ພິທີໂຮມຊຸມນຸມໃຫຍ່ສະເຫຼີມສະຫຼອງ 2 ວັນປະຫວັດສາດ ລາວ-ຫວຽດນາມ 2017

ບາງຕອນສຳຄັນ: ຂ​ອງສະຫາຍ ບຸນ​ຍັງ ວໍລະ​ຈິດ ​ເລຂາ​ທິການ​ໃຫຍ່​ຄະນະບໍລິ​ຫານ​ງານ​ສູນ​ກາງ​ພັກ, ປະທານ​ປະ​ເທດ ​ແຫ່ງ ສປປ ລາວ ກ່າວ​ໃນ​ພິທີ​ໂຮມ​ຊຸມນຸມ​ໃຫຍ່ສະ​ເຫຼີ​ມສະຫຼອງ 2 ວັນປະຫວັດສາດ ລາວ-ຫວຽດນາມ ( ວັນ​ເຊັນ​ສົນທິສັນຍາມິດຕະພາບ ​ແລະ ການຮ່ວມມື ຄົບຮອບ 40 ປີ ​ແລະ ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ຄົບຮອບ 55 ປີ ) ນະຄອນຫຼວງ​ວຽງ​ຈັນ, ວັນ​ທີ 18 ກໍລະກົດ 2017 ທີ່ນະຄອນຫຼວງວຽງຈັນ.

ມື້ນີ້ ເປັນມື້ທີ່ມີຄວາມໝາຍສຳຄັນຍິ່ງທາງດ້ານປະຫວັດສາດຂອງສອງຊາດ ລາວ-ຫວຽດນາມ ທີ່ພວກເຮົາໄດ້ພ້ອມກັນຈັດພິທີໂຮມຊຸມນຸມໃຫຍ່ຂຶ້ນຢູ່ນະຄອນຫຼວງວຽງຈັນ ເພື່ອສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ.

ພາຍໃຕ້ບັນຍາກາດແຫ່ງຄວາມປິຕິຊົມຊື່ນອັນສຸດຊຶ້ງນີ້, ພັກ-ລັດ ຫວຽດນາມ ໄດ້ສົ່ງຄະນະຜູ້ແທນຂັ້ນສູງຂອງຕົນ ນຳໂດຍ ສະຫາຍ ນາງ ຕ່ອງທິຟ້ອງ ກຳມະການກົມການເມືອງ, ຮອງປະທານສະພາແຫ່ງ ສສ ຫວຽດນາມ ມາຮ່ວມສະເຫຼີມສະຫຼອງວັນສຳຄັນທີ່ມີຄວາມໝາຍປະຫວັດສາດດັ່ງກ່າວກັບພັກ, ລັດ ແລະ ປະຊາຊົນລາວບັນດາເຜົ່າ. ອັນນີ້ເປັນການຢັ້ງຢືນຢ່າງໜັກແໜ້ນອີກເທື່ອໜຶ່ງເຖິງຄວາມຜູກພັນອັນໝັ້ນໜຽວ ດ້ວຍໄມຕີຈິດມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ທີ່ເປັນມູນເຊື້ອອັນດີງາມຕະຫຼອດມາ. ພວກເຮົາຂໍສະແດງຄວາມຂໍ່ານັບຊົມເຊີຍ ແລະ ຄວາມຂອບອົກຂອບໃຈຢ່າງຈິງໃຈຕໍ່ຄະນະຜູ້ແທນຂັ້ນສູງຂອງພັກ-ລັດ ແຫ່ງ ສສ ຫວຽດນາມອ້າຍນ້ອງ ທີ່ໄດ້ນຳເອົາ ອາລົມຈິດ ມິດຕະພາບອັນຜ່ອງໃສ ແລະ ຄວາມໜິດສະໜົມ ຮັກແພງຖານອ້າຍນ້ອງຂອງພັກ, ລັດ ແລະ ປະຊາຊົນຫວຽດນາມທຸກຖ້ວນໜ້າ ມາສູ່ພັກ-ລັດ ແລະ ປະຊາຊົນລາວບັນດາເຜົ່າ ຢ່າງສຸດອົກສຸດໃຈ !

