ເປີດການເຝິກຊ້ອມກອບກູ້ໄພພິບັດ 3 ກອງທັບ

ພິທີເປີດການເຝິກຊ້ອມກອບກູ້ໄພພິບັດ 3 ກອງທັບ ກໍາປູເຈຍ-ລາວ-ຫວຽດນາມ ຄັ້ງທີ III ພາຍໃຕ້ຫົວຂໍ້ວ່າ: “ປະຕິບັດການຊ່ວຍເຫຼືອກອບກູ້ໄພພິບັດອາຄານຖະຫຼົ່ມລົງ” ໄດ້ໄຂຂຶ້ນຢ່າງເປັນທາງການ ໃນວັນທີ 18 ພະຈິກ 2024 ນີ້, ຢູ່ທີ່ສູນເຝິກອົບຮົມສາລະວັດທະຫານ ພະນົມໂຈມແສນຮັກເຣຍ ແຂວງກອມປົງສະນັງ ແຫ່ງ ຣາຊະອານາຈັກກຳປູເຈຍ, ໂດຍການເປັນປະທານຮ່ວມຂອງ ທ່ານ ພົນຕີ ແປນ ສຸກຣິດວິດເຍຍ ຫົວໜ້າສໍານັກງານເຝີກອົບຮົມ, ປະທານອະນຸກຳມະການເຝີກຊ້ອມ ກຳປູເຈຍ-ລາວ-ຫວຽດນາມ ແຫ່ງ ກອງທັບຣາຊະອານາຈັກກຳປູເຈຍ, ທ່ານ ພັນໂທ ຄຳຜາຍ ອ້ວນວິໄລ ຮອງຫົວໜ້າກົມອົບຮົມ ກົມໃຫຍ່ເສນາທິການກອງທັບ, ຫົວໜ້າຄະນະເຝີກຊ້ອມກອບກູ້ໄພພິບັດ 3 ກອງທັບ ແຫ່ງ ກອງທັບປະຊາຊົນລາວ ແລະ ທ່ານ ພັນເອກ ພິເສດ ວໍ້ ວັນ ບ໋າ ຮອງຫົວໜ້າການທະຫານ ກອງບັນຊາການທະຫານເຂດ 5, ຫົວໜ້າຄະນະເຝີກຊ້ອມກອບກູ້ໄພພິບັດ 3 ກອງທັບ ແຫ່ງ ກອງທັບປະຊາຊົນ ຫວຽດນາມ, ມີຫົວໜ້ານໍາພາການເຝິກຊ້ອມ ຂອງ 3 ກອງທັບ, ແຂກຖືກເຊີນ, ພາກສ່ວນທີ່ກ່ຽວຂ້ອງ ແລະ ນັກເຝີກທັງ 3 ກອງທັບ ເຂົ້າຮ່ວມ.
ທ່ານ ພົນຕີ ແປນ ສຸກຣິດວິດເຍຍ ໄດ້ຕາງໜ້າໃຫ້ກະຊວງປ້ອງກັນປະເທດ ແຫ່ງຣາຊະອານາຈັກກຳປູເຈຍ ສະແດງຄວາມຂອບໃຈ ເປັນຢ່າງຍິ່ງຕໍ່ກະຊວງປ້ອງກັນປະເທດລາວ ແລະ ຫວຽດນາມ ທີ່ໄດ້ນໍາພາກໍາລັງເຂົ້າມາຮ່ວມເຝິກຊ້ອມກອບກູ້ໄພພິບັດ ແລະ ແຂ່ງຂັນກິລາ ຕາມຄຳເຊີນຂອງກະຊວງປ້ອງກັນປະເທດ ແຫ່ງ ຣາຊະອານາຈັກກຳປູເຈຍ ແລະ ສະແດງຄວາມຂອບໃຈຕໍ່ທິມງານທັງ 3 ປະເທດ ທີ່ໄດ້ຮ່ວມມືກະກຽມພິທີເປີດການເຝິກຊ້ອມ ແລະ ເນື້ອໃນເຝິກຊ້ອມ ສຳເລັດຕາມແຜນການກຳນົດ. ເຊິ່ງການເຝິກຊ້ອມຮ່ວມ 3 ກອງທັບ ໄດ້ຈັດຂຶ້ນຕາມການຊີ້ນໍາ ຂອງລັດຖະມົນຕີກະຊວງປ້ອງກັນ ກຳປູເຈຍ-ລາວ-ຫວຽດນາມ ມີຈຸດປະສົງເພີ່ມທະວີການຮ່ວມມືຊ່ວຍເຫຼືອເຊິ່ງກັນ ແລະ ກັນ ເມື່ອປະສົບໄພພິບັດເກີດຂຶ້ນ ໃນທຸກກາລະເທສະ ເພື່ອຊ່ວຍເຫຼືອຜູ້ບາດເຈັບໄດ້ທັນເວລາ, ຫຼຸດຜ່ອນການເສຍຊີວິດ ແລະ ສັບສິນ ຂອງປະຊາຊົນ ໃຫ້ໄດ້ຫຼາຍທີ່ສຸດເທົ່າທີ່ເຮັດໄດ້. ເນື້ອໃນການເຝີກຊ້ອມຄັ້ງນີ້ ມີຫົວຂໍ້ວ່າ: “ປະຕິບັດການຊ່ວຍເຫຼືອກອບກູ້ໄພພິບັດອາຄານຖະຫຼົ່ມລົງ” ເພື່ອເຮັດການຊ່ວຍເຫຼືອຄົ້ນຫາ ແລະ ນໍາສົ່ງຜູ້ ບາດເຈັບ ໄປປິ່ນປົວຕາມໂຮງໝໍຂັ້ນ 1, 2, 3 ຕາມຊ່ຽວຊານ.
