mps.gov.la ວາລະສານປ້ອງກັນຊາດ
ໃນບັນຍາກາດແຫ່ງປີສາມັກຄີມິດຕະພາບ 2017, ຊາຊົນສອງຊາດໄດ້ພ້ອມກັນສະເຫລີມສະຫລອງວັນສ້າງຕັ້ງສາຍພົວພັນການທູດສອງປະເທດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບຄົບຮອບ 40 ປີ ຢ່າງເປັນຂະບວນຟົດຟື້ນ, ໃນວັນທີ 20 ທັນວາ 2017, ທີ່ທຳນຽບປະທານປະເທດ ສສ ຫວຽດນາມ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ແລະ ສະຫາຍ ເຈິ່ນ ດ້າຍ ກວາງ ປະທານປະເທດ ແຫ່ງ ສສ ຫວຽດນາມ ໄດ້ຮ່ວມກັນຖະແຫລງຂ່າວປິດປີສາມັກຄີມິດຕະພາບ ລາວ-ຫວຽດນາມ 2017, ເນື້ອໃນບາງຕອນສຳຄັນ ສະຫາຍ ບຸນຍັງ ວໍລະຈິດ ໄດ້ກ່າວວ່າ: ຂ້າພະເຈົ້າຮູ້ສຶກປິຕິຊົມຊື່ນເປັນຢ່າງຍິ່ງທີ່ໄດ້ນຳພາຄະນະຜູ້ແທນຂັ້ນສູງພັກ ແລະ ລັດ ແຫ່ງ ສປປ ລາວ ມາຢ້ຽມຢາມສັນຖະວະໄມຕີສາທາ ລະນະລັດສັງຄົມນິຍົມຫວຽດນາມ ແລະ ເຂົ້າຮ່ວມພິທີປິດປີສາມັກຄີມິດຕະພາບລາວ-ຫວຽດນາມ 2017, ຂ້າພະເຈົ້າຮູ້ສຶກຊາບຊຶ້ງເປັນຢ່າງຍິ່ງຕໍ່ການຕ້ອນຮັບອັນອົບອຸ່ນ, ສົມກຽດ ແລະ ເຕັມໄປດ້ວຍມິດຈິດມິດໃຈອັນດູດດື່ມ ຖານສະຫາຍອ້າຍນ້ອງ ຈາກບັນດາສະຫາຍ ການນຳຂັ້ນສູງ ພັກ-ລັດ ແລະ ປະຊາຊົນຊາວນະຄອນຫຼວງຮ່າໂນ້ຍ.
ເນື້ອໃນສຳຄັນຂອງ ສະຫາຍ ປະທານປະເທດ ເຈິ່ນ ດ້າຍ ກວາງ, ເຫັນດີເປັນເອກະພາບກັບການຕີລາຄາ ສາຍພົວພັນພິເສດ ລາວ-ຫວຽດນາມ ໄດ້ຮັບການຖະນຸຖະໜອມ, ເພີ່ມພູນຄູນສ້າງ ໂດຍປະທານໂຮ່ຈິມິງ ຜູ້ນຳທີ່ຍິ່ງໃຫຍ່, ປະທານໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ແລະ ໄດ້ຮັບການເອົາໃຈໃສ່ສືບຕໍ່ເພີ່ມພູນຄູນສ້າງໃຫ້ຈະເລີນງອກງາມຈາກຜູ້ນຳຫລາຍໆຮຸ່ນຕໍ່ມາຈົນກາຍເປັນມໍລະດົກລວມອັນລ້ຳຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງປະ ເທດ, ເປັນປັດໄຈຕັດສິນໄຊຊະນະຂອງພາລະກິດປະຕິວັດ ຂອງແຕ່ລະປະເທດ. ຄວາມສາມັກຄີພິ ເສດດັ່ງກ່າວ ໄດ້ກາຍເປັນກຳລັງແຮງມະຫາສານທີ່ສາມາດຕີຖອຍສັດຕູຕ່າງດ້າວທີ່ມີກຳລັງອຳນາດມະຫາສານເໜືອກວ່າພວກເຮົາຫລາຍເທົ່າໄດ້.
