ກະຊວງປ້ອງກັນປະເທດ ສູມກຳລັງ ແລະ ພາຫະນະຊ່ວຍເຫຼືອຜູ້ຖືກຜົນກະທົບນໍ້າຖ້ວນ ຢູ່ເມືອງສະໜາມໄຊ ແຂວງອັດຕະປື

     ວັນທີ 28 ກໍລະກົດ 2018 ນີ້ ຢູ່ທີ່ສູນບັນຊາພາກສະໜາມກອບກູ້ໄພພິບັດ ຂອງກະຊວງປ້ອງກັນປະເທດທີ່ ເມືອງ ສະຫນາມໄຊ ທ່ານ ພົນຕີ ຄຳລຽງ ອຸທະໄກສອນ ຮອງຫົວໜ້າກົມໃຫຍ່ເສນາທິການກອງທັບ ຮອງຫົວໜ້າຄະນະຮັບຜິດຊອບຊ່ວຍເຫຼືອກອບກູ້ໄພພິບັດນ້ຳຖ້ວມ ຢູ່ແຂວງອັດຕະປືພ້ອມຄະນະ ໄດ້ຖະແຫຼງຂ່າວກ່ຽວກັບການຊອກຄົ້ນ ແລະ ຊ່ວຍເຫຼືອຜູ້ຖືກຜົນກະທົບໄພນ້ຳຖ້ວມ ຢູ່ ເມືອງ ສະຫນາມໄຊ ແຂວງ ອັດຕະປື. ທ່ານກ່າວວ່າ: ພາຍຫຼັງເຫດການເກີດຂື້ນໃນຄໍ່າຄືນຂອງວັນ ທີ 23 ກໍລະກົດ 2018 ຄະນະນໍາຂອງກະຊວງປ້ອງກັນປະເທດ ໄດ້ປະຊຸມປຶກສາຫາລື ໂດຍດ່ວນໂດຍໄດ້ສັ່ງນຳໃຊ້ກຳລັງຂອງກົມກອງທະຫານທີ່ຢູ່ໃກ້ພື້ນທີ່ ເຂົ້າມາປະຕິບັດໜ້າທີ່ກອບກູ້ຊ່ວຍເຫຼືອປະຊາຊົນ ອອກຈາກເຂດນໍ້າຖ້ວມມາສູ່ເຂດປອດໄພໂດຍດ່ວນ. ເບື້ອງຕົ້ນໃນຄໍ່າຄືນ ຂອງວັນທີ 23 ກໍລະກົດ 2018 ໄດ້ນຳໃຊ້ທະຫານ ເມືອງສະໜາມໄຊ ຈຳນວນ 50 ສະຫາຍ, ກຳລັງທະຫານແຂວງອັດຕະປື ຈຳນວນ 100 ສະຫາຍ ແລະ ກຳລັງກອງພົນທີ 5 ຈຳນວນ 200 ສະຫາຍ ລວມກຳລັງທັງ ໝົດ 350 ສະຫາຍ, ໃຊ້ລົດຂົນສົ່ງກຳລັງ 10 ຄັນ, ເຮືອທ້ອງແບນ 4 ລໍາ, ສົມທົບກັບນໍາໃຊ້ເຮືອຈັກຂອງປະຊາຊົນ 10 ກວ່າລໍາ ເພື່ອປະຕິບັດໜ້າທີ່ ກອບກູ້ເອົາປະຊາຊົນ ພ້ອມທັງເຮັດໜ້າທີ່ຊອກຄົ້ນເອົາຜູ້ທີ່ສູນຫາຍ ເຂົ້າມາໃນເຂດທີ່ປອດໄພ, ພ້ອມກັນນີ້ ໄດ້ແຕ່ງຕັ້ງຄະນະຮັບຜິດຊອບ ຂັ້ນກະຊວງລົງມາສົມທົບກັບອໍານາດການປົກຄອງທ້ອງຖິ່ນ ເພື່ອຊີ້ນຳບັນຊາໂດຍກົງຢູ່ພາກສະໜາມ, ຕອນເຊົ້າວັນທີ 24 ກໍລະກົດ 2018 ຄະນະດັ່ງກ່າວໄດ້ລົງມາປະຈຳການ ແລະ ປະຕິບັດໜ້າທີ່ຢ່າງເລັ່ງດ່ວນ.ດ້ວຍຄວາມເອົາໃຈໃສ່ເປັນຫ່ວງເປັນໃຍຕໍ່ເຫດການ. ຄະນະຊີ້ນຳກະຊວງໄດ້ທຸ່ມເທກຳລັງ, ພາຫະນະ ແລະ ການບັນຊາ ເພື່ອຊ່ວຍເຫຼືອກອບກູ້ປະຊາຊົນທີ່ຖືກຜົນກະທົບຈົນສຸດ

