ເຫດການເຮືອບິນລົງຈອດສຸກເສີນ ທີ່ແຂວງຄໍາມ່ວນ ແມ່ນເກີດຈາກການຂັດຂ້ອງທາງດ້ານເຕັກນິກ

ສະຫາຍ ພົນຈັດຕະວາ ບຸນມາ ຈັນທະວົງສາ ຫົວໜ້າການເມືອງ ກອງບັນຊາການທະຫານອາກາດ ໄດ້ໃຫ້ສໍາພາດກ່ຽວກັບເຫດການເຮືອບິນກອງທັບ ລົງຈອດສຸກເສີນທີ່ແຂວງຄໍາມ່ວນ ວ່າ: ໃນວັນທີ 14 ພະຈິກ 2024, ເຮືອບິນ MI-17 ຂອງກອງທັບອາກາດ ກອງທັບປະຊາຊົນລາວ ໄດ້ເກີດຂັດຂ້ອງທາງດ້ານເຕັກນິກ ໃນລະຫວ່າງການບິນປະຕິບັດພາລະກິດຕາມປົກກະຕິຂອງກອງທັບ ຈຳເປັນຕ້ອງລົງຈອດສຸກເສີນຢູ່ທົ່ງນາ ບ້ານ ກຸງສີ ເມືອງທ່າແຂກ ແຂວງຄຳມ່ວນ, ຢູ່ໃນເຮືອບິນມີຈຸບິນ 4 ຄົນ ພ້ອມກັບຜູ້ໂດຍສານ 20 ຄົນ, ທຸກຄົນປອດໄພດີ, ບໍ່ມີຜູ້ໄດ້ຮັບບາດເຈັບແຕ່ປະການໃດ.
ເຫດການເກີດຂຶ້ນໃນເວລາ 12 ໂມງ ຂອງວັນທີ 14 ພະຈິກ 2024, ພາຍຫຼັງສໍາເລັດການປະຕິບັດໜ້າທີ່ ຢູ່ບ້ານ ໜອງມ້າ, ເຮືອບິນໄດ້ບິນໄປເມືອງທ່າແຂກ ແຂວງຄຳມ່ວນ, ຢູ່ໃນຄວາມສູງ 700 ແມັດ, ຫ່າງຈາກເມືອງທ່າແຂກ 12 ກິໂລແມັດ, ໄດ້ເກີດມີອາການສັ່ນຢ່າງກະທັນຫັນ ເຊິ່ງເປັນສັນຍານຄວາມຜິດປົກກະຕິຂອງເຮືອບິນ, ນັກບິນໄດ້ຕັດສິນໃຈບັນຊາເຮືອບິນຜ່ອນຄວາມສູງລົງຢ່າງວ່ອງໄວ ແລະ ລົງຈອດຢູ່ທົ່ງນາເຮື້ອ ບ່ອນໃກ້ຈຸດເກີດເຫດທີ່ສຸດ, ການລົງຈອດແມ່ນນີ້ມນວນແບບລົງຈອດປົກກະຕິ. ພາຍຫຼັງລົງຈອດແລ້ວ ກວດພົບວ່າ ໃບພັດຫາງຂອງເຮືອບິນ ໜຶ່ງໃນຈຳນວນ 3 ໃບພັດ ມີຮອຍຊຳລຸດ, ສິ້ນສ່ວນແຜ່ນແຜ່ຄວາມຮ້ອນຂອງລະບົບຕ້ານນ້ຳກ້າມຂອງສິ້ນໃບພັດ ໄດ້ຫຼຸດອອກໄປ ເຮັດໃຫ້ເສຍຄວາມສົມດູນຂອງພວງໃບພັດຫາງ, ຈຶ່ງເຮັດໃຫ້ເຮືອບິນສັ່ນຢ່າງຮຸນແຮງ, ສ່ວນສາເຫດລາຍລະອຽດ ທີ່ເຮັດໃຫ້ໃບພັດດັ່ງກ່າວຊຳລຸດ ແມ່ນຍັງຢູ່ໃນລະຫວ່າງການວິເຄາະຂອງບັນດາວິຊາການ. ເຮືອບິນລໍາດັ່ງກ່າວ ແມ່ນໄດ້ຂົນສົ່ງທາງໜ້າດິນມາເຖິງສະໜາມບິນວັດໄຕດ້ວຍຄວາມປອດໄພ.
ເຮືອບິນລໍາດັ່ງກ່າວນີ້ ຫາກໍສຳເລັດການສ້ອມແປງບຳລຸງຄັ້ງໃຫຍ່ໃນທ້າຍປີ 2023 ແລະ ຜ່ານໄລຍະການບິນທົດສອບທາງເຕັກນິກຫຼາຍກວ່າ 50 ຊົ່ວໂມງ, ຈຶ່ງໄດ້ອະນຸມັດໃຫ້ບິນຮັບໃຊ້ພາລະກິດຂອງກອງທັບ, ເຮືອບິນໄດ້ມີການບົວລະບັດ ແລະ ກວດກາຄວາມສົມບູນດ້ານເຕັກນິກ ຢ່າງຄົບຖ້ວນ ແລະ ສອດຄ່ອງກັບລະບຽບຄູ່ມືເຕັກນິກເຮືອບິນ, ເຫດການຄັ້ງນີ້ຖືເປັນເຫດສຸດວິໄສ ແລະ ການຕັດສິນໃຈຂອງນັກບິນ ແມ່ນຖືກຕ້ອງ ແລະ ເດັດຂາດ ຈຶ່ງເຮັດໃຫ້ເຫດການຜ່ານພົ້ນໄປດ້ວຍດີ, ບໍ່ມີຄວາມເສຍຫາຍດ້ານຊີວິດ ແລະ ຊັບສິນ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