mps.gov.la ວາລະສານປ້ອງກັນຊາດ
ພິທີເປີດຊຸດຮຽນກໍ່ສ້າງນາຍສິບທະຫານຮາບ ຊຸດທີ IX ແລະ ບໍາລຸງການທະຫານຂັ້ນພື້ນຖານ ລະບົບ 6 ເດືອນ ຊຸດທີ III ສົກປີ 2024-2025 ຢູ່ກອງບັນຊາການທະຫານນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 5 ພະຈິກ 2024 ນີ້, ໂດຍການເປັນກຽດເຂົ້າຮ່ວມ ຂອງ ສະຫາຍ ພົນຈັດຕະວາ ໂສພາວັນ ທຳມະເທວາ ຫົວໜ້າການເມືອງກອງບັນຊາການທະຫານນະຄອນຫຼວງວຽງຈັນ, ມີຄະນະພັກ-ຄະນະກອງບັນຊາ, ມີກົມອົບຮົມ, ກົມກຳລັງພົນ, ກົມພະນັກງານ ພ້ອມດ້ວຍ ຄະນະອຳນວຍການໂຮງຮຽນການທະຫານທ້ອງຖິ່ນ, ພະແນກການທີ່ກ່ຽວຂ້ອງ ພ້ອມດ້ວຍພະນັກງານຄູ-ອາຈານ ຕະຫຼອດຮອດນັກຮຽນກໍ່ສ້າງນາຍສິບ ແລະ ພະນັກງານບໍາລຸງເຂົ້າຮ່ວມ.
ສະຫາຍ ພັນຕີ ວັນນະກອນ ສາວະລີ ຮອງຫົວໜ້າການທະຫານ ໂຮງຮຽນການທະຫານທ້ອງຖິ່ນ ນະຄອນຫຼວງວຽງຈັນ ກໍ່ໄດ້ຂຶ້ນຜ່ານແຜນການ ເປີດຮຽນກໍ່ສ້າງນາຍສິບທະຫານຮາບ ຊຸດທີ IX ລະບົບ 01 ປີ ແລະ ບໍາລຸງການທະຫານຂັ້ນພື້ນຖານ ລະບົບ 06 ເດືອນ ຊຸດທີ III ສົກປີ 2024-2025 ຢູ່ກອງບັນຊາການທະຫານນະຄອນຫຼວງວຽງຈັນ, ທັ້ງນີ້ກໍ່ເພື່ອແນໃສ່ກໍ່ສ້າງນາຍ ແລະ ພົນທະຫານໃຫ້ມີຄວາມຮູ້ພື້ນຖານໃນການບັນຊາຂັ້ນຕົ້ນ, ກຳໄດ້ເນື້ອໃນທາງດ້ານສິນລະປະຍຸດ-ຍຸດທະວິທີ ກໍ່ຄືຫຼັກການບັນຊາໝູ່-ໝວດ, ຮູ້ນຳໄປຈັດຕັ້ງບັນຊາຢູ່ພາຍໃນກົມກອງຂອງຕົນໃຫ້ມີຄຸນນະພາບ ແລະ ບັນຊາສູ້ຮົບໃຫ້ໄດ້ຮັບຜົນສູງ, ມີຄວາມສາມາດຮັບຜິດຊອບສູງຕໍ່ໜ້າທີ່ວຽກງານ ທັງເປັນການສ້າງໃຫ້ນາຍ ແລະ ພົນທະຫານມີຄຸນທາດການເມືອງໜັກແໜ້ນ, ມີຄວາມອົດທົນຜ່ານຜ່າທຸກຂໍ້ຫຍຸ້ງຍາກ ແລະ ເຮັດສຳເລັດໜ້າທີ່ການເມືອງຂອງຕົນ ກໍ່ຄືການຈັດຕັ້ງຂັ້ນເທິງມອບ ໝາຍໃຫ້, ສ່ວນກໍານົດເວລາແມ່ນຈະໄດ້ເລີ່ມຕົ້ນ ການຮໍ່າຮຽນແຕ່ເດືອນ 10 ປີ 2024 ເປັນຕົ້ນໄປຈົນກວ່າຈະສໍາເລັດໂຄງການຫຼັກສູດການຮຽນ-ການສອນ ຂອງຂັ້ນເທິງວາງໄວ້.
ໂອກາດນີ້, ສະຫາຍ ພົນຈັດຕະວາ ໂສພາວັນ ທຳມະເທວາ ຍັງໄດ້ເນັ້ນໜັກໃຫ້ຄະນະພັກ-ຄະນະບັນຊາ ທຸກຂັ້ນເອົາໃຈໃສ່ ສຸມທຸກສະຕິປັນຍາ ເພື່ອຖ່າຍທອດຄວາມຮູ້ ຄວາມສາມາດ ພ້ອມທັງນຳເອົາເຕັກໂນໂລຊີທີ່ທັນສະໄໝ ມາສຶກສາໃຫ້ກັບນັກຮຽນຂອງຕົນໄດ້ຮັບຮູ້ຢ່າງເລິກເຊິ່ງ ແລະ ຍັງໄດ້ຮຽກຮ້ອງໃຫ້ນັກຮຽນນາຍສິບ ແລະ ພະນັກງານບໍາລຸງການທະຫານ ໃນຊຸດນີ້ ຈົ່ງພ້ອມກັນເອົາໃຈໃສ່ເຝິກຝົນຫຼໍ່ຫຼອມຕົນເອງໃນທຸກດ້ານ ເຂົ້າໃນການຄົ້ນຄວ້າສຶກສາຮ່ຳຮຽນຢ່າງຕັ້ງໜ້າ ໄປພ້ອມກັບການຈັດຕັ້ງປະຕິບັດຂໍ້ກຳນົດ, ກົດລະບຽບຂອງກອງທັບວາງອອກຢ່າງເຂັ້ມງວດ, ເອົາໃຈໃສ່ອອກແຮງສ້າງຂະບວນການພາຍໃນໂຮງຮຽນໃຫ້ເປັນຂະບວນຟົດຟື້ນ ແລະ ຕ້ອງໄດ້ພ້ອມກັນສ້າງພະລາທິການກັບທີ່ ດ້ວຍການເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໂດຍຖືເອົາການປູກ-ການລ້ຽງເປັນຕົ້ນຕໍ ເພື່ອເຮັດໃຫ້ຕົນເອງກາຍເປັນນັກຮຽນທີ່ມີຜົນງານດີເດັ່ນໃນທຸກດ້ານ ແລະ ກາຍເປັນພະນັກງານສືບທອດໃນອານາຄົດ.
ທີ່ມາຂອງຂໍ້ມູນ: ໜັງສືພິມກອງທັບ
ກ່ຽວກັບ mps
