ວປກ ຜ່ານຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການອຸດໜູນຕຳແໜ່ງວິຊາການຄູ

ວິທະຍາຄານປ້ອງກັນຊາດ ໄກສອນ ພົມວິຫານ ເປີດກອງປະຊຸມ ຜ່ານຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການອຸດໜູນຕຳແໜ່ງວິຊາການຄູ, ຂໍ້ຕົກລົງແຕ່ງຕັ້ງເພີ່ມເຕີມສະພາຄົ້ນຄວ້າຕຳແໜ່ງຄູ, ສະພາວິທະຍາສາດຂັ້ນວິທະຍາຄານ, ຂັ້ນວິຊາການຄູການທະຫານ-ການເມືອງ, ເຫຼົ່າຮົບ ແລະ ແຈ້ງການ. ພິທີໄດ້ຈັດຂຶ້ນໃນວັນທີ 07 ພຶດສະພາ 2024 ນີ້, ໂດຍການເປັນປະທານຂອງ ສະຫາຍ ພົນຈັດຕະວາ ປອ ແກ້ວສຸວັນ ອິນທະວົງສາ ກຳມະການຄະນະພັກກະຊວງປ້ອງກັນປະເທດ, ຫົວໜ້າການທະຫານ ວປກ, ມີຄະນະພັກ-ຄະນະບັນຊາ, ຄະນະກົມ, ຫ້ອງການ, ຄະນະວິຊາຄູ, ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ. ສະຫາຍ ພັນເອກ ໄຊອຸດອນ ສຸພິດາ ຮອງຫົວໜ້າກົມຄົ້ນຄວ້າວິທະຍາສາດການທະຫານ-ການເມືອງ ວປກ, ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ສະບັບເລກທີ 237/ກປທ ລົງວັນທີ 19 ມັງກອນ 2024 ວ່າດ້ວຍ ການຂໍຕໍ່າແໜ່ງວິຊາການຄູໃນຂອບເຂດກະຊວງປ້ອງກັນປະເທດ, ແຈ້ງການຂອງຫ້ອງວ່າການ ສະບັບເລກທີ 318/ຫວກ ລົງວັນທີ 02 ກຸມພາ 2024 ວ່າດ້ວຍການເຜີຍແຜ່ຂໍ້ຕົກລົງ ແລະ ຈັດຕັ້ງປະຕິບັດແຈ້ງການຂອງກະຊວງປ້ອງກັນປະເທດ, ຂໍ້ຕົກລົງຂອງກະຊວງ ປ້ອງກັນປະເທດ ສະບັບເລກທີ 236/ກປທ ລົງວັນທີ 19 ມັງກອນ 2024, ວ່າດ້ວຍການແຕ່ງຕັ້ງກອງເລຂາຮັບຜິດຊອບຄົ້ນຄວ້າຜັນຂະຫຍາຍການຂໍດຳລົງຕຳແໜ່ງວິຊາການຄູ ແລະ ເຄື່ອນໄຫວວຽກງານວິທະຍາສາດການທະຫານ, ໂດຍໄດ້ຕົກລົງແຕ່ງຕັ້ງ ສະຫາຍ ພັນໂທ ຮສ ປອ ຄຳມູນ ສົມສະກຸນ ເປັນຄະນະກອງເລຂາສະພາວິທະຍາສາດການທະຫານກະຊວງປ້ອງກັນປະເທດ. ຂໍ້ຕົກລົງຂອງກະຊວງປ້ອງກັນ ປະເທດ ສະບັບເລກທີ 529/ກປທ ລົງວັນທີ 05 ກຸມພາ 2024 ວ່າດ້ວຍການອຸດໜູນວິຊາຄູ ດຳລົງຕຳແໜ່ງວິຊາການຄູຂັ້ນຮອງສາດສະດາຈານ, ມີສິດໄດ້ຮັບເງີນອຸດໜູນຕຳແໜ່ງ ຮສ ເທົ່າກັບ 40% ຂອງເງີນເດືອນພື້ນຖານ, ໃນຕະຫຼອດທີ່ດຳລົງຕ່ຳແໜ່ງ ຮສ ມີຈຳນວນ: 07 ສະຫາຍ ໃນທົ່ວສະຖາບັນການສຶກສາຊັ້ນສູງກອງທັບ, ໃນນັ້ນ ມີ ສະຫາຍ ພົນຈັດຕະວາ ຮສ ປອ ສົມພອນ ສີສຸວັນນະ ຮອງຫົວໜ້າການເມືອງ, ຫົວໜ້າກົມການເມືອງ ວິທະຍາຄານປ້ອງກັນຊາດ ໄກສອນ ພົມວິຫານ.