ສອງຊາດ ລາວ-ຫວຽດນາມ ໄດ້ມີການພົວພັນຖານບ້ານ ໃກ້ເຮືອນຄຽງທີ່ດີນຳກັນມາແຕ່ບູຮານນະການ, ປະຊາຊົນສອງຊາດ ໄດ້ດຳລົງຊີວິດ ແລະ ທຳມາຫາກິນບົນຜືນແຜ່ນດິນທີ່ມີສາຍພູຫຼວງຍາວຢຽດ ແລະ ແມ່ນໍ້າຫຼາຍສາຍຕິດຈອດກັນແຕ່ເໜືອເຖິງໃຕ້, ໄດ້ມີຄວາມສາມັກຄີຊ່ວຍເຫຼືອເກື້ອກູນກັນເໝືອນດັ່ງອ້າຍນ້ອງຮ່ວມອຸທອນ, ໃນຍາມທຸກກໍຮ່ວມທຸກ ແລະ ຍາມສຸກກໍຮ່ວມສຸກນຳກັນຕະຫຼອດມາ, ທັງໄດ້ຜ່ານການທົດສອບໃນຂະບວນການວິວັດແຫ່ງການຕໍ່ສູ້ຕ້ານພວກລ່າເມືອງຂຶ້ນຕ່າງດ້າວອັນຍືດເຍື້ອຍາວນານ ແລະ ສຸດແສນລະອິດລະອ້ຽວຂ້ຽວຂາດ ເຊິ່ງສອງຊາດ ລາວ- ຫວຽດນາມ ໄດ້ອີງຫຼັງໃສ່ກັນ, ຊ່ວຍເຫຼືອກັນຖານສະຫາຍອ້າຍນ້ອງ ບົນຈິດໃຈສາກົນອັນຜຸດຜ່ອງ ແລະ ໝົດຈິດໝົດໃຈ; ໄດ້ມີຄວາມຮັກແພງເຊື່ອໝັ້ນເຊິ່ງກັນ ແລະ ກັນອັນເລິກເຊິ່ງ, ຍອມເສຍສະຫຼະເພື່ອກັນ ແລະ ຮ່ວມເປັນຮ່ວມຕາຍນຳກັນ. ອັນນັ້ນແມ່ນບໍ່ເກີດຂອງການພົວພັນສາມັກຄີພິເສດທີ່ກາຍເປັນປັດໄຈຕັດສິນຜົນສຳເລັດ ແລະ ໄຊຊະນະຂອງການປະຕິວັດຢູ່ສອງປະເທດຂອງພວກເຮົາ ເຊິ່ງເປັນຕົວແບບທີ່ຫາໄດ້ຍາກໃນການພົວພັນລະຫວ່າງຊາດຢູ່ໃນໂລກ, ເປັນສາຍພົວພັນທີ່ຍິ່ງໃຫຍ່, ເລິກເຊິ່ງ, ດູດດື່ມ ແລະ ເປັນມໍລະດົກລໍ້າຄ່າຂອງທັງສອງຊາດ ລາວ-ຫວຽດນາມ.

ເມື່ອທົບທວນຄືນປະຫວັດສາດແຫ່ງການພົວພັນອັນຍາວນານດັ່ງກ່າວນັ້ນ, ພັກ-ລັດ ແລະ ປະຊາຊົນສອງຊາດພວກເຮົາຍິ່ງຈົດຈຳລໍາລຶກ ແລະ ຮູ້ບຸນຄຸນຢ່າງສຸດຊຶ້ງຕໍ່ປະທານ ໂຮ່ຈິມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ເຊິ່ງເປັນຜູ້ໃຫ້ກຳເນີດ ແລະ ໄດ້ເປັນແບບຢ່າງອັນຈະແຈ້ງແຫ່ງການຖະນຸຖະໜອມ ເພີ່ມພູນຄູນສ້າງມິດຕະພາບອັນຍິ່ງໃຫຍ່ ແລະ ຄວາມສາມັກຄີພິເສດ ລະຫວ່າງສອງຊາດ ລາວ ແລະ ຫວຽດນາມ ຂອງພວກເຮົາຢ່າງສະເໝີຕົ້ນສະເໝີປາຍ.

ພັກຄອມມູນິດອິນດູຈີນ ໄດ້ສ້າງຕັ້ງຂຶ້ນໃນປີ 1930 ໄດ້ເປັນກົກເຄົ້າເຫງົ້າກໍດຽວກັນຂອງສອງພັກ, ພັກຄອມມູນິດຫວຽດນາມ ແລະ ພັກປະຊາຊົນປະຕິວັດລາວ. ການກຳເນີດເກີດຂຶ້ນ ແລະ ພາຍໃຕ້ການນຳພາຂອງພັກຄອມມູນິດອິນດູຈີນ ໄດ້ເຮັດໃຫ້ການຕໍ່ສູ້ຂອງປະຊາຊົນ 3 ຊາດອິນດູຈີນ ເວົ້າລວມ, ຂອງປະຊາຊົນຫວຽດນາມ, ປະຊາຊົນລາວ ເວົ້າສະເພາະ ກ້າວສູ່ໄລຍະໃໝ່ດ້ວຍຄຸນະພາບໃໝ່, ທັງເປັນປັດໄຈຊີ້ຂາດຂອງການຮ່ວມສຳພັນສູ້ຮົບ ແລະ ຕໍ່ໄຊຊະນະແຫ່ງການຕໍ່ສູ້ຂອງປະຊາຊົນສອງຊາດ ນຳໄປເຖິງການເຮັດສຳເລັດການປະຕິວັດເດືອນສິງຫາ ຢູ່ຫວຽດນາມ ແລະ ການປະກາດເອກະລາດຢູ່ລາວ ໃນເດືອນຕຸລາ ປີ 1945. ເມື່ອພວກລ່າເມືອງຂຶ້ນຝຣັ່ງກັບມາຮຸກຮານອີກຄັ້ງ ອີງຕາມການສະເໜີຂອງລັດຖະບານລາວເອກະລາດ, ລັດຖະບານ ສາທາລະນະລັດ ປະຊາທິປະໄຕ ຫວຽດນາມ ໄດ້ຕົກລົງສົ່ງພະນັກງານ-ນັກຮົບອາສາສະໝັກ ຫວຽດນາມມາຊ່ວຍເຫຼືອການປະຕິວັດລາວ ແລະ ມີການສ້າງຕັ້ງກອງທະຫານປະສົມ ລາວ-ຫວຽດນາມຂຶ້ນຢູ່ລາວ ໃນເດືອນຕຸລາ ປີ 1945.

ຈາກນັ້ນ, ທະຫານຫວຽດນາມ ໄດ້ປະສານສົມທົບກັບທະຫານ ແລະ ປະຊາຊົນລາວສູ້ຮົບແຕ່ເຫນືອຮອດໃຕ້ ຕີສັດຕູຜູ້ຮຸກຮານ ແລະ ຍາດເອົາໄຊຊະນະມາໄດ້ຢ່າງຕໍ່ເນື່ອງຢູ່ສອງປະເທດ, ອັນພົ້ນເດັ່ນ ແລະ ເປັນບາດລ້ຽວປະຫວັດສາດນັ້ນແມ່ນໄຊຊະນະດຽນບຽນຟູທີ່ຂຶ້ນຊື່ລືຊາ ທີ່ຈຳໃຫ້ພວກລ່າເມືອງຂຶ້ນແບບເກົ່າ ຕ້ອງຍອມເຊັນສັນຍາເຊີແນວ ປີ 1954 ກ່ຽວກັບອິນດູຈີນ, ໂດຍຮັບຮູ້ຄວາມເປັນເອກະລາດ ແລະ ອະທິປະໄຕຂອງສາມປະເທດອິນດູຈີນ.

ການຮ່ວມສຳພັນສູ້ຮົບ, ຊ່ວຍເຫລືອເຊິ່ງກັນ ແລະ ກັນ ດັ່ງກ່າວນັ້ນ ໄດ້ເຮັດໃຫ້ການຕໍ່ສູ້ປະຕິວັດຂອງປະຊາຊົນລາວເຕີບໃຫຍ່ມີໄຊ ແລະ ຂະຫຍາຍຕົວກວ້າງອອກ, ເຊິ່ງໄດ້ເປັນເງື່ອນໄຂໃຫ້ແກ່ການສ້າງຕັ້ງພັກປະຊາຊົນລາວຂຶ້ນ ໃນວັນທີ 22 ມີນາ 1955. ເຫດການປະຫວັດສາດດັ່ງກ່າວ ເປັນຂີດໝາຍໃໝ່ ແລະ ເປັນປັດໄຈຕັດສິນໂດຍກົງ ເຮັດໃຫ້ການປະຕິວັດຢູ່ປະເທດລາວເຮົາກ້າວຂຶ້ນສູ່ຄຸນະພາບ
ໃໝ່ ແລະ ມີກຳລັງແຮງຊະນະເລີດ ແລະ ຍາດໄຊຊະນະເໜືອສັດຕູຜູ້ຮຸກຮານ ແລະ ພວກລູກແຫລ້ງຕີນມືຂອງພວກເຂົາ.

ພະນັກງານ-ນັກຮົບ ແລະ ປະຊາຊົນລາວບັນດາເຜົ່າ ຈຳນວນຫລວງຫລາຍລ້ວນແຕ່ໄດ້ເປັນສັກຂີພະຍານຂອງເຫດການປະຫວັດສາດອັນສຳຄັນແຫ່ງການຮ່ວມສຳພັນສູ້ຮົບ ລະຫວ່າງລາວ-ຫວຽດນາມ ເຊິ່ງເຕັມໄປດ້ວຍຄວາມທໍລະຫົດອົດທົນ, ອາດຫານຊານໄຊ ແລະ ຍາດໄດ້ໄຊຊະນະຍິ່ງໃຫຍ່ທີ່ສຸດໃນປະຫວັດສາດຂອງພວກເຮົາ, ພະນັກງານ-ນັກຮົບອາສາສະໝັກຫວຽດນາມ ໄດ້ຄຽງບ່າຄຽງໄຫລ່ກັບ ພະນັກງານ-ນັກຮົບກອງທັບປົດປ່ອຍປະຊາຊົນລາວ ແລະ ປະຊາຊົນລາວບັນດາເຜົ່າດຳເນີນການຕໍ່ສູ້ຢ່າງເດັດດ່ຽວຫນຽວແຫນ້ນບົນຈິດໃຈຮ່ວມທຸກຮ່ວມສຸກ, ຮ່ວມເປັນຮ່ວມຕາຍນຳກັນ, ໄດ້ເປີດບັ້ນຮົບທັງນ້ອຍທັງໃຫຍ່ ບໍ່ຈັກວ່າທໍ່ໃດເທື່ອ ເພື່ອທັບມ້າງກົນອຸບາຍ ແລະ ຍຸດທະສາດຂອງພວກຈັກກະພັດ ແລະ ລູກແຫລ້ງຕີນມືຂອງພວກເຂົາ. ໃນນັ້ນ, ມີຫລາຍບັ້ນຮົບສະພາບການຂັບຂັນທີ່ສຸດ, ເບິ່ງຄືວ່າກຳລັງຂອງພວກເຮົາກຳລັງຈະຖືກດັບສູນ, ແຕ່ດ້ວຍມານະຈິດ ແລະ ອຸດົມການປະຕິວັດອັນເດັດດ່ຽວ, ດ້ວຍພະລັງຂອງຄວາມສາມັກຄີຮ່ວມສຳພັນສູ້ຮົບຢ່າງຫນຽວແຫນ້ນເຕັມໄປດ້ວຍຄວາມເສຍສະຫລະ ພວກເຮົາກໍສາມາດຜ່ານຜ່າອຸປະສັກໄດ້ ຈາກບັ້ນນີ້ໄປສູ່ບັ້ນໃໝ່ຢ່າງເນື່ອງນິດລຽນຕິດ ຈົນສ້າງວີລະກຳອັນຍິ່ງໃຫຍ່ຂຶ້ນດ້ວຍບັ້ນຮົບໂຮ່ຈີມິນອັນເປັນປະຫວັດການໃນລະດູບານໃໝ່, ສາມາດປົດປ່ອຍພາກໃຕ້ຫວຽດນາມ ແລະ ທ້ອນໂຮມປະເທດຫວຽດນາມເປັນອັນຫນຶ່ງອັນດຽວກັນໃນປີ 1975. ຢູ່ປະເທດລາວພວກເຮົາ ດ້ວຍການລຸກຮືຂຶ້ນ ໂດຍໃຊ້ສາມບາດຄ້ອນຍຸດທະສາດ. ໄດ້ກ້າວໄປສູ່ການຢຶດອຳນາດທົ່ວປະເທດແບບ “ບົວບໍ່ຊ້ຳ ນ້ຳບໍ່ຂຸ່ນ ແຕ່ຈັບປາໄດ້ທັງໝົດ” ແລະ ສະຖາປະນາ ສາທາ ລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າ ຜ່າເຜີຍ ໃນວັນທີ 2 ທັນວາ 1975.

