mps.gov.la ວາລະສານປ້ອງກັນຊາດ
ກອງປະຊຸມປະຈໍາປີ ລະຫວ່າງ ລັດຖະມົນຕີກະຊວງປ້ອງກັນປະເທດ ກຳປູເຈຍ-ລາວ-ຫວຽດນາມ ໄດ້ຈັດຂຶ້ນໃນວັນທີ 25 ພະຈິກ 2024 ນີ້. ຢູ່ທີ່ໂຮງແຮມ ກາເດັນ ນະຄອນຫຼວງພະນົມເປັນ ຣາຊະອານາຈັກກຳປູເຈຍ. ໂດຍການເປັນປະທານຮ່ວມຝ່າຍກຳປູເຈຍນຳໂດຍ ທ່ານ ພົນເອກ ເຕຍ ໄສຫາ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ຣາຊະອານາຈັກກຳປູເຈຍ, ຝ່າຍລາວນໍາໂດຍ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ແລະ ຝ່າຍຫວຽດນາມ ນໍາໂດຍທ່ານ ພົນເອກ ຟານ ວັນຢາງ ລັດຖະມົນຕີກະຊວງປ້ອງກັນປະເທດ ຫວຽດນາມ ມີຄະນະຜູ້ແທນຂັ້ນສູງຂອງກະຊວງປ້ອງກັນປະເທດ ທັງສາມຝ່າຍເຂົ້າຮ່ວມ.
ທ່ານ ພົນເອກ ເຕຍ ໄສຫາ ໄດ້ກ່າວເປີດກອງປະຊຸມພົບປະສາມຝ່າຍຢ່າງເປັນທາງການ ພ້ອມທັງລາຍງານຜົນສຳເລັດການຈັດຕັ້ງປະບັດແຜນການຮ່ວມມືໃນໄລຍະຜ່ານມາ ເຊິ່ງສະແດງໃຫ້ເຫັນຄວາມສໍາຄັນ ການຮັດແໜ້ນຄວາມສາມັກຄີ ລະຫວ່າງ ສາມກອງທັບ ກໍ່ຄືປະຊາຊົນ ສາມຊາດກຳປູເຈຍ-ລາວ-ຫວຽດນາມ ແລະ ເປັນປະເທດຖານບ້ານໃກ້ເຮືອນຄຽງທີ່ຊ່ວຍເຫຼືອເຊິ່ງກັນ ແລະ ກັນ ໃນທຸກສະຖານະການ, ເຄົາລົບຮັກແພງຊ່ວຍເຫຼືອຮ່ວມມືກັນຢ່າງມີຜົນສໍາເລັດຕະຫຼອດມາ.
ກອງປະຊຸມພົບປະສາມຝ່າຍ, ຍັງໄດ້ຕີລາສູງ ຕໍ່ການພົວພັນຮ່ວມມືລະຫວ່າງ ສາມກອງທັບໃນໄລຍະຜ່ານມາ, ພ້ອມທັງເຫັນດີສືບຕໍ່ຈັດຕັ້ງກອງປະຊຸມ ສາມລັດຖະມົນຕີ ກຳປູເຈຍ-ລາວ-ຫວຽດນາມ ໂດຍຜັດປ່ຽນກັນເປັນເຈົ້າພາບ ຢ່າງເປັນປົກກະຕິ, ແລກປ່ຽນທັດສະນະບັນຫາສະພາບການຂອງໂລກ ແລະ ພາກພື້ນ ທີ່ມີຜົນກະທົບຕໍ່ຄວາມໝັ້ນຄົນຂອງສາມຊາດ. ສືບຕໍ່ຍົກສູງຂີດຄວາມສາມາດໃຫ້ກຳລັງໃນການກອບກູ້ໄພພິບັດທີ່ອາດຈະເກີດຂຶ້ນເພື່ອໃຫ້ການຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສາມກອງທັບໃຫ້ເປັນປົກກະຕິ. ສືບຕໍ່ປະຕິບັດຂໍ້ລິເລີ່ມລາດຕະເວນຮ່ວມສາມກອງທັບທີ່ມີຊາຍແດນເຊື່ອມຈອດ ເພື່ອສະກັດກັ້ນການລັກລອບເຂົ້າເມືອງຜິດກົດໝາຍ, ອາດສະຍາກຳຂ້າມຊາດ, ການຄ້າມະນຸດ ແລະ ກໍລະນີອື່ນໆທີ່ຜິດກົດໝາຍ. ສືຕໍ່ປົກປັກຮັກສາບູລະນະຫຼັກໝາຍຊາຍແດນ ແລະ ຊຸກຍູ້ການຮ່ວມມື່ອື່ນໆ ທີ່ຍັງຄົງຄ້າງ ແລະ ພ້ອມກັນສືຕໍ່ກວດກາ ແລະ ຊຸກຍູ້ໂຄງການກໍ່ສ້າງພື້ນຖານໂຄງຮ່າງເສັ້ນທາງເຂົ້າຫາຊາຍແດນ ແລະ ລຽບຕາມຊາຍແດນ ກຳປູເຈຍ-ລາວ-ຫວຽດນາມ ໃຫ້ມີການພັດທະນາໃນການໄປມາຫາສູ່ກັນໃຫ້ສະດວກຂື້ນ. ໃນໂອກາດດຽວກັນ ລັດຖະມົນຕີກະຊວງປ້ອງກັນປະເທດ ກໍາປູເຈຍ-ລາວ-ຫວຽດນາມ ໄດ້ພ້ອມກັນລົງນາມເຊັນບົດບັນທຶກຮ່ວມກັນ ຕໍ່ແຜນການຮ່ວມມື ກອງທັບ ກຳປູເຈຍ-ລາວ-ຫວຽດນາມ ໃນຕໍ່ໜ້າຕື່ມອີກ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ
ກ່ຽວກັບ mps