ນອກຈາກນີ້ຍັງມີ ຂໍ້ຕົກລົງ ວ່າດ້ວຍການແຕ່ງຕັ້ງສະພາວິທະຍາສາດຂັ້ນວິທະຍາຄານ ໂດຍໄດ້ຕົກລົງແຕ່ງຕັ້ງ ສະຫາຍ ພົ.ວ ປອ ແກ້ວສຸວັນ ອິນທະວົງສາ ກໍາມະການຄະນະພັກກະຊວງປ້ອງກັນປະເທດ, ຫົວໜ້າທະຫານ ວປກ ເປັນ ປະທານ ພົ.ວ ປອ ສົງການ ບຸນຄຸນ ຮອງຫົວໜ້າການທະຫານ, ຫົວໜ້າກົມອົບຮົມ-ກໍ່ສ້າງ ວປກ ເປັນຮອງປະທານ, ສະຫາຍ ພົນຈັດຕະວາ ຮສ ປອ ສົມພອນ ສີສຸວັນນະ ຮອງຫົວໜ້າການເມືອງ, ຫົວໜ້າກົມການເມືອງ ວປກ, ເປັນກຳມະການ ແລະ ສະຫາຍ ອື່ນໆອີກຈຳນວນໜຶ່ງ. ຂໍ້ຕົກລົງ ວ່າດ້ວຍການແຕ່ງຕັ້ງໜ່ວຍງານຄົ້ນຄວ້າປະເມີນຕໍາແໜ່ງວິຊາການຄູ. ຂໍ້ຕົກລົງ ວ່າດ້ວຍການແຕ່ງຕັ້ງສະພາວິທະຍາສາດຂັ້ນວິຊາການ ການທະຫານ-ການເມືອງ ຈຳນວນນຶ່ງອີກດ້ວຍ. ຈຸດປະສົງກໍ່ເພື່ອເປັນການກະ ກຽມບັນດາເອກະສານ, ເຜີຍແຜ່ເນື້ອໃນຈິດໃຈຂອງເອກະສານໃຫ້ແຕ່ລະພາກສ່ວນໄດ້ຮັບຮູ້ ແລະ ເຂົ້າໃຈ, ທັງເປັນການຄົ້ນຄວ້າ, ກະກຽມການເຄື່ອນໄຫວເປີດກອງປະຊຸມສະພາຂອງຕົນ, ເພື່ອປະເມີນຜົນ ງານການສິດສອນ, ຜົນງານທາງວິສາການ ແລະ ຄຸນສົມບັດສິນທຳປະຕິວັດ ບົນພື້ນຖານການຍື່ນຄຳຮ້ອງ ແລະ ເອກະສານປະກອບຂອງຄູ-ອາຈານ ຜູ້ມີເງື່ອນໄຂດຳລົງຕຳແໜ່ງວິຊາການຄູ ຂັ້ນ: ຊ່ວຍອາຈານ, ອາຈານ, ຮອງສາດສະດາຈານ ແລະ ສາດສະດາຈານ ເພື່ອນຳສະເໜີສະພາວິທະຍາສາດການທະຫານກະ ຊວງປ້ອງກັນປະເທດ ໂດຍຜ່ານກົມໂຮງຮຽນ ແລະ ກົມວິທະຍາສາດ-ປະຫວັດສາດ.
ໂອກາດນີ້, ສະຫາຍ ພົນຈັດຕະວາ ປອ ແກ້ວສຸວັນ ອິນທະວົງສາ ໄດ້ໂອ້ລົມຕໍ່ກອງປະຊຸມ, ພ້ອມເນັ້ນໜັກໃຫ້ຄະນະບັນຊາແຕ່ລະຂັ້ນ, ເອົາໃຈໃສ່ເຜີຍແຜ່, ຄົ້ນຄວ້າ, ກະກຽມເນື້ອໃນໃຫ້ລະອຽດຊັດເຈນ ແລະ ແທດເໝາະກັບສະພາບຕົວຈິງ, ຖືເອົາຜົນງານຕົວຈິງ ແລະ ການປະຕິບັດໜ້າທີຢ່າງກົງໄປກົງມາ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ເພື່ອພ້ອມກັນເຮັດສຳເລັດໜ້າທີ ທີ່ໄດ້ຮັບມອບໝາຍໃຫ້ມີປະສິດທິຜົນສູງ.
ຂໍມູນອ້າງອີງ: ໜັງສືພິມກອງທັບ