ເປີດຊຸດອົບຮົມ-ຫັດແອບວຽກງານປກຊ-ປກສ ໃຫ້ພະນັກງານນໍາພາ-ຄຸມຄອງ ( ເປົ້າໝາຍ 3 ) ຊຸດທີ 1

ພິທີເປີດຊຸດອົບຮົມ-ຫັດແອບວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ພະນັກງານນໍາພາ-ຄຸ້ມຄອງ ( ເປົ້າໝາຍ 3 ) ຊຸດທີ 1 ປະຈໍາປີ 2024 ຂອງແຂວງສະຫວັນນະເຂດ ໄດ້ຈັດຂຶ້ນໃນ ວັນທີ 11 ພະຈິກ 2024 ນີ້, ທີ່ສະໂມສອນກອງພັນ 207. ໂດຍການເປັນປະທານຂອງ ສະຫາຍ ນາງ ຫຼິງທອງ ແສງຕາວັນ ຄະນະປະຈໍາພັກແຂວງ ຮອງເຈົ້າແຂວງ ປະທານຄະນະກໍາມະການສຶກສາອົບຮົມວຽກງານປ້ອງກັນຊາດ-ປ້ອງກັນຄວາມສະຫງົບແຂວງ ສະຫວັນນະເຂດ, ມີ ສະຫາຍ ພັນເອກ ບຸນທັນ ໄຊມົງຄຸນ ຮອງຫົວໜ້າກົມການທະຫານທ້ອງຖິ່ນ ກົມໃຫຍ່ເສນາທິການກອງທັບ, ສະຫາຍ ພົນຈັດຕະວາ ສີ ທະວີໄຊ ຄະນະປະຈໍາພັກແຂວງ ຫົວໜ້າການເມືອງກອງບັນຊາການທະຫານແຂວງ, ສະຫາຍ ພົນຈັດຕະວາ ສົມໝາຍ ພົມມະຈັນ ຫົວໜ້າກອງບັນຊາການປ້ອງກັນຄວາມສະຫງົບແຂວງ, ຕະຫຼອດຮອດຄະນະພັກ-ຄະນະບັນຊາກອງບັນຊາການທະຫານແຂວງ, ປກສແຂວງ ແລະ ພະນັກງານນໍາພາ-ຄຸ້ມຄອງເປົ້າໝາຍສາມທີ່ມາຈາກບັນດາເມືອງ, ພະແນກການໃນທົ່ວແຂວງເຂົ້າຮ່ວມ.
ສະຫາຍ ພັນເອກ ພັນວິໄລ ລາດສະຍົນ ຫົວໜ້າການທະຫານກອງບັນຊາການທະຫານແຂວງ ຄະນະກໍາມະການສຶກສາອົບຮົມວຽກງານ ປກຊ-ປກສ ຂັ້ນແຂວງ ໄດ້ຜ່ານຂໍ້ຕົກລົງຂອງຄະນະບໍລິຫານງານພັກແຂວງ, ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ວ່າດ້ວຍການອະນຸມັດເປີດຊຸດອົບຮົມ-ຫັດແອບວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ພະນັກງານນໍາພາ-ຄຸ້ມຄອງ ( ເປົ້າໝາຍ 3 ) ໃນທົ່ວແຂວງ ຊຸດທີ 1 ປະຈໍາປີ 2024 ຂອງແຂວງສະຫວັນນະເຂດ ໂດຍປະຕິບັດຕາມດໍາລັດຂອງນາຍົກລັດຖະມົນຕີ ວ່າດ້ວຍການສຶກສາອົບຮົມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ແລະ ແຜນການອົບຮົມ-ຫັດແອບຂອງແຂວງ ເລຂາພັກແຂວງ ປະທານຄະນະກໍາມະການສຶກສາອົບຮົມວຽກງານປ້ອງກັນຊາດ-ປ້ອງກັນຄວາມສະຫງົບແຂວງຕົກລົງ ໃຫ້ກອງບັນຊາການທະຫານແຂວງ ເປີດຊຸດອົບຮົມດັ່ງກ່າວຂຶ້ນ ກໍານົດເວລາ 18 ວັນ ຈິ່ງສຳເລັດ. ຈາກນັ້ນ ສະຫາຍ ພັນເອກ ຄໍາສາ ຮຽມຈໍາປາຄໍາ ຮອງຫົວໜ້າການທະຫານ ຫົວໜ້າຫ້ອງເສນາທິການທະຫານແຂວງ ໄດ້ຂຶ້ນຜ່ານແຜນການອົບຮົມ-ຫັດແອບ ແລະ ມະຕິຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດໃຫ້ພະນັກງານນໍາພາ-ຄຸ້ມຄອງເປົ້າໝາຍສາມເຂົ້າອົບຮົມ-ຫັດແອບ, ສ່ວນເນື້ອໃນອົບຮົມປະກອບມີ: ເອກະສານດໍາລັດ93/ນຍ. ວ່າດ້ວຍການຈັດຕັ້ງ ແລະ ເຄື່ອນໄຫວຂອງກໍາລັງກອງຫຼອນ, ກໍາລັງປກຊ-ປກສ ກຸ່ມບ້ານ, ກໍາລັງປ້ອງກັນພາຍໃນ ແລະ ກໍາລັງປ້ອງກັນຕົວ, ວຽກງານການທະຫານທ້ອງຖິ່ນໃນໄລຍະໃໝ່, ວຽກງານກໍ່ສ້າງທ່າສະໜາມສົງຄາມປະຊາຊົນ 3 ຂັ້ນ, ການກໍ່ສ້າງບ້ານປ້ອມໝັ້ນ-ກຸ່ມບ້ານສູ້ຮົບຕິດລຽນ ແລະ ເນື້ອໃນເອກະສານອື່ນໆທີ່ກ່ຽວຂ້ອງ. ນອກຈາກນັ້ນ, ຍັງມີການຫັດແອບເລັງປືນ ແລະ ຍິງລູກປືນແທ້.
ໂອກາດນີ້ ສະຫາຍ ນາງ ຫຼິງທອງ ແສງຕາວັນ ໄດ້ໂອ້ລົມຕໍ່ພິທີເຊິ່ງສະຫາຍໄດ້ຕີລາຄາສູງຕໍ່ການເປີດອົບຮົມ-ຫັດແອບຍວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ບັນດາສະຫາຍພະນັກງານນຳພາ-ຄຸ້ມຄອງໃນເທື່ອນີ້ ແມ່ນມີຄວາມຈຳເປັນພາວະວິໃສ ແລະ ທັງເປັນການຈັດຕັ້ງຜັນຂະຫຍາຍດຳລັດຂອງນາຍົກລັດຖະມົນຕີ ເລກທີ 292/ນຍ, ລົງວັນທີ 21 ກັນຍາ 2011 ວ່າດ້ວຍການອົບຮົມວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ເພື່ອຮັບປະກັນໃຫ້ແກ່ການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການສ້າງສາ ແລະ ພັດທະນາປະເທດຊາດໃຫ້ມີຄວາມໜັກແໜ້ນ, ເຂັ້ມແຂງຂຶ້ນໄປຢ່າງບໍ່ຢຸດຢັ້ງ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