ເຖິງວ່າພວກເຮົາບໍ່ສາມາດຈົດຈຳໄດ້ວ່າມີພູຈັກຫນ່ວຍພູ ແລະ ມີຫ້ວຍນ້ຳລຳເຊຈັກສາຍ, ມີດົງໃຫຍ່ ແລະ ໂຄກກວ້າງຈຳນວນເທົ່າໃດ, ມີທໍ່ໃດຄ້າຍ ແລະ ປ້ອມປາການຂອງສັດຕູ ທີ່ພະນັກງານ-ນັກຮົບວິລະຊົນຂອງສອງຊາດ ພວກເຮົາໄດ້ເດີນຜ່ານຜ່າດ້ວຍຄວາມຍາກລຳບາກ ແລະ ຕີສັດຕູໃຫ້ແຕກສະຫລາຍໄປ.

ແຕ່ສິ່ງທີ່ບໍ່ມີນັກປະຕິວັດສອງຊາດໃດລືມໄດ້ວ່າໃນການຮ່ວມສຳພັນສູ້ຮົບແຕ່ລະຄັ້ງພະນັກງານ ແລະ ນັກຮົບປະຕິວັດລາວ ແລະ ຫວຽດນາມໄດ້ຮ່ວມຂຸມຄອງດຽວກັນ, ເຂົ້າ​ເມັດຫັກ-ຜັກໃບດຽວ ກໍໄດ້ແບ່ງປັນກັນກິນ, ໄດ້ປ້ອງກັນ ແລະ ຊ່ວຍເຫລືອກັນໂດຍບໍ່ຄິດເຖິງຊີວິດຂອງຕົນເອງ, ໄດ້ໃຫ້ກຳລັງໃຈແກ່ກັນ ແລະ ຍອມເສຍສະຫລະເລືອດເນື້ືອເຫື່ອໄຄໃຫ້ກັນ ເພື່ອເປົ້າໝາຍໄຊຊະນະຮ່ວມກັນ. ປະຊາຊົນລາວບັນດາເຜົ່າ ບໍ່ມີວັນລືມວ່າບົນຜືນແຜ່ນດິນອັນເອກະລັກບູຊາຂອງລາວ ລ້ວນແຕ່ມີຢາດເຫື່ອ ແລະ ຢາດເລືອດແຫ່ງການເສຍສະຫລະຂອງພະນັກງານ-ນັກຮົບອາສາສະໝັກຫວຽດນາມ ເຈືອຈານກັບຢາດເຫື່ອ ແລະ ຢາດເລືອດຂອງພະນັກງານ-ນັກຮົບລາວ.

ພາບຂອງຜູ້ເປັນພໍ່ແມ່ຊາວຫວຽດນາມ-ຊາວລາວ ທີ່ໄດ້ສັ່ງລາ-ອວຍໄຊໃຫ້ພອນແກ່ລູກຮັກຂອງຕົນ ກ່ອນອອກສູ່ແນວຫນ້າ, ພາບອັນສະຫງ່າງາມຂອງພະນັກງານ-ນັກຮົບ ອາສາສະໝັກຫວຽດນາມ ແລະ ທະຫານລາວທີ່ຄຽງບ່າຄຽງໄຫລ່ກັນເດີນອອກສູ່ສະຫນາມຮົບຢ່າງພິລາດອາດຫານ ແລະ ພ້ອມກັນມ່ວນຊື່ນຕໍ່ໄຊຊະນະທີ່ຍາດມາໄດ້ຍັງຈຳຕິດຕາ ແລະ ຝັງເລິກຢູ່ໃນຄວາມຊົງຈຳຂອງປະຊາຊົນສອງຊາດພວກເຮົາ ໂດຍບໍ່ມີວັນຈາງຫາຍໄປ.

