ພິທີເປີດການເຝິກຊ້ອມຮ່ວມສອງກອງທັບລາວ-ຈີນ”ຂະບວນລົດໄຟສັນຕິພາບ-2024″ເພື່ອຊ່ວຍເຫຼືອມະນຸດສະທຳ ແລະ ບໍລິການດ້ານການແພດ

ພິທີເປີດການເຝິກຊ້ອມຮ່ວມສອງກອງທັບລາວ-ຈີນ”ຂະບວນລົດໄຟສັນຕິພາບ-2024″ເພື່ອຊ່ວຍເຫຼືອມະນຸດສະທຳ ແລະບໍລິການດ້ານການແພດ ໄດ້ຈັດຂຶ້ນໃນວັນທີ 16 ພະຈິກ 2024 ນີ້, ທີ່ສະໂມສອນກົມໃຫຍ່ພະລາທິການກອງທັບ,ໂດຍການ ເຂົ້າຮ່ວມຂອງສະຫາຍ ພົນຕີ ຄຳເພັດ ສີຊານົນ ຄະນະປະຈຳພັກກະຊວງປ້ອງກັນປະເທດ ຫົວໜ້າກົມໃຫຍ່ພະລາທິການກອງທັບ ຫົວໜ້າຄະນະຊີ້ນໍາການເຝິກຊ້ອມຮ່ວມຂະບວນລົດໄຟສັນຕິພາບລາວ-ຈີນ 2024,ມີສະຫາຍ ພັນເອກ ພິເສດ ຈ້າວຊົງ ຮອງຫົວໜ້າກົມເສນາຮັກ ກົມຮັບປະກັນພະລາທິການ ຄະນະກຳມະການທະຫານສູນກາງ ແຫ່ງ ສ ປຈີນ ຫົວໜ້າຂະບວນລົດໄຟສັນຕິພາບກອງທັບປົດປ່ອຍປະຊາຊົນຈີນ,ມີ ຫ້ອງການທີ່ປຶກສາທູດປ້ອງກັນຊາດ ສປ ຈີນ ປະຈຳ ສປປລາວ, ບັນດາຄະນະຊີ້ນໍາການເຝິກຊ້ອມຮ່ວມຂະບວນລົດໄຟສັນຕິພາບກອງທັບ ລາວ-ຈີນ,ຕາງໜ້າກະຊວງ,ອົງການ, ກອງ ບັນຊາການທະຫານແຂວງວຽງຈັນ, ບັນດາອະນຸກຳມະການ,ແພດໝໍພ້ອມດ້ວຍນັກເຝິກຊ້ອມຫັດແອບສອງເຫຼົ່າຮົບເສນາຮັກກອງທັບ ລາວ-ຈີນເຂົ້າຮ່ວມ.
ສະຫາຍ ພົນຈັດຕະວາ ຄໍາແພງ ພູມມາແກ້ວ ຫົວໜ້າກົມເສນາຮັກ ກົມໃຫຍ່ພະລາທິການກອງທັບປະຊາຊົນລາວ ໄດ້ລາຍງານໃຫ້ຮູ້ວ່າ: ຂະບວນລົດໄຟສັນຕິພາບລາວ-ຈີນ ໄດ້ເລີ່ມຈັດຕັ້ງປະຕິບັດມາແຕ່ປີ 2017 ມາຮອດທ້າຍປີ 2019, 2020, 2021 ຍ້ອນມີການລະບາດຂອງພະຍາດໂຄວິດ 19, ຂະບວນລົດໄຟສັນຕິພາບຈຶ່ງໄດ້ຢຸດພັກໄປໄລຍະໜຶ່ງ, ສະນັ້ນ, ການຈັດຕັ້ງປະຕິບັດເຝິກຊ້ອມຮ່ວມຂະບວນລົດໄຟ ສັນຕິພາບ 2024 ເທື່ອນີ້ແມ່ນເປັນຄັ້ງທີ 5 ແລະ ກໍ່ເປັນຄັ້ງທີ 2 ທີ່ກອງທັບລາວເຮົາໄດ້ນໍາໃຊ້ລົດໄຟເສນາຮັກຈາກກອງທັບ ປົດປ່ອຍປະຊາຊົນຈີນ ເຮັດເປັນໂຮງໝໍຂັ້ນ 3 ເພື່ອກອບກູ້ຊ່ວຍເຫຼືອປິ່ນປົວຜູ້ບາດເຈັບ ແລະ ເຈັບປ່ວຍທີ່ຖືກຜົນກະທົບຈາກດິນຖະລົ່ມ ແລະ ພິເສດປີນີ້ເຫຼົ່າຮົບເສນາຮັກຍັງໄດ້ນໍາໃຊ້ຍົນຂຶ້ນຊື່ 1 ລໍາ, ເພື່ອຂົນສົ່ງຄົນເຈັບໄປໂຮງໝໍແນວຫຼັງ. ສໍາລັບການກະກຽມຄວາມພ້ອມໃຫ້ແກ່ການເຝິກຊ້ອມຮ່ວມຂະບວນລົດໄຟສັນຕິພາບລາວ-ຈີນ 2024 ນີ້, ແມ່ນມີຄວາມພ້ອມ 100%. ສະນັ້ນ, ການຫັດແອບເຝິກຊ້ອມຂະບວນລົດໄຟສັນຕິພາບ ນອກຈາກສ້າງຄວາມເຂັ້ມແຂງໃຫ້ກອງທັບ ແລະ ເຫຼົ່າຮົບເສນາຮັກແລ້ວ ຍັງເປັນການເພີ່ມຂີດໝາຍໃນການຍົກສູງລະດັບຄວາມຮູ້, ຄວາມສາມາດຂອງແພດໝໍໃຫ້ມີຄວາມຊໍານິ-ຊໍານານໃນການກອບກູ້ໄພພິບັດ ແລະ ຍັງເປັນການສືບຕໍ່ເສີມຂະຫຍາຍສາຍສໍາພັນ, ຄວາມສາມັກຄີ ໄມຕີຈິດ, ມິດຕະພາບລະຫວ່າງສອງຊາດ, ສອງກອງທັບ ແລະ ສອງເຫຼົ່າຮົບເສນາຮັກລາວ-ຈີນ ໃຫ້ຍືນຍົງຕະຫຼອດໄປ, ຈາກນັ້ນ ສະຫາຍ ພັນເອກ ພິເສດ ຈ້າວຊົງ ໄດ້ມີຄໍາເຫັນບາງຕອນທີ່ສໍາຄັນວ່າ: ຂະບວນລົດໄຟສັນຕິພາບ ໄດ້ເຂົ້າມາຕາມເສັ້ນທາງລົດໄຟລາວ-ຈີນ, ເຊິ່ງຈະເປັນຂະບວນແຫ່ງສັນຕິພາບ, ມິດຕະພາບ ແລະ ສຸຂະພາບ, ມັນບໍ່ພຽງແຕ່ແມ່ນການປະຕິບັດຜັນຂະຫຍາຍຕາມຄວາມເຫັນດີ, ເຫັນພ້ອມຂອງການຮ່ວມມືທີ່ສໍາຄັນຂອງສອງຝ່າຍເທົ່ານັ້ນ ຍັງເປັນຮ່ວມມືອັນແຂງແຮງເພື່ອລົງເລິກດ້ານການແລກປ່ຽນ ກໍຄືການພົວພັນຮ່ວມມືລະຫວ່າງສອງກອງທັບຈີນ-ລາວ ລາວ-ຈີນ ໃນດ້ານວຽກງານພະລາທິການ ທັງເປັນການເພີ່ມທະວີສາຍພົວພັນມິດຕະພາບທີ່ເປັນມູນເຊື້ອມາແຕ່ດົນນານລະຫວ່າງສອງພັກ,ສອງລັດກໍຄືສອງກອງທັບຈີນ-ລາວ ໃຫ້ໝັ້ນຄົງທະນົງແກ່ນ.
ໂອກາດນີ້, ສະຫາຍ ພົນຕີ ຄໍາເພັດ ສີຊານົນ ກໍໄດ້ມີຄໍາເຫັນວ່າ: ການເຝິກຊ້ອມເພື່ອຊ່ວຍເຫຼືອມະ
ນຸດສະທຳ ແລະ ການບໍລິການດ້ານການແພດ ຂອງສອງກອງທັບ ລາວ-ຈີນ ແມ່ນຄວາມມຸ່ງປະສົງໜຶ່ງ ເພື່ອສ້າງຄວາມເຂັ້ມແຂງ ແລະ ຄວາມຊຳນານໃຫ້ແກ່ວິຊາການທັງສອງກອງທັບລາວ-ຈີນ ເຂົ້າໃນການກອບກູ້ ແລະ ຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພທຳມະຊາດ, ສະນັ້ນ, ການຮ່ວມເຝິກຊ້ອມຊ່ວຍເຫຼືອມະນຸດສະທຳດ້ານການແພດ (ຂະບວນລົດໄຟສັນຕິພາບ) ຂອງສອງກອງທັບ ລາວ-ຈີນ ເຫັນໄດ້ເຖິງຄວາມສາມັກຄີແບບພິເສດລະຫວ່າງສອງລັດຖະບານ ກໍຄືສອງກອງທັບລາວ-ຈີນ ທີ່ໄດ້ ຮ່ວມກັນເຊັນສັນຍາແຜນແມ່ບົດວ່າດ້ວຍຄູ່ຮ່ວມຊາຕາກຳ ລາວ-ຈີນ ເພາະສະນັ້ນ, ການຮ່ວມຫັດແອບເຝິກຊ້ອມ ຂະບວນລົດໄຟສັນຕິພາບ 2024 ເພື່ອຊ່ວຍເຫຼືອຜູ້ປະສົບໄພພິບັດຈາກທຳມະຊາດດ້ານການແພດກໍ່ຍິ່ງມີຄວາມສໍາຄັນ ເພື່ອກຽມຄວາມພ້ອມຮັບມືກັບເຫດການຕ່າງໆ ທີ່ອາດຈະເກີດຂຶ້ນໃນຕໍ່ໜ້າ ໃຫ້ທັນກັບສະພາບການ.
ສໍາລັບການຫັດແອບເຝິກຊ້ອມຂະບວນລົດໄຟສັນຕິພາບ 2024 ເລີ່ມແຕ່ວັນທີ 17 ພະຈິກ ຫາ ວັນທີ 21 ພະຈິກຈຶ່ງຈະສຳເລັດ, ພາຍຫຼັງສຳເລັດການເຝິກຊ້ອມຮ່ວມຫັດແອບພາກສະໜາມແລ້ວ,ທີມແພດຝ່າຍຈີນຍັງຈະໄດ້ຈັດແບ່ງກໍາລັງເພື່ອໄປກວດສຸຂະພາບ ແລະ ເບີກຈ່າຍຢາປົວພະຍາດໂດຍບໍ່ເສຍຄ່າໃຫ້ແກ່ພະນັກງານການນໍາ, ພະນັກງານອາວຸໂສບຳນານ ແລະ ພໍ່ແມ່ປະຊາຊົນຢູ່ໂຮງໝໍສູນກາງ 103, ໂຮງໝໍ 107 ແລະ ໂຮງໝໍທະຫານແຂວງຫຼວງນໍ້າທາ ຕື່ມອີກ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