ແຂວງຫຼວງພະບາງ ເປີດຊຸດອົບຮົມ-ຫັດແອບ ສ້າງທ່າສະໜາມສູ້ຮົບປ້ອງກັນບໍລິເວນ ເມືອງນານ

ພິທີເປີດຊຸດອົບຮົມ-ຫັດແອບການສ້າງທ່າສະໜາມສູ້ຮົບປ້ອງກັນບໍລິເວນ ເມືອງນານ, ຂອງກອງບັນຊາການທະຫານ ແຂວງຫຼວງພະບາງ ໄດ້ຈັດຂຶ້ນໃນວັນທີ 5 ພະຈິກ 2024 ນີ້, ໂດຍການເປັນປະທານຮ່ວມຂອງສະຫາຍ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບ ແລະ ສະຫາຍ ພົນຈັດຕະວາ ວິລ່ຽມ ວົງທິສານ ຫົວໜ້າການທະຫານກອງບັນຊາການທະຫານ ແຂວງຫຼວງພະບາງ, ມີສະຫາຍ ພົນຈັດຕະວາ ພູນສະຫວັນ ພັນທະເສນາ ຫົວໜ້າກອງບັນຊາການປ້ອງກັນເຄື່ອນທີ່ ກະຊວງປ້ອງກັນຄວາມສະຫງົບ, ມີກົມການທະຫານທ້ອງຖິ່ນ, ກົມສູ້ຮົບ, ເຈົ້າເມືອງ ເມືອງນານ, ອົງການ 6 ຫ້ອງ, ສອງກອງບັນຊາການ ປກຊ-ປກສ ເມືອງ, ພະແນກການ, ອໍານາດການປົກຄອງບ້ານ, ກໍາລັງກອງຫຼອນ-ປ້ອງກັນຕົວ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພັນເອກ ວິລະສິນ ມິດຕະພອນ ຮອງຫົວໜ້າກອງບັນຊາການ, ຫົວໜ້າຫ້ອງການເມືອງທະຫານແຂວງ ໄດ້ຂຶ້ນຜ່ານຂໍ້ຕົກລົງ ຂອງປະທານຄະນະກໍາມະການ ປກຊ-ປກສ ແຂວງ ວ່າດ້ວຍອະນຸມັດເປີດຊຸດອົບຮົມ – ຫັດແອບ ສ້າງທ່າສະໜາມປ້ອງກັນບໍລິເວນເມືອງນານ, ພ້ອມທັງຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນໍາ ແລະ ອະນຸກໍາມະການຮັບຜິດຊອບເນື້ອໃນອົບຮົມ-ຫັດແອບ. ຈາກນັ້ນ ສະຫາຍ ພັນເອກ ຄໍາສອນ ໂພທິວັນ ຮອງຫົວໜ້າກອງບັນຊາການ, ຫົວໜ້າຫ້ອງເສນາທິການທະຫານແຂວງ ກໍໄດ້ໃຫ້ຮູ້ວ່າ: ການອົບຮົມຫັດແອບໃນຊຸດນີ້, ພາກທິດສະດີຈະໄດ້ເຊື່ອມຊຶມເອກະສານເຄື່ອນໄຫວສູ້ຮົບປ້ອງກັນຕົວເມືອງ, ວຽກງານເສນາ-ບັນຊາ, ຫຼັກການສ້າງແຜນການກຽມພ້ອມສູ້ຮົບ, ຫຼັກການວິທີສ້າງແຜນການ ແນະ ນໍາວິທີລະດົມກໍາລັງສໍາຮອງໃນແຕ່ລະພາວະ, ວຽກງານພັກ-ວຽກງານການເມືອງໃນແຕ່ລະພາວະ, ວິທີສ້າງແຜນການພະລາທິການ-ເຕັກນິກ. ພ້ອມກັນ, ນີ້ຍັງຈະໄດ້ອົບຮົມພາກປະຕິບັດຕົວຈິງ, ຫັດແອບການເຄື່ອນໄຫວຂອງເລຂາພັກເມືອງ ເມື່ອໄດ້ຮັບຄໍາສັ່ງ ຫັນກໍາລັງປະກອບອາວຸດ ຈາກພາວະປົກກະຕິຂຶ້ນສູ້ພາວະເພີ່ມທະວີ, ຫັນທ້ອງຖິ່ນເຂົ້າສູ່ພາວະສຸກເສີນດ້ານປ້ອງກັນຊາດ, ຫັນກໍາລັງປະກອບອາວຸດຄົບຖ້ວນ, ຫັນທ້ອງຖິ່ນຂຶ້ນສູ່ພາວະສົງຄາມ, ລາຍງານຄວາມຕັດສິນໃຈສູ້ຮົບ, ແຜນການສູ້ຮົບ, ແຜນການປະສານປ້ອງກັນບໍລິເວນຕົວເມືອງ, ການແກ້ໄຂກໍລະນີຊິງໂຕປະກັນຢູ່ໃນສະໜາມຮົບ, ນອກນີ້ ຍັງຈະໄດ້ອົບຮົມ-ຫັດແອບລະດັບບາດກ້າວການເຮັດວຽກຂອງເລຂາພັກ, ກຸ່ມບ້ານພາຍຫຼັງໄດ້ຮັບຄໍາສັ່ງໃນແຕ່ລະພາວະ, ຄອດການປະສານງານພົວພັນເຄື່ອນໄຫວຈາກຫຼາຍພາກສ່ວນ ແລະ ເຊື່ອມຊຶມເອກະສານທີ່ສໍາຄັນຕ່າງໆຕື່ມອີກຈໍານວນໜຶ່ງ ເຊິ່ງການອົບຮົມຈະໄດ້ປະສານສຽງແຕກ ແລະ ອົບພະຍົບຍົກຍ້າຍປະຊາຊົນໄປສູ່ເຂດຫຼົບໄພ. ການອົບຮົມຈະດໍາເນີນໄປເປັນເວລາ 15 ວັນຈິ່ງຈະສໍາເລັດ. ທັງນີ້ ກໍເພື່ອແນໃສ່ເຮັດໃຫ້ບັນດາຄະນະພັກເມືອງ, ຫ້ອງການ, ອໍານາດການປົກຄອງບ້ານ, ອົງການຈັດຕັ້ງມະຫາຊົນ ແລະ ກໍາລັງກອງຫຼອນ, ປກສ ບ້ານ ຮັບຮູ້ເຊື່ອມຊຶມຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ຂອງພັກ-ລັດໃນໄລຍະໃໝ່ ພ້ອມກັນນີ້, ຍັງເປັນການຍົກລະດັບຄວາມຮູ້ ຄວາມສາມາດ ໃຫ້ແກ່ຄະນະພັກ-ຄະນະບັນຊາອໍານາດການປົກຄອງທ້ອງຖິ່ນ ໃນການຊີ້ນໍາ-ນໍາພາດ້ານວຽກງານປ້ອງກັນຊາດ-ປ້ອງກັນຄວາມສະຫງົບອີກດ້ວຍ.