ໂອກາດນີ້, ທ່ານ ພົນຕີ ແປນ ສຸກຣິດວິດເຍຍ ຍັງໄດ້ກ່າວຕື່ມອີກວ່າ: ເພື່ອເຮັດໃຫ້ສໍາເລັດໄປຕາມເນື້ອໃນ ແລະ ແຜນການທີ່ວາງອອກ ກຳລັງທຸກພາກສ່ວນ ຕ້ອງເອົາໃຈໃສ່ຮຽນຮູ້, ແລກປ່ຽນຄວາມຮູ້ເຊິ່ງກັນ ແລະ ກັນ, ທຸກເນື້ອໃນຂອງທຸກບົດເຝີກຊ້ອມ, ລວມທັງໃນສະໜາມ ແລະ ການນໍາພາ ລ້ວນແຕ່ແມ່ນເພີ່ມຄວາມຮູ້ຄວາມສາມາດ ໃຫ້ພຽງພໍໃນການປະຕິບັດໜ້າທີ່ການຊ່ວຍເຫຼືອຊີວິດປະຊາຊົນ ໃຫ້ທັນເວລາ ຈາກໄພພິບັດຕ່າງໆ, ສຳລັບກຳລັງທະຫານທຸກຄົນ ຂອງຣາຊະນາຈັກກຳປູເຈຍ ຕ້ອງຮ່ວມມືກັນຢ່າງແໜ້ນແຟນເຂົ້າຮ່ວມປະຕິບັດຕັ້ງໜ້າ ໃຫ້ໄດ້ຮັບຜົນສໍາເລັດ ແລະ ເອົາໃຈໃສ່ສຶກສາຮໍ່າຮຽນຢ່າງເຂັ້ມງວດ, ປະຕິບັດກົດລະບຽບທົ່ວໄປຂອງກອງທັບແຫ່ງຣາຊະນາຈັກກຳປູເຈຍ ກໍຄືກົດລະບຽບຂອງການຊ້ອມຮົບໃນຄັ້ງນີ້, ທຸກບັນດາໜ່ວຍງານສະຖາບັນທີ່ກ່ຽວຂ້ອງ ແລະ ກໍາລັງທະຫານທັງໝົດ ຕ້ອງເພີ່ມທະວີໃຫ້ຄວາມຮ່ວມມືເປັນຢ່າງດີ ໃນນາມທີ່ເປັນເຈົ້າພາບ ຕ້ອງເຮັດໜ້າທີ່ຢ່າງກ້າວໜ້າໃນການຊຸກຍູ້ແໜ້ນແຟນ ເພື່ອສ້າງບັນຍາກາດມ່ວນຊື່ນ ເພື່ອໃຫ້ມິດສະຫາຍເຂົ້າໃຈ ແລະ ຮັບຮູ້ຢ່າງເລິກເຊິ່ງເພີ່ມເຕີ່ມ ກ່ຽວກັບຄຸນຄ່າ ຂອງວັດທະນະທໍາ, ຮີດຄອງປະເພນີ, ໃນກໍລະນີ້ທີ່ຈຳເປັນຕ້ອງສາມາດຊ່ວຍ ແລະ ອໍານວຍຄວາມສະດວກຕໍ່ມິດສະຫາຍ ສຶກສາຮໍ່າຮຽນ, ຖ່າຍທອດປະສົບການເຊິ່ງກັນ ແລະ ກັນ ດ້ວຍຄວາມຊື່ສັດ ໃນນາມເຮັດວຽກຮ່ວມກັນຢ່າງມີຄວາມຊ່ຽວຊານ, ຕ້ອງຊຸກຍູ້ສາຍພົວພັນມິດຕະພາບ, ຄວາມສາມັກຄີ, ຄວາມຈິງໃຈ ໃນການຮ່ວມມື ແລະ ເຄົາລົບເຊິ່ງກັນ ແລະ ກັນຢ່າງສະເໝີພາບ, ຮັບປະກັນການເຝິກຊ້ອມຮ່ວມລະຫວ່າງ ກອງທັບ ກຳປູເຈຍ, ລາວ ແລະ ຫວຽດນາມ ໃນປີ 2024 ໃຫ້ປະສົບຜົນສໍາເລັດຕາມແຜນການ ພ້ອມທັງຮັບປະກັນຄວາມປອດໄພ ທັງຄົນ ແລະ ອຸປະກອນນໍາໃຊ້.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