ມອບ-ຮັບໜ້າທີ່ຫົວໜ້າກອງວາລະສານປ້ອງກັນຊາດ ລະຫວ່າງ ຜູ້ເກົ່າ ແລະ ຜູ້ໃໝ່

ວັນທີ 24 ພຶດສະພາ 2024, ກອງວາລະສານປ້ອງກັນຊາດໄດ້ຈັດພິທີມອບ-ຮັບໜ້າທີ່ ລະຫວ່າງສະຫາຍ ພັນເອກ ປອ ທິມສາວ ດວງຈໍາປາ ຫົວໜ້າກອງວາລະສານປ້ອງກັນຊາດ (ຜູ້ເກົ່າ) ແລະ ສະຫາຍ ພັນໂທ ຄໍາແສນ ສຸວັນນະຜ່ອງໃສ ຫົວໜ້າກອງວາລະສານປ້ອງກັນຊາດ (ຜູ້ໃໝ່) ໂດຍການເປັນປະທານຂອງ ສະຫາຍ ພົນຕີ ສອນທອງ ພົມລາວົງ ກໍາມະການຄະນະປະຈຳພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບ, ມີສະຫາຍ ພົນຈັດຕະວາ ແປ້ນຄໍາ ບຸດຈັນແພງ ກໍາມະການຄະນະພັກກົມໃຫຍ່ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີຄະນະພັກ-ຄະນະບັນນາທິການພ້ອມດ້ວຍພະນັກງານຫຼັກແຫຼ່ງກອງວາລະສານເຂົ້າຮ່ວມ.
ສະຫາຍ ພັນເອກ ປອ ທິມສາວ ດວງຈໍາປາ ຫົວໜ້າກອງວາລະສານປ້ອງກັນຊາດ (ຜູ້ເກົ່າ) ໄດ້ຂຶ້ນຜ່ານບົດສະຫຼຸບຫຍໍ້ ໃນການນໍາພາ-ຊີ້ນໍາບັນດາໜ້າວຽກທີ່ໄດ້ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບຂອງຕົນເປັນເຈົ້າການຈັດຕັ້ງປະຕິບັດສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບສອດຫ້ອຍເຂົ້າທຸກຂົງເຂດວຽກງານ. ຜ່ານການປະຕິບັດໜ້າທີ່ ເປັນຄະນະບັນນາທິການວາລະສານປ້ອງກັນຊາດ ມາເປັນເວລາເກືອບ 6 ເດືອນຜ່ານມາໄດ້ພ້ອມກັບໝູ່ຄະນະເອົາໃຈໃສ່ສຸມທຸກເຮືອແຮງ, ສະຕິປັນຍາເພື່ອພັດທະນາກົມກອງເຮັດໃຫ້ສະພາບມີຄວາມສະຫງົບໂດຍພື້ນຖານ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດເປັນກົກ, ສໍາເລັດການດໍາເນີນກອງປະຊຸມໃຫຍ່ ຄັ້ງທີII ຂອງໜ່ວຍພັກບັນລຸໝາກຜົນຈົບງາມ ທັງໝູນໃຊ້ທ່າແຮງຂອງໝູ່ຄະນະ ກໍຄືຄຸນລັກສະນະການຈັດຕັ້ງປະກອບສົມທົບກັບຄວາມຮູ້-ຄວາມສາມາດຂອງພະນັກງານ-ນັກຮົບສອດຄ່ອງ, ເໝາະສົມກັບເງື່ອນໄຂສະພາບແວດລ້ອມຕົວຈິງ, ເປັນເຈົ້າການສູ້ຊົນຍົກລະດັບຄຸນນະພາບຄໍລໍາ, ເນື້ອໃນບົດ ແລະ ຮູບຮ່າງ ສີສັນຂອງວາລະສານປ້ອງກັນຊາດນັບມື້ດີຂຶ້ນ ພ້ອມໆກັບການເຕີບໃຫຍ່ຂອງສື່ມວນຊົນກອງທັບກໍຄືສື່ມວນຊົນລາວໃນສະພາບການໃໝ່, ໄດ້ຜັນຂະຫຍາຍທິດທາງແຜນການຜະລິດວາລະສານປ້ອງກັນຊາດ ຈາກລາຍໄຕມາດມາເປັນລາຍເດືອນນັບແຕ່ປີ 2022 ເປັນຕົ້ນມາ ສໍາເລັດຜົນຢ່າງຈົບງາມ. ນອກນີ້ ຍັງໄດ້ຈັດຕັ້ງແລກປ່ຽນບົດຮຽນກັບສື່ມວນຊົນຢູ່ພາຍໃນ ແລະ ນອກກອງທັບ, ສົມທົບກັບເຝິກອົບຮົມກັບທີ່ ແລະ ສະຫຼຸບຫອດຖອນບົດຮຽນດ້ານວິຊາສະເພາະເຊິ່ງກັນ ແລະ ກັນ, ແບ່ງປັນວຽກງານໃຫ້ກັນລະອຽດຈະແຈ້ງ, ແຕ່ລະເດືອນໄດ້ວາງມະຕິນໍາພາ,ຫັນເປັນແຜນການຂອງກອງ, ຂອງອົງການຈັດຕັ້ງມະຫາຊົນ, ສ້າງແຜນການຜະລິດວາລະສານປະຈຳປີ, ໄຕມາດ, ເດືອນ. ນັບແຕ່ປີ 2021 ມານີ້ ໄດ້ຮັບໃບຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ກົມກອງປອດໃສ, ປອດໄພ, ປອດຄະດີ, 3 ປີ ຕິດຕໍ່ກັນ.
ໂອກາດນີ້, ສະຫາຍ ພົນຕີ ສອນທອງ ພົມລາວົງ ກໍໄດ້ສະແດງຄວາມຍ້ອງຍໍຊົມເຊີຍຕໍ່ສະຫາຍຫົວໜ້າກອງວາລະສານປ້ອງກັນຊາດ(ຜູ້ເກົ່າ)ທີ່ສາມາດສ້າງຜົນງານຫຼາຍດ້ານທີ່ພົ້ນເດັ່ນໃນການພັດທະນາກອງວາລະສານປ້ອງກັນຊາດໃນໄລຍະຜ່ານມາ ພ້ອມທັງເນັ້ນໜັກໃຫ້ຫົວໜ້າກອງວາລະສານປ້ອງກັນຊາດ (ຜູ້ໃໝ່) ຈົ່ງສືບຕໍ່ຮັດແໜ້ນຄວາມສາມັກຄີພາຍໃນຢ່າງເຂັ້ມແຂງ, ເຮັດວຽກເປັນໝູ່ຄະນະ, ກໍ່ສ້າງຍົກລະດັບຄວາມ-ຮູ້ຄວາມສາມາດພະນັກງານໃຫ້ສູງຂຶ້ນໂດຍສະເພາະແມ່ນພາສາຕ່າງປະເທດ.