ພັກ-ລັດ ແລະ ປະຊາຊົນລາວບັນດາເຜົ່າມີຄວາມພາກພູມໃຈ  ແລະ ເອກອ້າງທະນົງໃຈເປັນຢ່າງຍິ່ງທີ່ເຫັນວ່າ ຕະຫລອດໄລຍະຫລາຍສິບປີແຫ່ງການສຳພັນສູ້ຮົບ ແລະ ສູ້ຮົບມີໄຊລະຫວ່າງສອງປະເທດພວກເຮົາໄດ້ປະກອບສ່ວນຈົນສຸດຄວາມສາມາດຂອງຕົນເຂົ້າໃນການຕໍ່ສູ້ມີໄຊຂອງປະຊາຊົນຫວຽດນາມອ້າຍນ້ອງ. ການທີ່ມີ “ເສັ້ນທາງໂຮ່ຈີມິງ” ອັນລືຊື່ ໄດ້ກະຈາຍໄປທົ່ວພື້ນປ່າ, ສາຍພູ, ສາຍນ້ຳ ເປັນຫຼາຍພັນຫຼາຍໝື່ນກິໂລແມັດ ຜ່ານດິນແດນລາວ, ທີ່ໄດ້ສ້າງເງື່ອນໄຂສະດວກຫລາຍປະການ ເພື່ອໃຫ້ເປັນທາງ ເຄື່ອນທັບ, ເປັນບ່ອນເຕົ້າໂຮມກຳລັງ ແລະ ຂົນສົ່ງອາວຸດຍຸດໂທປະກອນ ປົດປ່ອຍພາກໃຕ້ຫວຽດນາມ.
“ເສັ້ນທາງໂຮ່ຈີມິງ” ທີ່ໄດ້ກາຍເປັນນະວະນິຍາຍໄປແລ້ວນັ້ນ ໄດ້ເຄີຍເປັນສະຫນາມຮົບທີ່ດຸເດືອດເຫນືອພັນລະນາ ຈາກຫ່າລະເບີດອັນຫນັກຫນ່ວງທີ່ສຸດໃນປະຫວັດສາດມວນຊົນ, ປະຊາຊົນລາວບັນດາເຜົ່າ, ທະຫານລາວ, ທະຫານຫວຽດນາມ ບໍ່ຈັກວ່າເທົ່າໃດ ຕ້ອງເສຍສະຫລະຊີວິດເລືອດເນື້ອເພື່ອປົກປັກຮັກສາເສັ້ນທາງລຳລຽງ, ເຄື່ອນທັບ, ທີ່ເປັນເໝືອນສາຍເລືອດໃຫຍ່ເພື່ອເປົ້າໝາຍຢູ່ແນວຫນ້າ, ເສັ້ນທາງໂຮ່ຈີມິງ ຜ່ານດິນແດນລາວໄດ້ກາຍເປັນເສັ້ນທາງຜູກແໜ້ນຄວາມສາມັກຄີຮ່ວມຮົບລະຫວ່າງທະຫານລາວ, ທະຫານຫວຽດນາມ ແລະ ປະຊາຊົນລາວບັນດາເຜົ່າບົນຈິດໃຈສາກົນອັນຜ່ອງໃສ, ຖານສະຫາຍອ້າຍນ້ອງ, ຢາດເຫື່ອ ແລະ ນ້ຳຕາ, ຊີວິດ ແລະ ເລືອດຂອງເຂົາເຈົ້າໄດ້ເຈືອຈານເຂົ້າກັນອຸທິດໃຫ້ແກ່ໄຊຊະນະຂອງການປະຕິວັດປົດປ່ອຍ ແລະ ທ້ອນໂຮມປະເທດຊາດຂອງລາວ ແລະ ຫວຽດນາມ.

ພັກ-ລັດ ແລະ ປະຊາຊົນລາວ ຮູ້ສຶກເອກອ້າງທະນົງໃຈ ແລະ ຖືການປະກອບສ່ວນດັ່ງກ່າວນັ້ນ ເປັນການປະຕິບັດຕາມຄຳກອນອະມະຕະ ຍິ່ງຫວນຄືນຮູບພາບອະດີດທີ່ຝັງເລິກໃນຄວາມຊົງຈຳເຫຼົ່ານັ້ນ ຍິ່ງຊາບຊື້ງເຖິງຄຳສອນຂອງປະທານ ໂຮ່ຈີມິງ ທີ່ວ່າ: “ສອງຊາດລາວ-ຫວຽດນາມ ໄດ້ຝັງຄວາມຮັກຢູ່ໃນ ໃຈ ຮົ່ງຮ່າ ທັງແມ່ຂອງ-ບໍ່ເລິກປຸນປານໄດ້”.