ປະຊາຊົນສອງຊາດ ລາວ-ຫວຽດນາມ ມີສິດທີ່ຈະເອກອ້າງ ທະນົງໃຈທີ່ເຫັນວ່າ: ເຖິງວ່າເວລາຈະຜ່ານໄປຍາວນາມເທົ່າໃດ ສະພາບການພາຍໃນປະເທດ, ສະພາບການສາກົນ ແລະ ພາກພື້ນຈະມີຄວາມສັບສົນ, ຜັນແປ ສະຫລັບສັບຊ້ອນປານໃດກໍຕາມ ແຕ່ສາຍພົວພັນທີ່ບໍລິສຸດຜຸດຜ່ອງລະຫວ່າງສອງຊາດ ລາວ-ຫວຽດນາມ ບໍ່ມີວັນຈືດຈາງ, ກົງກັນຂ້າມຍິ່ງມີຄວາມແໜ້ນແຟ້ນ ແລະ ສວຍສົດງົດງາມກວ່າເກົ່າ.ຕາງໜ້າພັກ, ລັດຖະບານ ແລະ ປະຊາຊົນລາວ ຂ້າພະເຈົ້າ ຂໍສະແດງຄວາມຮູ້ບຸນຄຸນຢ່າງເລິກເຊິ່ງ ຕໍ່ການຊ່ວຍເຫຼືອອັນໃຫຍ່ຫລວງລ້ຳຄ່າຂອງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ມີຕໍ່ພາລະກິດຂອງລາວຕະຫລອດມາ ບໍ່ວ່າຈະໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືແກ່ພາລະກິດປົກປັກຮັກສາລະບອບໃໝ່ ແລະ ສ້າງສາພັດທະນາປະເທດຊາດໃນປັດຈຸບັນ.
ເຖິງວ່າປີສະມາຄີມິດຕະພາບລາວ-ຫວຽດ ນາມ, ຫວຽດນາມ-ລາວ ປີ 2017 ຈະສິ້ນສຸດລົງ ແຕ່ ສາຍພົວພັນອັນເປັນມູນເຊື້ອ, ມິດຕະພາບອັນຍິ່ງໃຫຍ່ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດພວກເຮົາ ຈະບໍມີວັນຈືດຈາງ ແລະ ຈະສືບຕໍ່ຢືນຍົງຄົງໜັ້ນຢູ່ໃນດວງໃຈຂອງປວງຊົນທັງສອງຊາດພວກເຮົາຕະຫລອດໄປ. ໂດຍສະເພາະຄົນລຸ້ນໜຸ່ມຂອງສອງປະເທດ ຈະຕ້ອງໄດ້ມີໜ້າທີ່ ແລະ ຄວາມຮັບຜິດຊອບອັນສູງສົ່ງຂອງຕົນ ໃນການປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດ ນາມ-ລາວ ເຊິ່ງເປັນມູນເຊຶ້ອອັນແສນປະເສີດສວຍງາມນີ້ ໃຫ້ຈະເລີນງອກງາມຕະຫລອດໄປດັ່ງຄໍາກອນອັນລືຊື່ ຂອງປະທານ ໄກສອນ ພົມວິຫານ ໄດ້ຂຽນໄວ້ວ່າ: “ຕາບໃດແມ່ນໍ້າຂອງບໍ່ເຫືອດແຫ້ງ ເຂີນຂາດແປນຊາຍສາຍພູຫລວງແສນສູງ ບໍ່ຕຳລົງເປັນຄັງຫຍ້າຮົງຮາວັງເວີນກວ້າງບໍ່ແປນດິນກະທ້າງໄຂ່ສອງສາຍໃຈ ລາວ-ຫວຽດນາມພີ່ນ້ອງ ບໍ່ໄກຂ້າງຫ່າງກັນນັ້ນແລ້ວ” ພັກ, ລັດ ແລະ ປະຊາຊົນລາວ ຂໍຢືນຢັນຢ່າງໜັກແໜ້ນວ່າ ຈະຮ່ວມກັບປະຊາຊົນ ຫວຽດນາມ ໃນການປົກປັກຮັກສາຄວາມສາມັກຄີພິເສດນັ້ນ ເໝືອນດັ່ງແກ້ວຕາຂອງຕົນ ແລະ ຖືສິ່ງນີ້ເປັນເຫງົ້າພະລັງ ບໍ່ເຫືອດແຫ້ງບົນເສັ້ນທາງກ້າວຂຶ້ນສັງຄົມນິຍົມ ຂອງສອງປະເທດຢ່າງໜັກແໜ້ນ.