ຄວາມສາມາດ. ມາຮອດປັດຈຸບັນໄດ້ນຳໃຊ້ກຳລັງ ແລະ ພາຫະນະທັງໝົດ ດັ່ງນີ້: ຍົນ MA-60: 2 ລຳ, ຍົນ MI-17 ຈຳນວນ 3 ລຳ, ເຮືອທ້ອງແບນ 6 ລຳ ແລະ ເຮືອຢາງ 4 ລຳ. ນອກນີ້ຍັງມີພາຫະນະຂອງໜ່ວຍງານຕ່າງໆ ມາສົມທົບຕຶ່ມ ຄື: ເຈັດສະກີ 4 ລຳ, ເຮືອກາໂນ 2 ລຳ, ເຄື່ອງຈັບຄວາມຮ້ອນ 2 ເຄື່ຶອງ, ໂດຣນ 2 ລຳ ແລະ ເຮືອຈັກ, ເຮືອກາບຂອງປະຊາຊົນຈຳນວນຫຼາຍ. ລົດບັນທຸກກຳລັງ ແລະ ພາຫະນະ 10 ລໍາ, ລົດຈິບ, ລົດກະບະ 7 ຄັນ, ລົດແພດ, ລົດວິຊາສະເພາະອື່ນໆຈຳນວນໜຶ່ງ.

ຜ່ານການກອບກູ້ ແລະ ຊອກຄົ້ນຕົວຈິງສາມາດກອບກູ້ ແລະ ຍົກຍ້າຍປະຊາຊົນທີ່ຖືກຜົນກະທົບໃນ 13 ບ້ານມາຢູ່ເຂດປອດໄພຈຳນວນ 7.324 ຄົນ, ໃນນີ້ໄດ້ຈັດວາງຢູ່ 5 ຈຸດໃຫຍ່. ( ສູນ ພັກຊົ່ວຄາວຂອງ ເມືອງສະໜາມໄຊ ຈຳນວນ 3.731 ຄົນ, ຢູ່ສູນພັກຊົ່ວຄາວ ເມືອງ ປະທຸມພອນ ແລະ ເມືອງປາກຊ່ອງ ຈຳນວນ 1.407 ຄົນ, ຢູ່ຈຸດບ້ານ ຕະມໍຢອດ ຈຳນວນ 600 ຄົນ, ຈຸດ ບ້ານ ດອນບົກ ຈໍານວນ 1.086 ຄົນ ແລະ ຈຸດບ້ານປິນດົງ 500 ຄົນ ).

