ປະດັບຫຼຽນໄຊແຮງງານຊັ້ນ I ແລະ ຊັ້ນ II ໃຫ້ບໍລິສັດສະຕາໂທລະຄົມ ( Unitel )

ພິທີປະດັບຫຼຽນໄຊແຮງງານຊັ້ນ I ຂອງ ສປປ ລາວ ແລະ ຫຼຽນໄຊແຮງງານຊັ້ນ II ຂອງ ສສ ຫວຽດນາມ ໃຫ້ບໍລິສັດສະຕາໂທລະຄົມ ( Unitel ) ໃນໂອກາດສະເຫຼີມສະຫຼອງວັນສ້າງຕັ້ງບໍລິ ສັດຄົບຮອບ 15 ປີ (16 ຕຸລາ 2009–16 ຕຸລາ 2024) ໄດ້ຈັດຂຶ້ນໃນວັນທີ 19 ພະຈິກ 2024, ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ, ໂດຍການເຂົ້າຮ່ວມຂອງ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ສປປ ລາວ, ມີ ສະຫາຍ ພົນເອກ ຟານ ວັນ ຢາງ ລັດຖະມົນຕີກະຊວງປ້ອງກັນປະເທດ ແຫ່ງສາທາລະນະລັດ ສັງຄົມນິຍົມຫວຽດນາມ, ມີ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳລາວ, ບັນດາລັດຖະມົນຕີ, ຮອງລັດຖະມົນຕີ, ການນຳກະຊວງ ແລະ ແຂກຖືກເຊີນເຂົ້າຮ່ວມ.
ສະຫາຍ ພົນໂທ ສຈ ປອ ວົງຄໍາ ພົມມະກອນ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ປະທານສະພາບໍລິຫານ ບໍລິສັດສະຕາ ໂທລະຄົມ ໄດ້ກ່າວໃນພິທີ ສະເຫຼີມສະຫຼອງວ່າ: ຕະຫຼອດໄລຍະ 15 ປີຜ່ານມາ ບໍລິສັດ ສະຕາໂທລະຄົມ ໄດ້ກາຍເປັນຜູ້ປະກອບການເຄືອຂ່າຍໂທລະຄົມທີ່ໃຫຍ່ ຢູ່ ສປປ ລາວ ລວມທັງເລກໝາຍຜູ້ຊົມໃຊ້, ລາຍຮັບ ແລະ ໂຄງລ່າງພື້ນຖານ, ເປັນໜຶ່ງໃນວິສາຫະກິດທີ່ມອບພັນທະໃຫ້ ລັດຖະບານຫຼາຍທີ່ສຸດ, ໄດ້ຮັບການຕີລາຄາສູງຈາກລັດຖະບານ ແລະ ກະຊວງປ້ອງກັນປະເທດຂອງ ສອງປະເທດ, ເປັນວິສາຫະກິດຕົວແບບ ທີ່ປະສົບຜົນສໍາເລັດກ່ຽວກັບການຮ່ວມມື ດໍາເນີນທຸລະກິດຂອງສອງປະເທດ ລາວ ແລະ ຫວຽດນາມ ສະແດງອອກດັ່ງນີ້: ຢູນິເທວ ສາມາດກໍ່ສ້າງລະບົບເຄື່ອຂ່າຍ ໂທລະຄົມທີ່ກວ້າງຂວາງ, ລວມມີຫຼາຍກວ່າ 9.000 ສູນສະຖານີຮັບສົ່ງສັນຍານຈໍານວນ 38.000 ກິໂລແມັດ ສາຍສົ່ງອັອບຕິກ, ອັດຕາສ່ວນພື້ນທີ່ປົກຄຸມສັນຍານກວມເອົາ 91% ຂອງພື້ນທີ່ທົ່ວປະເທດ ແລະ ໃນນັ້ນກວມເອົາ 83% ຂອງປະຊາກອນໃນທົ່ວປະເທດ ມີສັນຍານ 4G, ກຳລັງເປີດ 5G ເຮັດໃຫ້ ສປປ ລາວ ກາຍເປັນໜຶ່ງໃນປະເທດທີ່ມີລະບົບໂທລະຄົມທີ່ດີທີ່ສຸດ, ພ້ອມກັນນັ້ນຍັງຊ່ວຍລັດຖະບານໃນການຫັນປ່ຽນເປັນດີຈີຕອນ ກໍ່ສ້າງລະບົບໂຄງລ່າງພື້ນຖານລັດຖະບານເອເລັກໂຕຣນິກ ແລະ ໄດ້ມີບັນດາໂຄງການພິເສດໃຫ້ກັບກະຊວງສາທາລະນາສຸກ, ກະຊວງສຶກສາທິການ ແລະ ກິລາ, ປະກອບສ່ວນຊ່ວຍເຫຼືອສັງຄົມ ເປັນຕົ້ນແມ່ນກໍ່ສ້າງເສັ້ນທາງ, ຂົວ, ສ້າງໂຮງໝໍ, ໂຮງຮຽນ, ມອບທຶນການສຶກສາໃຫ້ຜູ້ດ້ອຍໂອກາດ, ຊ່ວຍເຫຼືອປະຊາຊົນທີ່ຖືກກະທົບຈາກໄພທຳມະຊາດ, ນໍ້າຖ້ວມ ແລະ ອື່ນໆ.
