ຮອງຫົວໜ້າກົມໃຫຍ່ການເມືອງກອງທັບ ລົງຢ້ຽມຢາມໂອ້ລົມກຳລັງເຫຼົ່າຮົບເສນາຮັກ ແລະ ພາກສ່ວນຮັບປະກັນພະລາທິການຢູ່ພາກສະໜາມຫັດແອບ ຂະບວນລົດໄຟສັນຕິພາບ-2024

ວັນທີ 17 ພະຈິກ 2024 ນີ້,ສະຫາຍ ພົນຈັດຕະວາ ພູມີ ດາລາເພັດ ຮອງຫົວໜ້າກົມໃຫຍ່ການເມືອງກອງທັບ ຜູ້ຊີ້ນໍາວຽກງານການເມືອງ ໄດ້ລົງຢ້ຽມຢາມ,ໂອ້ລົມກຳລັງເຫຼົ່າຮົບເສນາຮັກ ແລະ ພາກສ່ວນຮັບປະກັນພະລາທິການຢູ່ພາກສະໜາມຫັດແອບເຝິກຊ້ອມ ຂະບວນລົດໄຟສັນຕິພາບ-2024 ເພື່ອຊ່ວຍເຫຼືອມະນຸດສະທຳ ແລະ ບໍລິການດ້ານການແພດຮ່ວມສອງກອງທັບລາວ-ຈີນ.
ໂອກາດນີ້, ສະຫາຍ ພົນຈັດຕະວາ ພູມີ ດາລາເພັດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ທຸກພາກສ່ວນທີ່ໄດ້ພ້ອມກັນສຸມໃສ່ຫ້າງຫາກະກຽມມາປະຕິບັດໜ້າທີ່ຂອງຕົນຢ່າງຕັ້ງໜ້າຢູ່ພາກສະໜາມດ້ວຍຄວາມຮັບຜິດຊອບສູງ ພ້ອມທັງເນັ້ນໜັກໃຫ້ບັນດານັກເຝິກຊ້ອມເຫຼົ່າຮົບເສນາຮັກທຸກສະຫາຍ ຕັ້ງໃຈໃສ່ເຂົ້າໃນການເຝິກຊ້ອມ ເພື່ອນໍາເອົາບັນດາບົດຮຽນຈາກເພື່ອນຈີນ, ໂດຍສະເພາະທາງດ້ານເຕັກນິກ ແລະ ວິຊາການຕ່າງໆ ໃນການກອບກູ້ຊ່ວຍເຫຼືອຜູ້ທີ່ຖືກບາດເຈັບ, ຜູ້ຖືກເຄາະຮ້າຍຈາກໄພທໍາມະຊາດ, ສະນັ້ນ ການຮ່ວມຫັດແອບເຝິກຊ້ອມເພື່ອຊ່ວຍເຫຼືອຜູ້ປະສົບໄພພິບັດຈາກທຳມະຊາດດ້ານການແພດແມ່ນມີຄວາມສໍາຄັນຫຼາຍ ໃນການກຽມຄວາມພ້ອມຮັບມືກັບເຫດການຕ່າງໆທີ່ອາດຈະເກີດຂື້ນໃນຕໍ່ໜ້າໃຫ້ສາມາດຊ່ອຍເຫຼືອຜູ້ປະສົບໄພໄດ້ທັນເຫດການ, ພ້ອມນັ້ນ ກໍໄດ້ຮຽກຮ້ອງໃຫ້ບັນດາສະຫາຍນັກເຝິກຊ້ອມພ້ອມກັນປະຕິບັດລະບຽບ 7 ລະບອບ 18 ວຽກຂອງກອງທັບໃຫ້ໜັກແໜ້ນເຂັ້ມແຂງ,ເພີ່ມທະວີຄວາມສາມັກຄີເປັນປຶກແຜ່ນໃນການເຝິກຊ້ອມ, ມີຄວາມສາມັກຄີກັບເພື່ອນຈີນ,ຮັກສາໄດ້ຄວາມປອດໄພໃນການເຝິກແອບ,ມີຄວາມອົດທົນສູ້ຊົນຜ່ານຜ່າທຸກຂໍ້ຫຍຸ້ງຍາກໃນການຫັດແອບເພື່ອພ້ອມກັນເຮັດສຳເລັດໜ້າທີ່ການຈັດຕັ້ງໄດ້ມອບໝາຍ.
ຈາກນັ້ນ, ສະຫາຍ ຮອງຫົວໜ້າກົມໃຫຍ່ການເມືອງກອງທັບ ກໍໄດ້ຢ້ຽມຢາມ ແລະ ໂອ້ລົມພາກສ່ວນວຽກງານພະລາທິການຢູ່ພາກສະໜາມໃຫ້ເອົາໃຈໃສ່ຢ່າງຮອບດ້ານເປັນຕົ້ນແມ່ນການປຸງແຕ່ງອາຫານໃຫ້ອ້າຍນ້ອງໄດ້ກິນເຂົ້າຄົບສາມຄາບ, ອາຫານແຊບນົວ,ສະອາດ ແລະ ຖືກຫຼັກອະນາໄມ ເພື່ອເຮັດໃຫ້ອ້າຍນ້ອງໃນພາກສະໜາມໄດ້ກິ່ນອີ່ມ, ມີສຸຂະພາບແຂງແຮງ ເພື່ອຮັບປະກັນໃຫ້ນັກເຝິກຊ້ອມທີ່ເຂົ້າຮ່ວມການເຝິກຊ້ອມຂະບວນລົດໄຟສັນຕິພາບ ສາມາດຈັດຕັ້ງປະຕິບັດໜ້າຂອງຕົນທີ່ໄດ້ຮັບມອບໝາຍ ແລະ ມີຜົນສໍາເລັດຕາມແຜນການ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