ປະດັບຫຼຽນໄຊພິລະອາດຫານ ໃຫ້ນັກສິລະປິນ, ນັກປະພັນ ແລະ ນັກປະດິດແຕ່ງ

ວັນທີ 27 ພະຈິກ 2024 ນີ້, ກະຊວງປ້ອງກັນປະເທດ ໄດ້ຈັດພິທີປະດັບຫຼຽນໄຊພິລະອາດຫານ ໃຫ້ນັກສິລະປິນ, ນັກປະພັນ ແລະ ນັກປະດິດແຕ່ງທີ່ມີຜົນງານດີເດັ່ນ ໃນການປະກອບສ່ວນສັນລະເສີນກອງທັບປະຊາຊົນລາວ ຕະຫຼອດ 75 ປີທີ່ຜ່ານມາ, ໂດຍການເປັນປະທານຂອງ ສະຫາຍ ພົນໂທ ສຈ ປອ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີສະຫາຍ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ພ້ອມດ້ວຍບັນດາສະຫາຍຄະນະນໍາກະຊວງ, ກົມໃຫຍ່, ຫ້ອງວ່າການ, ອົງການຈັດຕັ້ງທີ່ກ່ຽວຂ້ອງ, ຄະນະພັກ-ຄະນະບັນຊາ, ພະນັກງານຫຼັກແຫຼ່ງ ກົມກອງອ້ອມຂ້າງກະຊວງປ້ອງກັນປະເທດ ແລະ ນັກປະພັນ, ນັກປະດິດແຕ່ງ, ນັກສິລະປິນ ທີ່ໄດ້ຮັບການຄັດເລືອກຍ້ອງຍໍ ເຂົ້າຮ່ວມ.
ສະຫາຍ ພັນເອກ ແກ້ວສຸວັນ ຜາງພິລາວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ ໄດ້ກ່າວວ່າ: ສໍາລັບກອງທັບເຮົາ, ວຽກງານສິລະປະ-ວັນນະຄະດີ ເຊິ່ງລວມມີ ການປະພັນບົດເນື້ອຮ້ອງ-ທໍານອງເພງ, ກອນຂັບ-ລຳທ້ອງຖິ່ນ, ການປະດິດຄິດແຕ່ງບົດຟ້ອນ, ດົນຕີ, ບົດລະຄອນ ແລະ ການສະແດງຮ້ອງລຳທໍາເພງຕ່າງໆ ຖືວ່າມີບົດບາດ ແລະ ມີຄວາມສໍາຄັນຫຼາຍ ເພາະເປັນການສ້າງບັນຍາກາດປຸກລະດົມກໍາລັງໃຈພະນັກງານ-ນັກຮົບ ໃຫ້ມີຄວາມເບີກບານມ່ວນຊື່ນ, ຫ້າວຫັນເຮັດສໍາເລັດໜ້າທີ່ການເມືອງ ຕາມການຈັດຕັ້ງຂັ້ນເທິງມອບໝາຍໃຫ້, ທັງເປັນການຊຸກຍູ້, ປຸກລະດົມໃຫ້ກຳລັງໃຈພະນັກງານ-ນັກຮົບ ທີ່ກຳລັງປະຕິບັດໜ້າທີ່ຢູ່ໃນບັ້ນຮົບ, ບັ້ນຕິຕ່າງໆ. ສຽງເພງ, ສຽງຂັບລຳ, ສຽງດົນຕີເຫຼົ່ານັ້ນ ໄດ້ຄຽງບ່າຄຽງໄຫຼ່ກັບນັກຮົບປະຕິວັດດັງກ້ອງໄປທົ່ວສະໜາມຮົບ ພ້ອມກັບສຽງປືນຂອງ ນັກຮົບ ແລະ ປະຊາຊົນລາວບັນດາເຜົ່າຜູ້ຮັກຊາດ, ຕໍ່ສູ້ຕ້ານກັບສັດຕູຜູ້ຮຸກຮານ ຈົນໄດ້ຮັບໄຊຊະນະ, ປະເທດຊາດໄດ້ຮັບເອກະລາດ ແລະ ປົດປ່ອຍຢ່າງສົມບູນ. ເນື່ອງຈາກຄວາມຮັບຮູ້ ແລະ ເຂົ້າໃຈເຖິງຄວາມໝາຍຄວາມສໍາຄັນຄືດັ່ງທີ່ກ່າວມານັ້ນ, ບົນຍ່ານທາງທີ່ກອງທັບປະຊາຊົນລາວ ກ້າວສູ່ 75 ປີ ແລະ ເຫັນໄດ້ຜົນງານ, ຄຸນງາມຄວາມດີ, ຄວາມເສຍສະຫຼະອົດທົນຜ່ານຜ່າຄວາມຍຸ້ງຍາກນາໆ ປະການຂອງນັກປະພັນ, ນັກປະດິດແຕ່ງ, ນັກຮ້ອງ-ນັກຂັບລຳທ້ອງຖິ່ນ ຜູ້ທີ່ມີຜົນງານໂດດເດັ່ນ ໃນການນໍາສະເໜີເນື້ອໃນດ້ານຕ່າງໆ ເປັນການສັນລະເສີນ, ເຊີດຊູໜ້າທີ່ບົດບາດຂອງກອງທັບປະຊາຊົນລາວ ຕະຫຼອດໄລຍະຫຼາຍຊຸມປີຜ່ານມາ. ດັ່ງນັ້ນ, ກະຊວງປ້ອງກັນປະເທດ ຈຶ່ງໄດ້ຄົ້ນຄວ້າຄັດເລືອກ, ອະນຸມັດ ແລະ ຕົກລົງມອບການຍ້ອງຍໍໃຫ້ບັນດານັກປະພັນບົດເພງ, ກອນຂັບ-ລຳທ້ອງຖິ່ນ, ບົດລະຄອນສັ້ນ, ນັກປະດິດແຕ່ງດົນຕີ, ບົດຟ້ອນ ແລະ ນັກສິລະປິນລຸ້ນຕ່າງໆ ຢູ່ໃນຖັນແຖວກອງທັບ ແລະ ຝ່າຍພົນລະເຮືອນ.
ສະຫາຍ ພົນຈັດຕະວາ ວັນລະວົງ ນັນທະວົງ ຫົວໜ້າກົມນະໂຍບາຍ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການມອບຫຼຽນໄຊພິລະອາດຫານໃຫ້ແກ່ນັກສິລະປິນດີເດັ່ນ ໃນການປະພັນເນື້ອຮ້ອງ, ທໍານອງບົດເພງ, ກອນລຳ ແລະ ນັກຂັບລໍາທີ່ມີເນື້ອໃນສັນລະເສີນກອງທັບປະຊາຊົນລາວ ໄດ້ປະກອບສ່ວນໃນການສ້າງຂະບວນການແຂ່ງຂັນປະຕິບັດໜ້າທີ່ ແລະ ສຳເລັດຕາມແຜນການ ໃນນີ້, ມອບຫຼຽນໄຊພິລະອາດຫານ ຊັ້ນ I ຈໍານວນ 5 ສະຫາຍ, ຊັ້ນ II ຈໍານວນ 9 ສະຫາຍ ແລະ ມອບຫຼຽນໄຊພິລະອາດຫານ ຊັ້ນ III ຈໍານວນ 17 ສະຫາຍ. ໂອກາດນີ້, ສະຫາຍ ພົນໂທ ສຈ ປອ ທອງລອຍ ສິລິວົງ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາສະຫາຍທີ່ໄດ້ຮັບການຍ້ອງຍໍໃນຄັ້ງນີ້, ພ້ອມທັງໄດ້ຮຽກຮ້ອງໃຫ້ບັນດານັກປະພັນ, ນັກສິລະປິນທັງຫຼາຍ ຈົ່ງພ້ອມກັນເອົາໃຈໃສ່ສ້າງສັນຜົນງານການສະແດງ ໃຫ້ນັບມື້ຫຼາຍຂຶ້ນ, ເນື້ອໃນສີສັນການສະແດງມີຄວາມທັນສະໄໝກ້າວໜ້າ, ນໍາເອົາແນວທາງອັນຖືກຕ້ອງ, ສະຫຼາດສ່ອງໃສຂອງພັກ ແລະ ຊຸກຍູ້ສັນລະເສີນມູນເຊື້ອພິລະອາດຫານຂອງກອງທັບປະຊາຊົນລາວ, ຄວາມສາມັກຄີປອງດອງຂອງປະຊາຊົນບັນດາເຜົ່າ ກໍຄື ການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍຜ່ານເນື້ອຮ້ອງ, ທໍານອງເພງ, ສຽງຂັບລຳ, ສຽງດົນຕີ, ສີສັນການສະແດງ ແລະ ການເຜີຍແຜ່ວັດທະນະທຳອັນດີງາມ ໃຫ້ມີບັນຍາກາດຟົດຟື້ນກວ້າງຂວາງ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