ພາຍຫຼັງໄດ້ຮັບການປົດປ່ອຍຢ່າງສົມບູນ ໃນປີ 1975 ສອງປະເທດລາວ ແລະ ຫວຽດນາມ ພວກເຮົາໄດ້ກ້າວເຂົ້າສູ່ສັງກາດໃໝ່, ສັງກາດແຫ່ງສັນຕິພາບ, ເອກະລາດ, ເອກະພາບ ແລະ ປະຕິິບັດສິດເປັນເຈົ້າຕົນເອງ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ໄປສູ່ຈຸດໝາຍສັງຄົມນິຍົມທີ່ວາງໄວ້. ໃນເງື່ອນໄຂ ແລະ ສະພາບແວດລ້ອມໃໝ່ນີ້, ສາຍພົວພັນພິເສດລະຫວ່າງສອງຊາດຍິ່ງໄດ້ຮັບການເສີມຂະຫຍາຍສູ່ລະດັບອັນໃໝ່, ເປັນສາຍພົວພັນລະຫວ່າງສອງລັດ ທີ່ມີເອກະລາດ-ມີອຳນາດອະທິປະໄຕຢ່າງເຕັມສ່ວນ. ການເຊັນ “ສົນທິສັນຍາມິດຕະພາບ ແລະ ການຮ່ວມມື”.  ລະຫວ່າງສອງປະເທດ ເຊິ່ງມາຮອດມື້ນີ້ ແມ່ນພໍດີຄົບຮອບ 40 ປີ ໄດ້ສືບທອດ ແລະ ເສີມຂະຫຍາຍມູນເຊື້ອສຳພັນສູ້ຮົບ, ນ້ຳໃຈສາກົນອັນຜ່ອງໃສຖານສະຫາຍອ້າຍນ້ອງແບບພິເສດ ແລະ ເປັນການຍົກລະດັບການພົວພັນ ການທູດລະຫວ່າງສອງຊາດ ທີ່ມາຮອດນີ້ພໍດີບັນຈົບຄົບຮອບ 55 ປີ, ຂຶ້ນສູ່ລະດັບ ແລະ ບາດກ້າວໃໝ່, ໄດ້ເປັນພື້ນຖານອັນໜັກແໜ້ນໃຫ້ແກ່ການເພີ່ມທະວີການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃນໄລຍະໃໝ່.

ສາມາດເວົ້າໄດ້ວ່າ 55 ປີ ແຫ່ງການສ້າງສາຍພົວພັນການທູດ ແລະ 40 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງສອງປະເທດລາວ-ຫວຽດນາມ ແມ່ນໄລຍະເວລາແຫ່ງການທົດສອບຄວາມໝັ້ນແກ່ນແໜ້ນໜຽວ ຂອງສາຍພົວພັນລະຫວ່າງສອງປະເທດພວກເຮົາ. ເຖິງແມ່ນວ່າສະພາບແວດລ້ອມຂອງໂລກ ກໍຄືສາກົນໄດ້ຜັນແປໄປຢ່າງໄວວາສັບສົນທີ່ມີທັງກາລະໂອກາດ ແລະ ສິ່ງທ້າທາຍນາໆປະການກໍຕາມ, ແຕ່ພັກ-ລັດ ແລະ ປະຊາຊົນລາວບັນດາເຜົ່າກໍໄດ້ເອົາໃຈໃສ່ເພີ່ມທະວີສ້າງໃຫ້ການພົວພັນຮ່ວມມືຂອງສອງຊາດຍິ່ງເພີ່ມພູນຄູນສ້າງໃຫ້ ອຸດົມສົມບູນ ແລະ ໄດ້ຮັບການປັບປຸງຍົກລະດັບທັງດ້ານປະລິມານ ແລະ ຄຸນະພາບໃຫ້ສູງຂຶ້ນເລື້ອຍໆ. ເນື້ອໃນຂອງການຮ່ວມມືນັບມື້ນັບເຂົ້າສູ່ລວງເລິກແທດຕົວຈິງ. ກົນໄກ ແລະ ວິທີການຕ່າງໆແມ່ນນັບມື້ຄ່ອງຕົວຍິ່ງຂຶ້ນ; ການພົວພັນຮ່ວມມືລະຫວ່າງທ້ອງຖິ່ນ, ຂະແໜງການ ມີປະສິດທິຜົນຫຼາຍຂຶ້ນ ແລະ ຂົງເຂດຕ່າງໆນັບມື້ເປີດກວ້າງອອກ ເຊິ່ງນຳ​ເອົາ​ຜົນ​ປະ​ໂຫຍດຕົວ​ຈິງ​ມາສູ່​ປະຊາຊົນ​ສອງ​ຊາດ​ພວກເຮົາ. ອັນ​ນີ້​ແມ່ນ​ສະ​ແດງ​ອອກໃຫ້ເຫັນລັກສະນະພິເສດຂອງການພົວພັນຮ່ວມມືລາວ-ຫວຽດນາມ ທີ່ໄດ້ກາຍເປັນປັດໄຈຊ່ວຍໜູນທີ່ສຳຄັນໃຫ້ແກ່ການພັດທະນາປະເທດຊາດຂອງພວກເຮົາ.

