ງານແຂ່ງຂັນສິລະປະ – ວັນນະຄະດີສະໝັກຫຼິ້ນທົ່ວກອງທັບ ຄັ້ງທີ V

ງານແຂ່ງຂັນສິລະປະ – ວັນນະຄະດີສະໝັກຫຼິ້ນທົ່ວກອງທັບ ຄັ້ງທີ V ຮອບຊີງຊະນະເລີດໄດ້ສໍາເລັດລົງໃນຕອນແລງຂອງວັນທີ  14 ພະຈີກ 2018 ນີ້, ໂດຍເປັນປະທານເຂົ້າຮ່ວມຂອງ ທ່ານ ພົນໂທ ວິໄລ ຫຼ້າຄຳຟອງ ເລຂາທິການສູນກາງພັກ, ຮອງລັດຖະມົນຕິກະຊວງປັອງກັນປະເທດ,  ຫົວໝ້າກົມໃຫ່ຍການເມືອງກອງທັບ, ມີບັນດາທ່ານຄະນະນຳກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ,  ບັນດາກົມໃຫ່ຍ,  ຫ້ອງວ່າການກະຊວງ, ບັນດາແຂກຖືກເຊີນ, ມີບັນດາສະຫາຍຫົວໜ້າຄະນະພັກ ແລະ ພະນັກງານນັກສະແດງທັງໝົດ 9 ຄະນະເຂົ້າຮ່ວມ.

ໃນພິທີທ່ານ ພົນຈັດຕະວາ ສາຍສະໝອນ ສະຫຼັບແສງ ຄະນະກົມໃຫຍ່, ຫົວໜ້າກົມໂຄສະນາອົບຮົມກົມໃຫຍ່ການເມືອງກອງທັບຄະນະຮັບຜິດຊອບຈັດງານແຂ່ງຂັນ ໄດ້ຂຶ້ນຜ່ານບົດສະຫຼຸບການຈັດງານແຂ່ງຂັນສິລະປະ – ວັນນະຄະດີ ສະໝັກຫຼີ້ນທົ່ວກອງທັບ ຄັ້ງທີ V ຮອບຊິງຊະນະເລີດໃນຄັ້ງນີ້ ໄດ້ສໍາເລັດລົງດ້ວຍໝາກຜົນອັນຈົບງາມ, ມີບັນຍາກາດຟົດຟື້ນມ່ວນຊື່ນປຸກລະດົມຊຸກຍູ້ແນວຄິດຈິດໃຈ ຂອງພະນັກງານນັກຮົບໃນກອງທັບ ແລະ ປະຊາຊົນບັນດາເຜົ່າ ໃຫ້ມີຄວາມເອກອ້າງທະນົງໃຈຕໍ່ຜົນງານໄຊຊະນະ ແລະ ທາດແທ້ມູນເຊື້ອຂອງກອງທັບປະຊາຊົນລາວ, ສ່ອງແສງໃຫ້ເຫັນການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ກໍຄືຮີດຄອງປະເພນີອັນດີງາມຂອງປະຊາຊົນລາວລາວບັນດາເຜົ່າ, ສ່ອງແສງໃຫ້ເຫັນມູນເຊື້ອ ການຕໍ່ສູ້ອັນພິລະອາດຫານຂອງກອງທັບ ແລະ ປະຊາຊົນລາວບັນດາເຜົ່າ ພາຍໃຕ້ການນໍາພາອັນປີຊາສາມາດສະຫຼາດສ່ອງໃສ ຂອງພັກປະຊາຊົນປະຕິວັດລາວ, ສ່ອງແສງໃຫ້ເຫັນນໍ້າໃຈຮັກຊາດ, ຮັກບ້ານເກີດເມືອງນອນ ຮັກລະບອບປະຊາທິປະໄຕ ປະຊາຊົນ, ສະແດງໃຫ້ເຫັນຄວາມສາມັກຄີອັນແໜ້ນແຟ້ນລະຫວ່າງກອງທັບກັບປະຊາຊົນບັນດາເຜົ່າຄືປາກັບນໍ້າ, ຄຽງຄູ່ກັນນັ້ນ ກໍສ່ອງແສງໃຫ້ເຫັນເຖິງລັກສະນະຊາດ, ລັກສະນະກ້າວໜ້າ ແລະ ລັກສະນະມະຫາຊົນ ແລະ ເປັນການສ້າງຜົນງານຂໍ່ານັບຮັບຕ້ອນວັນ ສ້າງຕັ້ງກອງທັບປະຊາຊົນລາວຄົບຮອບ 70 ປີ, ການແຂ່ງຂັນໃນຄັ້ງນີ້ ມີຄະນະສິລະປະເຂົ້າຮ່ວມທັງໝົດ 9 ຄະນະ ທີ່ມາຈາກກໍາລັງຫຼວງ ແລະ ກໍາລັງທ້ອງຖິ່ນຄື: ຄະນສິລະປະກອນກອງບັນຊາການທະຫານ ແຂວງອຸດົມໄຊ, ກອງບັນຊາການທະຫານແຂວງວຽງຈັນ, ກອງບັນຊາການທະຫານ ແຂວງສະຫວັນນະເຂດ, ກອງບັນຊາການທະຫານ ແຂວງສາລະວັນ, ກົມໃຫຍ່ການເມືອງກອງທັບ, ກົມ 213, ຫ້ອງວ່າການກະຊວງປ້ອງກັນປະເທດ, ໂຮງຮຽນກໍ່ສ້າງນາຍສິບທະຫານຮາບເລກ 2 ວຽງໄຊ ແລະ ຄະນະສິລະປະສະໝັກຫຼີ້ນ ກອງພັນໃຫຍ່ລົດຕັງຍານເກາະ 661, ມີ ຈໍານວນທັງໝົດ 270 ຄົນ, ເພດຍິງ 221 ຄົນ, ລາຍການສະແດງມີ 45 ລາຍການ. ຕະຫຼອດໄລຍະການແຂ່ງຂັນ 2 ຄືນແມ່ນສາມາດຄັດເລືອກໄດ້ຄະນະທີ່ດີເດັ່ນຄື: ລາງວັນສະນະເລີດອັນດັບ 1 ມີ 1  ລາງວັນໄດ້ແກ່ຄະນະສິລະປະກອນກອງບັນຊາການທະຫານ ແຂວງອຸດົມໄຊ, ລາງວັນຮອງຊະນະເລີດອັນດັບ 1 ມີ 2 ລາງວັນໄດ້ແກ່ຄະນະສິລະປະກອງບັນຊາການທະຫານ ແຂວງວຽງຈັນ ແລະ ຄະນະສິລະປະກົມໃຫຍ່ການເມືອງກອງທັບ, ລາງວັນຮອງຊະນະເລີດອັນດັບ 2 ມີສາມລາງວັນໄດ້ແກ່ຄະນະສິລະປະກອງບັນຊາການທະຫານ ແຂວງສາລະວັນ, ຄະນະສິລະປະກອນກອງພັນໃຫຍ່ 661 ແລະ ຄະນະສິລະປະຫ້ອງວ່າການກະຊວງປ້ອງກັນປະເທດ, ລາງວັນຊົມເຊີຍມີ 3 ລາງວັນໄດ້ແກ່ຄະນະສິລະປະກົມ 213, ຄະນະສິລະປະກໍ່ສ້າງໂຮງຮຽນນາຍສິບທະຫານຮາບເລກ 2 ວຽງໄຊ ແລະ ກອງບັນຊາການທະຫານ ແຂວງສະຫວັນນະເຂດ.