ທ່ານ ພົນຕີ ຄຳລຽງ ອຸທະໄກສອນ ກ່າວຕື່ມວ່າ: ທິດທາງຕໍ່ໄປໃນໄລຍະນີ້ ແມ່ນຍັງໜັກໜ່ວງ, ເນື່ອງຈາກນໍ້າໄດ້ບົກແຫ້ງເກືອບໝົດແລ້ວ, ມາດຕະການຕົ້ນຕໍແມ່ນຈະໄດ້ສຸມ ເພີ່ມກຳລັງເຂົ້າຕື່ມອີກ 100 ຄົນ ເພື່ອປະຕິບັດການຊອກຄົ້ນ, ແກະໄງ້, ຄວັດຊອກຕາມຈຸດຂີ້ດິນ, ຂີ້ຕົມປົກຝັງ ແລະ ຮື້ໄມ້ເຮືອນທີ່ຖືກ ດິນທັບຖົມເພື່ອຊອກໃຫ້ລະອຽດທຸກຈຸດທີ່ສົງໄສ. ໂດຍຈະສຸມໃສ່ເປັນຈຸດໆໄປ ໃນນີ້ເລັ່ງໃສ່ບ້ານທີ່ຖືກຜົນກະທົບໜັກກ່ອນ ຄື: ບ້ານຫີນລາດ, ບ້ານທ່າແສງຈັນ, ບ້ານໃໝ່, ບ້ານສະໝອງໃຕ້ ແລະ ບ້ານທ່າຫີນ. ຈາກນັ້ນຈຶ່ງຈັດຕັ້ງກຳລັງຊອກຄົ້ນ 7 ບ້ານທີ່ຖືກຜົນກະທົບບໍ່ຮ້າຍແຮງ.

ຂ່າວໃຫ້ຮູ້ຕື່ມວ່າ: ພາລະກິດການກູ້ໄພ ແລະ ຊ່ວຍເຫຼືອປະຊາຊົນໃນມື້ທີ 6 ລັດຖະບານໄດ້ເພີ່ມ ການຊີ້ນຳຢ່າງໃກ້ຊິດ ລວມທັງລົງຕິດຕາມຊຸກຍູ້ຕົວຈິງ ຢູ່ພື້ນທີ່ປະສົບໄພອັນໄດ້ສ້າງຄວາມເຊື່ອໝັ້ນ ແລະ ໃຫ້ກຳລັງໃຈທຸກພາກສ່ວນ ໄດ້ປະຕິບັດພາລະກິດທຸ່ມເທແຂ່ງກັບເວລາ, ນອກຈາກນີ້ ຂະແໜງການຈາກສູນກາງທີ່ກ່ຽວຂ້ອງ ກໍໄດ້ຈັດສົ່ງພະນັກງານ

ລົງຊ່ວຍເພື່ອບໍລິຫານຄຸ້ມຄອງ ແລະ ອຳນວຍຄວາມສະດວກເຮັດໃຫ້ການກູ້ໄພ ແລະ ການຊ່ວຍເຫຼືອດຳເນີນໄປວ່ອງໄວກວ່າເກົ່າ, ມີໜວຍກູ້ໄພທັງໝົດ 31 ພາກ
ສ່ວນ, ຈຳນວນພົນ 180 ຄົນ, ສະເພາະວັນທີ 29 ກໍລະກົດ ໄດ້ມີຫນ່ວຍກູ້ໄພມາເພີ່ມ 4 ຄະນະ ຄື: ຈາກປະເທດໄທ 3 ຄະນະ ຈຳນວນ 49 ຄົນ, ຈາກ ສປ ຈີນ 1 ຄະນະ 8 ຄົນ, ອາສາສະຫມັກການແພດ 1 ຄະນະ 4 ຄົນ, ອາສາສະໝັກບໍລິການຂົນສົ່ງ 3 ຄະນະມີ 18 ຄັນ, ໄດ້ຊ່ວຍເຮັດໃຫ້ການກູ້ໄພຄົ້ນຫາ ແລະ ຊ່ວຍເຫຼືອຂະຫຍາຍເປັນວົງກວ້າງຕື່ມອີກ. ໃນການເຄື່ອນຍ້າຍຜູ້ປະສົບໄພ ແລະ ຮັບຜູ້ຖືກ ນ້ຳຖ້ວມຍັງຕົກຄ້າງ, ໄດ້ເຕົ້າໂຮມປະຊາຊົນ 6 ບ້ານ ຍ້າຍມາຢູ່ເຂດປອດໄພເພື່ອຊ່ວຍເຫຼືອບັນເທົາທຸກໃນ 6 ຈຸດ ມີພົນລະເມືອງ 5.964 ຄົນ, ຈຳນວນຄົນຜູ້ສູນຫາຍຕາມການແຈ້ງຂອງອຳນາດການປົກຄອງບ້ານ ແລະ ຄອບຄົວເບື້ອງຕົ້ນ 131 ຄົນ, ມາຮອດວັນທີ 29 ກໍລະກົດ ສາມາດຄົ້ນພົບຜູ້ເສຍຊີວິດຕື່ມອີກ 1 ສົບລວມເປັນ 9 ສົບ, ຈຳນວນທີ່ຍັງບໍ່ທັນພົບເຫັນມີ 1.122 ຄົນ.

