ໜ່ວຍພັກກົມຈັດຕັ້ງພັກ ດໍາເນີນກອງປະຊຸມໃຫຍ່ສະມາຊິກພັກ ຄັ້ງທີ VII

ກອງປະຊຸມໃຫຍ່ສະມາຊິກພັກ ຄັ້ງທີ VII ຂອງໜ່ວຍພັກກົມຈັດຕັ້ງພັກ ໃນວັນທີ 28 ພະຈິກ 2024 ນີ້, ໂດຍການເປັນປະທານຂອງ ສະຫາຍ ພົນໂທ ສຈ ປອ ທອງລອຍ ສິລິວົງ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີ ບັນດາກົມ, ຫ້ອງການ, ແຂກຖືກເຊີນ, ເລຂາໜ່ວຍພັກ, ຄະນະພັກ ພ້ອມດ້ວຍສະມາຊິກພັກໃນໜ່ວຍເຂົ້າຮ່ວມ.
ສະຫາຍ ພົນຈັດຕະວາ ຈັນທາ ບຸນນະວົງ ເລຂາໜ່ວຍພັກ ຫົວໜ້າກົມຈັດຕັ້ງພັກ ໄດ້ສະຫຼຸບຕີລາຄາຄືນການເຄື່ອນໄຫວຊີ້ນຳ-ນຳພາ ຂອງຄະນະໜ່ວຍພັກຕະຫຼອດໄລຍະ 5 ປີຜ່ານມາ, ເຊິ່ງຄະນະໜ່ວຍພັກ ໄດ້ຖືເອົາການສຶກສາອົບຮົມການເມືອງ-ນໍາພາແນວຄິດ ໃຫ້ພະນັກງານພາຍໃນກົມ ດ້ວຍຫຼາຍຮູບການ, ເຮັດໃຫ້ພະນັກງານ-ສະມາຊິກພັກ ມີແນວຄິດອຸ່ນອຽນ, ເຊື້ອໝັ້ນຕໍ່ອຸດົມການຂອງ ພັກ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ, ລັດ ແລະ ຂອງກອງທັບ, ມີຄວາມຫ້າວຫັນໃນການປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ມີຄວາມເຊື່ອໝັ້ນ ແລະ ຈົ່ງຮັກພັກດີຕໍ່ພັກ, ຕໍ່ປະເທດຊາດ, ມີນໍ້າໃຈເດັດດ່ຽວໜຽວແໜ້ນ, ອົດທົນຜ່ານຜ່າຄວາມຫຍຸ້ງຍາກ, ມີຄວາມສາມັກຄີເປັນປຶກແຜ່ນແໜ້ນໜາຢູ່ພາຍໃນໜ່ວຍພັກ. ດ້ານວຽກງານວິຊາການແມ່ນມີຄວາມຮັບຜິດຊອບສູງຕໍ່ໜ້າທີ່ການເມືອງ ໃນການເປັນເສນາທິການໃຫ້ຄະນະພັກກະຊວງ ປ້ອງກັນປະເທດ, ກົມໃຫຍ່ການເມືອງກອງທັບ, ຄົ້ນຄວ້າບັນດານິຕິກຳ ແລະ ມະຕິຄໍາສັ່ງຂອງຂັ້ນເທິງ, ຫັນເປັນນິຕິກຳຂອງຄະນະພັກກະຊວງປ້ອງກັນປະເທດ, ຂອງກົມໃຫຍ່ການເມືອງກອງທັບ ໃຫ້ສອດຄອງ ກັບສະພາບຈຸດພິເສດຂອງກອງທັບ, ເປັນເຈົ້າການຕິດຕາມເຂົ້າຮ່ວມການສ້າງແຜນກໍານົດພະນັກງານນໍາພາ-ບັນຊາຂອງບັນດາ ອົງການ, ກົມກອງທີ່ຂຶ້ນກັບອົງຄະນະພັກກະຊວງປ້ອງກັນປະເທດຄຸ້ມຄອງ, ກຳແໜ້ນລະບົບການຈັດ ຕັ້ງ ໂດຍເລີ່ມແຕ່ຂັ້ນຮາກຖານພັກ, ຄະນະພັກແຕ່ລະຂັ້ນໃນດ້ານການຈັດຕັ້ງ, ການປະກອບບຸກຄະລາກອນ ໃຫ້ຄົບຕາມຫຼັກການໂຄງປະກອບຂອງການຈັດຕັ້ງພັກ ທັງຮັບປະກັນຄຸນນະພາບ, ມີ ຄວາມສະຫງົບ ແລະ ຈັດກອງປະຊຸມເຜີຍແຜ່ເຊື່ອມຊຶມນິຕິກຳວ່າດ້ວຍການກະກຽມ ແລະ ດໍາເນີນກອງປະຊຸມ ໃຫຍ່ 3 ຂັ້ນ ຂອງພັກ ໃນທົ່ວກອງທັບ. ນອກນີ້, ໜ່ວຍພັກໄດ້ຖືສໍາຄັນການປັບປຸງກໍ່ສ້າງໜ່ວຍພັກຢ່າງເປັນເຈົ້າການ, ເອົາໃຈໃສ່ເປັນພິເສດໃນການກໍ່ສ້າງພັກທາງດ້ານການເມືອງ-ແນວຄິດ, ໃຫ້ຖັນແຖວພະນັກງານ-ສະມາຊິກພັກໄດ້ຮັບການຄົ້ນຄວ້າຮໍ່າຮຽນທິດສະດີມາກ-ເລນິນ, ແນວທາງກົດລະບຽບຂອງພັກຢ່າງເປັນປະຈຳ, ຜ່ານການຈັດຕັ້ງປະຕິບັດເຫັນວ່າ ພະນັກງານ-ສະມາຊິກພັກມີແນວຄິດການເມືອງໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ມີຄວາມສັດຊື່ບໍລິສຸດຕໍ່ພັກ, ຕໍ່ປະເທດຊາດ, ເປັນແບບຢ່າງນໍາໜ້າໃນທຸກຂົງເຂດວຽກງານ, ມີຄວາມອົດທົນຜ່ານຜ່າຄວາມຫຍຸ້ງຍາກ, ມີນໍ້າໃຈເສຍສະຫຼະ ເພື່ອຜົນປະໂຫຍດລວມ. ໜ່ວຍພັກມີສະມາຊິກພັກ ແຂງ 19 ສະຫາຍ, ຍິງ 02 ສະຫາຍ, ໃນ 5 ປີ ຜ່ານມາສາມາດຂະຫຍາຍພັກໄດ້ 3 ສະຫາຍ ແລະ ຖືກຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ 05 ຄັ້ງຕິດຕໍ່ກັນ.
ກອງປະຊຸມຍັງໄດ້ເປັນເອກະພາບປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ໂດຍໄດ້ເລືອກເອົາ ສະຫາຍ ພົນຈັດຕະວາ ຈັນທາ ບຸນນະວົງ ເປັນເລຂາ, ສະຫາຍ ພັນເອກ ໃຈເພັດ ວົງແສນສົມ ເປັນຮອງເລຂາ ແລະ ສະຫາຍ ພັນໂທ ສາກົນໄຊ ກົມມະເມືອງ ເປັນກໍາມະການ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