ໂອກາດກັ່ງກ່າວທ່ານ ພົນໂທ ວິໄລ ຫຼ້າຄຳຟອງ ເລຂາທິການສູນກາງພັກ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ ກໍໄດ້ກ່າວຍ້ອງຍໍຊົມເຊີຍຜົນສຳເລັດອັນຈົບງາມຂອງງານແຂ່ງຂັນຄັ້ງນີ້ສຸດທີ່ ມີຄວາມໝາຍສຳຄັນໃນຂົງເຂດວຽກງານສິລະປະ – ວັນນະຄະດີ ຢູ່ໃນບັນດາກົມກອງກຳລັງປະກອບອາວຸດຂອງພວກເຮົາ, ທັງເປັນພື້ນຖານໃຫ້ແກ່ການປັບປຸງເສີມຂະຫຍາຍວຽກງານສິລະປະ – ວັດທະນະທໍາຂອງກອງທັບ ກໍຄືຂອງຊາດໃຫ້ມີຄຸນນະພາບເປັນຂະບວນກວ້າງຂວາງ, ຟົດຟື້ນກວ່າເກົ່າ. ພາຍຫຼັງກັບຄືນເມືອກົມກອງທ້ອງຖິ່ນແລ້ວ, ແຕ່ລະໜ່ວຍສິລະປະ – ວັນນະຄະດີຈົ່ງຮີບຮ້ອນຈັດຕັ້ງເຄື່ອນໄຫວສະແດງຮັບໃຊ້ນາຍ ແລະ ພົນທະຫານໃນກົມກອງ ແລະ ພໍ່ແມ່ປະຊາຊົນທ້ອງຖິ່ນຂອງຕົນໃຫ້ເປັນຂະບວນກວ້າງຂວາງກວ່າເກົ່າຖືວ່າເປັນປາງບຸນໃຫຍ່ຂອງຊາດລາວເຮົາ..