼອງວັນສົນທິສັນຍາມິດຕະພາບ ແລະ ການຮ່ວມມືຮອບດ້ານຂອງສອງປະເທດລາວ-ຫວຽດນາມ ຄົບຮອບ 40 ປີ (18.7.1977-18.7.2017/ ວັນສ້າງຕັ້ງສາຍພົວພັນການທູດຄົບຮອບ 55 ປີ (5.9.1962-5.9.2017) ໃນວັນທີ 14 ກໍລະກົດ 2017 ກະຊວງປ້ອງກັນປະເທດແຫ່ງ ສປປ ລາວ ຮ່ວມກັບຫ້ອງການທີ່ປຶກສາທູດປ້ອງກັນຊາດ ສສ ຫວຽດນາມປະຈໍາລາວ ໄດ້ຈັດພິທີພົບປະອະດີດນັກສຶກສານາຍທະຫານລາວທີ່ເຄີຍສຶກສາຮໍ່າຮຽນຢູ່ ສສ ຫວຽດນາມ ເຊິ່ງແມ່ນວິທະຍາຄານປ້ອງກັນຊາດໄກສອນພົມວິຫານເປັນ. ເຂົ້າຮ່ວມເປັນກຽດໂດຍ ທ່ານ ພົນຕີ ວິໄລ ຫຼ້າຄໍາຟອງ ເລຂາທິການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ; ຝ່າຍຫວຽດນາມເປັນກຽດເຂົ້າຮ່ວມ ທ່ານ ເລຫ່ຽນເວິນ ຮອງຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ ມີບັນດາເອກລັກຄະລັດຖະທູດ ສສ ຫວຽດນາມປະຈໍາ ສປປ ລາວ, ບັນດາພະນັກງານອະດີດນັກສຶກສາທີ່ຮຽນຈົບຈາກບັນດາວິທະຍາຄານ ແລະ ໂຮງຮຽນກອງທັບປະຊາຊົນຫວຽດນາມ ມາຈາກກົມກອງອ້ອມຂ້າງກະຊວງປ້ອງກັນປະເທດ ແລະ ແຂກຖືກເຊີນເຂົ້າຮ່ວມ.

ທ່ານ ພົນຕີ ວິໄລ ຫຼ້າຄໍາຟ້ອງ ກ່າວໃນງານພົບປະບາງຕອນວ່າ: ພິທີພົບປະສັງສັນຂອງພວກເຮົາໃນມື້ນີ້, ໄດ້ຈັດຂຶ້ນໃນທ່າມກາງບັນຍາກາດທີ່ 2 ພັກ, 2 ລັດຖະບານ, 2 ກອງທັບ ແລະ ປະຊາຊົນ 2 ຊາດ ລາວ-ຫວຽດນາມ, ຫວຽດນາມ-ລາວ 2017 ດ້ວຍຫຼາຍກິດຈະກໍາທີ່ມີຄວາມໝາຍສໍາຄັນ ແລະ ຄຶກຄື້ນມ່ວນຊື່ນ. ເພື່ອເປັນການສະແດງຄວາມປິຕິຊົມຊື່ນຕໍ່ຜົນສໍາເລັດອັນໃຫຍ່ຫຼວງຫຼາຍດ້ານໃນການປະຕິບັດສົນທິສັນຍາມິດຕະພາບ, ການຮ່ວມມືຮອບດ້ານໃນໄລຍະ 40 ປີ ກໍຄືການພົວພັນການທູດລະຫວ່າງ ລາວ-ຫວຽດນາມ, ຫວຽດນາມ-ລາວ ຕະຫຼອດໄລຍະເວລາ 55 ປີ ທີ່ຜ່ານມາ; ຍັງເປັນການລະນຶກວັນຄ້າຍວັນເກີດຂອງປະທານ ໂຮ່ຈິມິງ ນັກຮັກຊາດອັນແທ້ຈິງ, ນັກເຄື່ອນໄຫວວັດທະນາທໍາຜູ້ຍິ່ງໃຫຍ່, ນັກເຄື່ອນໄຫວດີເດັ່ນຂອງຂະບວນການຄອມມູນິດ ແລະ ກໍາມະກອນສາກົນ ກໍຄືຂະບວນການຕໍ່ສູ້ປົດປ່ອຍຊາດ, ຜູ້ນໍາທ່ີແສນເຄົາລົບຮັກຂອງປະຊາຊົນຫວຽດນາມອ້າຍນ້ອງ, ເພື່ອນສະຫາຍທີ່ໃກ້ຊິດສະໜິດສະໜົມ ແລະ ຍິ່ງໃຫຍ່ຂອງປະຊາຊົນລາວເຮົາ ຄົບຮອບ 127 ປີ.

ພ້ອມດຽວກັນນີ້, ໃນໂອກາດຈັດຕັ້ງພິທີພົບປະສັງສັນຂອງພວກເຮົາໃນມື້ນີ້, ຍິ່ງເຮັດໃຫ້ພວກເຮົາສຸດແສນອາໄລຮັກ ແລະ ຮູ້ບຸນຄຸນອັນລົ້ນເຫຼືອຕໍ່ປະທານ ໂຮ່ຈິມິງ ຜູ້ນໍາທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ຜູ້ນໍາທີ່ແສນເຄົາລົບຮັກ, ຜູ້ໃຫ້ກໍາເນີດມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມສໍາພັນສູ້ຮົບ ແລະ ການຮ່ວມມືຮອບດ້ານລະຫວ່າງ 2 ຊາດ ລາວ-ຫວຽດນາມ, ຫວຽດນາມ-ລາວ. ພວກເຮົາສຸດແສນອາໄລອາວອນ ແລະ ຮູ້ບຸນຄຸນອັນເລິກເຊິ່ງຕໍ່ບັນດາສະຫາຍພະນັກງານ, ສະມາຊິກພັກ, ນັກຮົບ ແລະ ປະຊາຊົນ 2 ຊາດ ທີ່ໄດ້ເສຍສະຫຼະຊີວິດ ເພື່ອພາລະກິດປະຕິວັດຂອງພວກເຮົາ.