ທາບທາມບຸກຄະລາກອນສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກ ກອງພົນທີ 1 ສະໄໝທີ VI ຮອບທີ3

ໃນວັນທີ 5 ພະຈິກ 2024 ນີ້, ກອງພົນທີ1 ໄດ້ທາບທາມບຸກຄະລາກອນສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກ ກອງພົນທີ 1ສະໄໝທີ VII ຮອບທີ3. ໂດຍການເປັນປະທານຂອງ ສະຫາຍ ພົນຈັດຕະວາ ຈັນທາ ບຸນນະວົງ ຫົວໜ້າກົມຈັດຕັ້ງພັກ ກົມໃຫຍ່ການເມືອງກອງທັບ, ມີ ສະຫາຍ ພົນຈັດຕະວາ ວົງຈັນ ພັນຈັນທະມານ ຫົວໜ້າການເມືອງ ກອງພົນທີ 1, ສະຫາຍ ພົນຈັດຕະວາ ອຸ່ນຈັນ ແດງວັນສົມ ຫົວໜ້າການທະຫານ ກອງພົນທີ 1, ມີວິຊາການຈາກກົມຈັດຕັ້ງພັກ, ຄະນະພັກກອງພົນ, ອົງການ, ກົມກອງຮາກຖານ ແລະ ຜູ້ແທນກອງປະຊຸມເຂົ້າຮ່ວມ.
ສະຫາຍ ພົນຈັດຕະວາ ວົງຈັນ ພັນຈັນທະມານ ໄດ້ຜ່ານບົດລາຍງານການເມືອງທັງ 2 ພາກ ເຊິ່ງຍົກໃຫ້ເຫັນຜົນງານການຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ທີ່ມີຜົນສຳເລັດໃນໄລຍະຜ່ານມາ, ຈາກນັ້ນ, ຜູ້ແທນກອງປະຊຸມກໍ່ໄດ້ປະກອບຄຳຄິດເຫັນຢ່າງກົງໄປກົງມາດ້ວຍຄວາມຮັບຜິດຊອບສູງ ໂດຍປະຕິບັດຕາມວາລະກອງປະຊຸມ ສະຫາຍ ພັນຕີ ຄຳໝັ້ນ ມິດສຸພົນ ວິຊາການກົມຈັດຕັ້ງພັກ ໄດ້ຂຶ້ນຜ່ານມາດຖານ, ເງື່ອນໄຂຜູ້ສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກກອງພົນຊຸດໃໝ່ ສະ ໄໝທີ VII ຮອບທີ 3 ຜູ້ສະໝັກຮັບເລືອກຕັ້ງຕ້ອງເປັນຜູ້ທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ ແລະ ມີແບບແຜນດຳລົງຊີວິດທີ່ບໍລິສຸດ ປອດໃສ ມີຄວາມຮູ້ຄວາມສາມາດ, ກໍາແໜ້ນທິດສະດີມາກ-ເລນິນ, ແນວຄິດ ໄກສອນ ພົມວິຫານ, ກໍາແໜ້ນແຜນນະໂຍບາຍຂອງພັກ, ມີລະດັບວິຊາສະເພາະໃດໜຶ່ງທີ່ແນ່ນອນ, ມີແບບແຜນການນຳພາ ແລະ ວິເຮັດວຽກໂປ່ງໃສ, ສອດຄ່ອງ ແລະ ຍຸຕິທຳ, ຖືກຕ້ອງຕາມຫຼັກການລວມສູນປະຊາທິປະໄຕຂອງພັກຢ່າງເຂັ້ມງວດ, ມີສຸຂະພາບແຂງແຮງດີ, ສາມາດປະຕິບັດໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້ມີຜົນສຳເລັດ. ຈາກນັ້ນ, ຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາບຸກຄະລາກອນ ເຂົ້າໃນຄະນະບໍລິຫານງານພັກ ກອງພົນທີ 1 ສະໄໝທີ VII ຮອບທີ 3 ນໍາອີກ.