ບັນດາຜົນງານທີ່ພົ້ນເດັນທີ່ ທີບໍລິສັດ ສະຕາໂທລະຄົມ ຍາດມາໄດ້ນັ້ນເຮັດໃຫ້ ບໍລິສັດ ສະຕາໂທລະຄົມ ໄດ້ຮັບຫຼຽນໄຊອິດສະຫຼະຊັ້ນ I, ຫຼຽນໄຊພັດທະນາຊັ້ນ I ຈາກລັດຖະບານລາວ, ໄດ້ຮັບຫຼຽນໄຊແຮງງານຊັ້ນ III ຈາກລັດຖະບານຫວຽດນາມ, ໃບຍ້ອງຈາກລັດຖະບານລາວ, ທຸງແຂ່ງຂັນຈາກກະຊວງປ້ອງກັນປະເທດຫວຽດນາມ ແລະ ບັນດາລາງວັນຍ້ອງຍໍ ລະດັບສາກົນຫຼາຍລາງວັນ. ຈາກນັ້ນ ສະຫາຍ ພົນຈັດຕະວາ ວັນລະວົງ ນັນທະວົງ ຫົວໜ້າກົມນະໂຍບາຍກົມໃຫຍ່ການເມືອງກອງທັບ ໄດ້ຜ່ານລັດຖະດຳລັດ ວ່າດ້ວຍການປະດັບຫຼຽໄຊແຮງງານ ຊັ້ນ I, ຊັ້ນ II, ຊັ້ນ III, ໃຫ້ແກ່ບຸກຄົນ, ກົມກອງລວມໝູ່, ບໍລິສັດສະຕາໂທລະຄົມ ຈຳກັດ ຄື: ຫຼຽນໄຊແຮງງານ ຊັ້ນ I ຈໍານວນ 2 ທ່ານ ແລະ 1 ກົມກອງ; ຫຼຽນໄຊແຮງງານ ຊັ້ນ II ຈໍານວນ 21 ທ່ານ ແລະ 2 ກົມກອງ; ຫຼຽນໄຊແຮງງານ ຊັ້ນ III ຈໍານວນ 39 ທ່ານ ແລະ 2 ກົມກອງ ທີ່ມີຜົນງານດີເດັ່ນ ປະກອບສ່ວນດ້ານເຫື່ອແຮງ, ສະຕິປັນຍາ ເຂົ້າໃນການປະຕິບັດໜ້າທີ່ວຽກງານ ວິຊາສະເພາະ ແລະ ຊ່ວຍເຫຼືອທຶນຮອນພັດທະນາເສດຖະກິດ-ສັງຄົມ ຕະຫຼອດໄລຍະ 5 ປີ ( 2020-2024 ) ຜົນງານດັ່ງກ່າວ ເປັນການປະກອບສ່ວນອັນສໍາຄັນໃນການພັດທະນາປະເທດຊາດ.
ໃນໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດຂຶ້ນປະດັບຫຼຽນໄຊແຮງງານຊັ້ນ I ຂອງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫາຍ ພົນເອກ ຟານ ວັນ ຢາງ ກໍໄດ້ຂຶ້ນປະດັບຫຼຽນໄຊ ແຮງງານຊັ້ນ II ຂອງສາທາລະນະລັດ ສັງຄົມນິຍົມຫວຽດດນາມ. ພ້ອມນັ້ນ, ກໍໄດ້ຮ່ວມເປີດບໍລິການສັນຍານ 5G ຢ່າງເປັນທາງການ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