ມູນເຊື້ອອັນດີງາມແຫ່ງການພົວພັນສາມັກຄີພິເສດ ແລະ ການຮ່ວມມືຢ່າງຮອບດ້ານດ້ວຍໄມຕີຈິດອັນບໍລິສຸດຜຸດຜ່ອງນັ້ນ ໄດ້ເຮັດໃຫ້ປະຊາຊົນສອງຊາດພວກເຮົາມີຄວາມເຊື່ອໝັ້ນຢ່າງໜັກແໜ້ນຕໍ່ບາດກ້າວຂະຫຍາຍຕົວ ກໍຄືອະນາຄົດອັນສະຫວ່າງສະໄຫວໃນການນຳພາສອງປະເທດພວກເຮົາກ້າວຂຶ້ນ, ເປັນເສັ້ນທາງກ້າວສູ່ຄວາມວັດທະນະຖາວອນຕາມຈຸດໝາຍສັງຄົມນິຍົມ.

ພັກ-ລັດ ແລະ ປະຊາຊົນລາວບັນດາເຜົ່າ ມີຄວາມຊື່ນຊົມຍິນດີຕໍ່ຜົນສຳເລັດໃນຫຼາຍດ້ານທີ່ພັກ-ລັດ ແລະ ປະຊາຊົນຫວຽດນາມອ້າຍນ້ອງບັນລຸໄດ້ໃນຊຸມປີທີ່ຜ່ານມາ, ພິເສດ ແມ່ນໃນໄລຍະ 30 ປີແຫ່ງການປ່ຽນແປງໃໝ່, ເຊິ່ງໄດ້ສ້າງພື້ນຖານ ແລະ ຖ່ວງທ່າໃໝ່ໃຫ້ແກ່ການພັດທະນາປະເທດຊາດ ໄປຕາມທິດຫັນເປັນອຸດສາຫະກຳ-ຫັນເປັນທັນສະໄໝສູ່ຈຸດໝາຍສັງຄົມນິຍົມຢ່າງໜັກແໜ້ນ. ຜົນສຳເລັດດັ່ງກ່າວນັ້ນ ໄດ້ເປັນບົດຮຽນອັນມີຄ່າແກ່ການນຳພາຂອງພັກ ແລະ ການຄຸ້ມຄອງຂອງລັດພວກເຮົາ. ພ້ອມດຽວກັນນັ້ນ, ກໍເປັນສິ່ງຊຸກຍູ້ປຸກລະດົມໃຈອັນແຂງແຮງໃຫ້ແກ່ປະຊາຊົນລາວ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ.

ພວກຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນຳພາອັນປີຊາສາມາດ ແລະ ສະຫຼາດສ່ອງໃສຂອງພັກຄອມມູນິດຫວຽດນາມ, ພັກທີ່ສືບທອດແນວຄິດ ແລະ ພາລະກິດອັນຍິ່ງໃຫຍ່ຂອງປະທານ ໂຮ່ຈີມິງ ຈະເຮັດໃຫ້ຈຸດໝາຍ ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດເຂັ້ມແຂງປະຊາທິປະໄຕ, ຍຸຕິທຳ ແລະ ສີວິໄລ ບົນດິນແດນຂອງປະເທດຫວຽດນາມ ວີລະຊົນນັ້ນຈະປາກົດຜົນເປັນຈິງຢ່າງແນ່ນອນ.

ພວກຂ້າພະເຈົ້າເວລາໃດກໍຢຶດໝັ້ນການເສີມຂະຫຍາຍມູນເຊື້ອແຫ່ງການພົວພັນແບບພິເສດ ແລະ ການຮ່ວມມືຮອບດ້ານ ໃຫ້ຍືນຍົງຄົງຕົວຈົນເທົ່າກາລະນານ ດັ່ງຄຳກອນອັນ​ລື​ຊື່​ຂອງປະທານ ໄກສອນ ພົມວິຫານ ໄດ້ຂຽນໄວ້ວ່າ: “ຕາບໃດແມ່ນ້ຳຂອງບໍ່ເຫືອດແຫ້ງ ເຂີນຂາດແປນຊາຍ ສາຍພູຫຼວງແສນສູງ ບໍ່ຕໍ່າລົງເປັນຄັງຫຍ້າ ຮົງຮ່າວັງເວີນກວ້າງ ບໍ່ແປນດິນກະທ້າງໄຕ່ ສອງສາຍໃຈ ລາວ-ຫວຽດນາມ ພີ່ນ້ອງບໍ່ໄກຂ້າງຫ່າງກັນນັ້ນແລ້ວ”.

ພັກ-ລັດ ພວກຂ້າພະເຈົ້າຈະພະຍາຍາມເຮັດສຸດຄວາມສາມາດຂອງຕົນ ແລະ ຈະເຊີດຊູຄວາມເປັນເຈົ້າການຮັບຜິດຊອບໃຫ້ສູງຂຶ້ນ ໃນການປະຕິບັດບັນດາສົນທິສັນຍາ, ສັນຍາ ແລະ ຂໍ້ຕົກລົງຕ່າງໆລະຫວ່າງສອງພັກ ສອງລັດພວກເຮົາ; ພິເສດແມ່ນການເພີ່ມທະວີການພົວພັນທາງດ້ານການເມືອງ ແລະ ການແລກປ່ຽນຖອດຖອນບົດຮຽນດ້ານແນວຄິດທິດສະດີ ແລະ ພຶດຕິກຳດ້ານການກໍ່ສ້າງບຳລຸງຍົກລະດັບ ພະນັກງານ; ການຮ່ວມມືປະສານງານໃນການພົວພັນສາກົນ ແລະ ການປະສານສົມທົບດ້ານປ້ອງກັນຊາດ-ປ້ອງກັນຄວາມສະຫງົບ. ພ້ອມດຽວກັນນັ້ນ, ກໍຈະເພີ່ມຄວາມພະຍາຍາມໃນການຈັດຕັ້ງປະຕິບັດຍຸດທະສາດການຮ່ວມມືດ້ານເສດຖະກິດ, ວັດທະນະທຳ, ວິທະຍາສາດເຕັກໂນໂລຊີ ແລະ ອື່ນໆ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດໃຫ້ໄດ້ຫຼາຍຂຶ້ນເລື້ອຍໆ.

