ບຸນນະມັດສະການພະທາດຫຼວງ 2024 ເປີດຢ່າງເປັນທາງການ

ບຸນນະມັດສະການພະທາດຫຼວງ ແລະ ງານວາງສະແດງສິນຄ້າ ປະຈຳປີ 2024 ໄດ້ເປີດຂຶ້ນຢ່າງເປັນທາງການ ໃນວັນທີ 11 ພະຈິກ 2024 ນີ້, ໂດຍມີທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງສປປ ລາວ ພ້ອມດ້ວຍພັນລະຍາ, ມີບັນດາການນຳພັກ-ລັດ, ທູຕານຸທູດ, ຜູ້ຕາາງໜ້າອົງການຈັດຕັ້ງສາກົນ ພ້ອມແຂກຖືກເຊີນ ທັງພາຍໃນ ແລະ ຕ່າງປະເທດ ເຂົ້າຮ່ວມ.
ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ມີຄຳເຫັນ ກ່າວເປີດງານຢ່າງເປັນທາງການ ໂດຍທ່ານ ໄດ້ສະແດງຄວາມຊົມເຊີຍຕໍ່ຄະນະຈັດງານ, ທີ່ໄດ້ກະກຽມຄວາມພ້ອມ ໃນການຈັດງານບຸນນະມັດສະການພະທາດຫລວງ ແລະ ງານວາງສະແດງສິນຄ້າ ໃນທ່າມກາງປີທ່ອງທ່ຽວລາວ 2024 ທີ່ຕິດພັນກັບຮີດຄອງປະເພນີອັນດີງາມຂອງຊາດລາວເຮົາ ແລະ ຈັດໃຫ້ມີຫລາກຫລາຍກິດຈະກຳ ທີ່ໜ້າສົນໃຈ ຕິດພັນກັບຮີດຄອງປະເພນີ, ພ້ອມທັງ ຮຽກຮ້ອງ ໃຫ້ທຸກພາກສ່ວນ ໃນສັງຄົມ ຕະຫລອດຮອດ ປວງຊົນ ທັງພາຍໃນ ແລະ ຕ່າງປະເທດ ທີ່ຈະມາຮ່ວມໃນງານບຸນ ຕ້ອງໄດ້ປະຕິບັດຕາມຮີດຄອງປະເພນີອັນດີງາມ ຂອງຊາດລາວເຮົາ ແລະ ປະຕິບັດຕາມກົດລະບຽບຂອງງານບຸນ ຢ່າງເຂັ້ມງວດ ເພື່ອເຮັດໃຫ້ງານບຸນ ໃນຄັ້ງນີ້, ດຳເນີນໄປດ້ວຍບັນຍາກາດອັນຄຶກຄື້ນ ຮັກສາໄດ້ຄວາມສະຫງົບ, ປອດໄພ ແລະ ອື່ນໆ. ພ້ອມນີ້, ທ່ານນາຍົກລັດຖະມົນຕີ ຍັງໄດ້ຂຶ້ນຕີຄ້ອງ 9 ບາດ ເພື່ອເປັນສິລິມົງຄຸນອີກດ້ວຍ.
ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ໄດ້ຂຶ້ນລາຍງານຄວາມພ້ອມດ້ານຕ່າງໆ ຂອງການຈັດງານບຸນໃນຄັ້ງນີ້, ພ້ອມທັງ ຍົກໃຫ້ເຫັນປະຫວັດຄວາມເປັນມາ ຂອງບຸນນະມັດສະການພະທາດຫລວງ ທີ່ໄດ້ປະຕິບັດກັນມາ ໃນແຕ່ລະປີ ເຊິ່ງໃນປີນີ້, ໄດ້ຈັດໃຫ້ມີຫລາກຫລາຍກິດຈະກຳ ສອດຄ່ອງກັບຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວເຮົາ ນັບແຕ່ວັນທີ 11-15 ພະຈິກ 2024 ນີ້, ໂດຍມີການຄົບງັນຕາມປະເພນີ ເປັນຕົ້ນ ໃນວັນທີ 13 ເວລາ 16:00 ໂມງ ຈະມີ ພິທີສູດປະລິຕະມຸງຄຸນ ທີ່ພະທາດຫລວງ, ວັນທີ 14 ເວລາ 13:30 ໂມງ ຈະມີພິທີແຫ່ພະສາດເຜິ້ງ, ວັນທີ 15 ເວລາ 7:00 ໂມງ ຈະມີພິທີໃສ່ບາດຖວາຍສັງກະທານ, ເວລາ 13:00 ໂມງ ຈະມີພິທີແຫ່ລູກຄີ ແລະ ການແແຂ່ງຂັນກິລາພື້ນບ້ານຕີຄີ ແລະ ເວລາ 19:00 ໂມງ ຈະມີພິທີວຽນທຽນ ແລະ ຈູດທູບທຽນ, ບັ້ງໄຟສັກກະລະບູຊາອົງພະທາດ. ທັງນີ້, ເພື່ອອະນຸລັກຮັກສາ ແລະ ສົ່ງເສີມວັດທະນະທຳ ຮີດຄອງປະເພນີອັນດີງາມ ບຸນນະມັດສະການພພະທາດຫລວງຂອງຊາວລາວ ກໍຄື ຊາວນະຄອນຫລວງວຽງຈັນ ທີ່ເຄີຍສືບທອດກັນມາແຕ່ບຸຮານນະການ ໃຫ້ມີຄວາມໂດດເດັ່ນ ແລະ ເປັນທີ່ຮັບຮູ້ໃນເວທີສາກົນ, ທັງເປັນການສ້າງໂອກາດໃນການຈັດຕັ້ງປະຕິບັດ 2 ວາລະແຫ່ງຊາດ ກໍຄື ຟື້ນຟູເສດຖະກິດ ດ້ວຍຮຸບການຊຸກຍູ້ສົ່ງເສີ່ມການທ່ອງທ່ຽວ, ສົ່ງເສີມການຄ້າ, ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດ໋ອບ ທີ່ໄດ້ກາໝາຍແຫ່ງຊາດ ແລະ ສິນຄ້າຂອງວັນດາວິສາຫະກິດຂະໜາດນ້ອຍ ແລະ ກາງ ໄດ້ມາວາງສະແດງ, ຈຳໜ່າຍສິນຄ້າ ທັງ ພາຍໃນ ແລະ ຕ່າງປະເທດ ໃຫ້ປະຊາຊົນຊາວນະຄອນຫລວງວຽງຈັນ ແລະ ແຂກຕ່າງປະເທດໄດ້ເຫັນ ແລະ ໄດ້ຊົມໃຊ້ສິນຄ້າ, ພ້ອມທັງເປັນການແລກປ່ຽນບົດຮຽນ ແລະ ປະສົບການຕຕ່າງໆຂອງບັນດາຫົວໜ່ວຍທຸລະກິດດ້ວຍກັນ.
ບຸນນະມັດສະການພະທາດຫລວງ ໃນປີນີ້ ໄດ້ເຊີນບັນດານະຄອນເພື່ອນມິດຕ່າງປະເທດ ເຂົ້າມາຮ່ວມງານ ແລະ ສ້າງເງື່ອນໄຂໃຫ້ມີການນຳເອົາຜະລິດຕະພັນສິນຄ້າມາແລກ ປ່ຽນວາງສະແດງ ແລະ ຂາຍໃນງານນຳ ເຊິ່ງມີ ຈຳນວນ 2 ນະຄອນ ເຂົ້າຮ່ວມຄື: ແຂວງ ຢຸນນານ ສປ ຈີນ ແລະ ແຂວງ ໜອງຄາຍ ປະເທດໄທ ແລະ ມີຫ້ອງວາງສະແດງ ທີ່ເດີນສະໜາມຫລວງ 1.463 ຫ້ອງ, ຢຸ່ ສູນການຄ່າ ລາວ-ໄອເຕັກ 142 ຮ້ານ. ນອກນັ້ນ, ຍັງມີການສະແດງສິລະປະວັນນະຄະດີ (ເວທີກາງ) ການສະແດງການຟ້ອນ, ຂັບລຳຈາກກອງສີລະປະກອນສູນກາງ, ສິນລະປະກອນກອງທັບ, ສິລະປະຈາກ ບັນດາເມືອງ, ສູນວັດທະນະທຳເດັກ ແລະ ສະໂມສອນດ່ານຊ້າງ ເຂົ້າຮ່ວມການສະແດງໃນແຕ່ລະມື້. ພ້ອມນີ້, ຍັງມີກິດຈະກຳຂອງອົງການຈັດຕັ້ງມະຫາຊົນໃນການໂຄສະນາ ເຜີຍແຜ່ປູກຈິດສຳນຶກໃຫ້ຄົນຮຸ່ນໃໝ່ໄດ້ຮັບຮູ້ ແລະ ໃສ່ໃຈໃນການອານຸລັກຮັກສາສະພາບແວດລ້ອມ ຕາມນະໂຍບາຍ ສ ສະອາດ, ສ ສີຂຽວ ຂອງນະຄອນຫລວງວຽງຈັນ ແລະ ມີຄວາມພ້ອມໃນການຮັບມືກັບເຫດສຸກເສີນຕ່າງໆ, ມີທີມອາສາສະໝັກກຽມພ້ອມໃຫ້ການຊ່ວຍເຫລືອກໍລະນີຕ່າງໆ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