ໃນການຮັບເຄື່ອງບໍລິຈາກ ແລະ ເຄື່ອງຊ່ວຍເຫຼືອບັນເທົາທຸກ ໄດ້ຈັດຕັ້ງຮັບບໍລິຈາກ ແລະ ເຄື່ອງຊ່ວຍເຫຼືອຢູ່ 2 ຈຸດໃຫຍ່ຄື: ຢູ່ສຳນັກງານຫ້ອງການປ້ອງຄອງແຂວງ ແລະ ຢູ່ເມືອງສະໜາມໄຊ. ມາຮອດປັດຈຸບັນ ບັນດາອົງການຈັດຕັ້ງຂອງລັດ, ພາກເອກະຊົນ, ນັກທຸລະກິດ, ສະມາຄົມ, ມູນນິທິ, ກຸ່ມຄົນ, ບຸກຄົນ ທັງພາຍໃນ ແລະ ຕ່າງປະເທດ ໄດ້ນຳເອົາເຄື່ອງບໍລິໂພກອຸປະໂພກ ແລະ ເງິນສົດຊ່ວຍເຫຼືອ ຜູ້ປະສົບໄພຍອດມູນຄ່າທັງໝົດ 33.696.185.847 ກີບ, ໃນນັ້ນເງິນສົດ 12.457.244.928 ກີບ ສະເພາະຢູ່ ເມືອງ ສະໜາມໄຊ ໄດ້ຮັບການບໍລິຈາກທັງໝົດ 1.388.927.000 ກີບ, ໃນນັ້ນເປັນສະກຸນເງິນບາດ 39.550 ບາດ, ສະກຸນເງິນໂດລາ 100 ໂດລາ, ເຄື່ອງຊ່ວຍເຫຼືອສ່ວນຫຼາຍໄດ້ມອບຢູ່ແຂວງ ແລະ ສົ່ງຕໍ່ມາເມືອງ, ຈຳນວນໜຶ່ງຜູ້ບໍລິຈາກໄດ້ນຳມາມອບໃຫ້ຜູ້ປະສົບໄພຢູ່ເມືອງ ຫຼື ລົງແຈກຢາຍດ້ວຍຕົນເອງ ອັນໄດ້ເຮັດໃຫ້ຜູ້ປະສົບໄພຈຳນວນຫຼາຍ ໄດ້ຮັບການຊ່ວຍເຫຼືອຫຼາຍຂຶ້ນ. ໄດ້ແກ້ໄຂລະບົບເຄືອຂ່າຍໂທລະຄົມ-ການສື່ສານ ເຂດປະສົບໄພໃຫ້ວ່ອງໄວສະດວກຂຶ້ນ, ໄດ້ ຕິດຕັ້ງສັນຍານອິນເຕີເນັດ (ວາຍຟາຍ) ລວມທັງເບີມືຖືໃນເຂດພື້ນທີ່ປະສົບໄພແມ່ນໂທລ້າ, ນອກຈາກນັ້ນກໍໄດ້ມີການຕິດຕັ້ງ