ໃນໂອກາດອັນສະຫງ່າລາສີ ແລະ ບົນເວທີອັນຄຶກຂຶມນີ້, ໃນນາມພັກ-ລັດ ແລະ ປະຊາຊົນລາວບັນດາເຜົ່າ ຂ້າພະ​ເຈົ້າຂໍສະແດງຄວາມຂອບອົກຂອບໃຈອັນຈິງໃຈ ແລະ ຄວາມຮູ້ບຸນຄຸນອັນລົ້ນເຫຼືອຕໍ່ພັກ- ລັດ ແລະ ປະຊາຊົນຫວຽດນາມ ອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າ, ທັນການ ແລະ ມີ ຜົນສັກສິດແກ່ພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງພວກ ຂ້າພະເຈົ້າໃນປັດຈຸບັນ.

ມື້​ນີ້​ພວກ​​ເຮົາ​ໄດ້​ຈັດ​ຕັ້ງ​ພິທີ​ໂຮມ​ຊຸມນຸມ​ໃຫຍ່​ລະດັບ​ຊາດ ຂຶ້ນ​ຢ່າງ​ສົມ​ກຽດ ​ເພື່ອ​ສະ​ເຫຼີ​ມສະຫຼອງ​ສອງ​ເຫດການ​ປະຫວັດ​ສາດ ລາວ-ຫວຽດນາມ, ຫວຽດນາມ-ລາວ, ນອກຈາກ​ນີ້, ພວກ​ເຮົາ​ຍັງ​ຈະ​ໄດ້​ຈັດ​ກິດຈະກຳ​ອັນ​ສຳຄັນ​ອື່ນໆອີກ​ຈົນ​ຮອດ​ສິ້ນ​ປີ.

ພວກ​ເຮົາ​ພ້ອມ​ກັນ​ເຮັດ​ໃຫ້​ປີ 2017 ​ເປັນ​ຂີດ​ໝາຍ​ແຫ່ງການ​ເພີ່​ມພູນ​ຄູນ​ສ້າງ ​ແລະ ​ເສີມ​ຂະ​ຫຍາຍ​ມິດຕະພາບ​ອັນຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ​ລະຫວ່າງ​ສອງ​ພັກ, ສອງ​ລັດ ​ແລະ ປະຊາຊົນ​ສອງຊາດລາວ-ຫວຽດນາມ​ອ້າຍນ້ອງ​ໃຫ້​ຈະ​ເລີ​ນງອກ​ງາມ ​ແລະ ​ເກີດ​ດອກ​ອອກ​ຜົນ​ຫຼາຍ​ຂຶ້ນ​ຕື່ມ​ອີກ, ປະກອບສ່ວນຢ່າງ​ຕັ້ງໜ້າ​ເຂົ້າ​ໃນ​ການ​ເສີມ​ສ້າງສັນ​ຕິ​ພາບ, ມິດຕະພາບ ​ແລະ ການ​ຮ່ວມມື ​ແລະ ການ​ເຊື່ອມ​ໂຍງ​ໃນ​ພາກ​ພື້ນ​ ແລະ ​ໃນ​​ໂລກ ​ເພື່ອ​ຄວາມ​ສັນຕິ​ສຸກ ​ແລະ ຄວາມ​ຈະ​ເລີ​ນວັດ​ທະນາ​ຂອງ​ບັນ​​ດາ​ປະຊາ​ຊາດ.

ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການຮ່ວມ​ມື​ຮອບດ້ານອັນ​ເປັນ​ມູນ​ເຊື້ອ​ລະຫວ່າງ​ພັກ​ປະຊາຊົນ​ປະຕິວັດ​ລາວ ກັບພັກ​ຄອມ​ມູນິດ​ຫວຽດນາມ, ລະຫວ່າງ ສປປ ລາວ ກັບ ສສ ຫວຽດນາມ, ລະຫວ່າງ​ປະຊາຊົນ​ລາວ ກັບປະຊາຊົນ​ຫວຽດນາມ​ອ້າຍ​ນ້ອງ​ໝັ້ນ​ຍືນ !.

ພາລະກິດ ​ແລະ ​ແນວ​ຄິດ​ຂອງ​ປະທານ​ ​​ໂຮ່ຈີ​ມິງ ຜູ້​ຍິ່ງ​ໃຫຍ່ ​ແລະ ຂອງ​ປະທານ ​ໄກສອນ ພົມວິຫານ ທີ່​ແສນ​ເຄົາລົບ​ຮັກ ຍືນ​ຍົງ​ຢູ່​ກັບ​ພວກ​ເຮົາ​ຕະຫຼອດ​ໄປ.