ເຄື່ອງຮັບຂ່າວສານຜ່ານທາງດາວທຽມ 1 ຊຸດ ເພື່ອຮັບ-ສົ່ງ ຂ່າວຈາກພາກສະໜາມ, ນອກຈາກນັ້ນ ກໍໄດ້ຈັດຕັ້ງຈຸດບໍລິການ

ສຸຂະພາບຢູ່ໃນເທສະບານເມືອງ 5 ຈຸດ ແລະ ຢູ່ນອກພື້ນທີ່ເສັ້ນ ທາງບໍ່ທັນສາມາດເຂົ້າເຖິງສະດວກມີ 6 ຈຸດ; ມີພະນັກງານ ແພດໝໍທັງໝົດ 97 ຄົນ, ໃນນັ້ນແພດໝໍຈາກຕ່າງປະເທດ 31 ຄົນ, ໄດ້ຮັບຄົນເຈັບເຂົ້າໂຮງໝໍເມືອງ 107 ຄົນ, ບໍລິການ

ພາກສະໜາມ 497 ຄົນ, ນອກນີ້ ໄດ້ສຸມໃສ່ຕິດຕັ້ງຜະລິດ ແລະ ສະ ໜອງນໍ້າສະອາດ, ການສະໜອງວິດຖ່າຍທີ່ຈຳເປັນ, ການໂຄສະນາສຸຂະສຶກສາໃຫ້ຄວາມຮູ້ເພື່ອປ້ອງກັນພະຍາດ ແລະ ການຕິດຕາມເບິ່ງແຍງແມ່ມານ ແລະ ເດັກນ້ອຍ, ວຽກງານເຝົ້າລະວັງພົບໄຂ້ຍຸງທີ່ມີອາການເຕືອນແຕ່ມື້ເກີດເຫດ 4 ກໍລະນີ, ຖອກທ້ອງ 16 ກໍລະນີ, ທ້ອງບິດ 8 ກໍລະນີ, ອັກເສບປອດ 2 ກໍລະນີ; ເວົ້າລວມວຽກນີ້ແມ່ນເຮັດໄດ້ດີ, ປ້ອງກັນການເຈັບເປັນ ຫຼື ພະຍາດລະບາດທີ່ອາດຈະເກີດ, ຕິດຕາມເບິ່ງແຍງແມ່ມານ ແລະ ເດັກນ້ອຍເກີດຂຶ້ນ. ສັງລວມແລ້ວ ນັບແຕ່ເກີດມີເຫດການເປັນຕົ້ນມາ (23/7/2018) ຄະນະສູນບັນຊາພາກສະໜາມກອບ

ກູ້ໄພພິບັດ ຂອງກະຊວງປ້ອງກັນປະເທດທີ່ເມືອງ ສະຫນາມໄຊ ເຊິ່ງນຳໂດຍທ່ານ ພົນຕີ ຄຳລຽງ ອຸທະໄກສອນ ຮອງຫົວໜ້າກົມໃຫຍ່

ເສນາທິການກອງທັບ, ຮອງຫົວໜ້າຄະນະຮັບຜິດຊອບຊ່ວຍເຫຼືອກອບກູ້ໄພພິບັດນ້ຳຖ້ວມ ຢູ່ແຂວງອັດຕະປື ພ້ອມຄະນະໄດ້ນຳ

ພາບັນດາກົມກອງທະຫານທັງກຳລັງຫຼວງ ແລະ ກຳລັງທ້ອງຖິ່ນເຂດພາກໃຕ້ປະສານສົມທົບກັບອຳນາດການປົກຄອງທ້ອງຖິ່ນ

ປະຕິບັດຕົວຈິງສຸດຄວາມສາມາດເພື່ອກອບກູ້ຊ່ວຍເຫຼືອປະຊາຊົນທີ່ຖືກຜົນກະທົບກັບຄືນມາໃຫ້ໄດ້.