ປະກາດການສ້າງຕັ້ງກອງບັນຊາການທະຫານຊາຍແດນ ກອງທັບປະຊາຊົນລາວ

ພິທີປະກາດການສ້າງຕັ້ງກອງບັນຊາການທະຫານຊາຍແດນ ກອງທັບປະຊາຊົນລາວ ໄດ້ຈັດຂຶ້ນໃນວັນທີ 29 ພະຈິກ 2024 ນີ້, ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີຄະນະນໍາຫ້ອງວ່າການສໍານັກງານນາຍົກລັດຖະມົນຕີ, ຄະນະຈັດຕັ້ງສູນກາງພັກ, ບັນດາກະຊວງ, ອົງການ ,ຄະນະນໍາກະຊວງປ້ອງກັນປະເທດ, ບັນດາກົມໃຫຍ່, ຫ້ອງວ່າການກະຊວງ, ແຂກຖືກເຊີນຈາກພາກສ່ວນຕ່າງໆ, ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.
ສະຫາຍ ພັນເອກ ອຸ່ນຄຳ ສີແຫວນວົງສັກ ຮັກສາການຜູ້ບັນຊາການທະຫານຊາຍແດນ ກອງທັບປະຊາຊົນລາວ ໄດ້ລາຍງານຫຍໍ້ ຕົ້ນກໍາເນີດຂອງທະຫານຊາຍແດນ ແລະ ວຽກງານກະກຽມຄວາມພ້ອມດ້ານຕ່າງໆ ເພື່ອປະກາດການສ້າງຕັ້ງກອງບັນຊາການທະຫານຊາຍແດນກອງທັບປະຊາຊົນລາວ. ຈາກນັ້ນ, ສະຫາຍ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບ ໄດ້ຜ່ານດໍາລັດຂອງນາຍົກລັດຖະມົນຕີ ວ່າດ້ວຍການສ້າງຕັ້ງກອງບັນຊາການທະຫານຊາຍແດນ ກອງທັບປະຊາຊົນລາວ ພາຍໃຕ້ການຊີ້ນໍາ-ນໍາພາ ໂດຍກົງຮອບດ້ານຈາກກະຊວງປ້ອງກັນປະເທດ ແລະ ກົມໃຫຍ່ເສນາທິການກອງທັບ, ລະບົບການຈັດຕັ້ງດ້ານວຽກງານການເມືອງແນວຄິດ, ວຽກງານພັກ-ພະນັກງານ ແມ່ນຂຶ້ນກັບກົມໃຫຍ່ການເມືອງກອງທັບ, ດ້ານວຽກງານເຕັກນິກວິຊາສະເພາະ, ວຽກງານປັບປຸງກໍ່ສ້າງກໍາລັງ ຂຶ້ນກັບກົມໃຫຍ່ເສນາທິການກອງທັບ, ດ້ານວຽກງານພະລາທິການ, ງົບປະມານ ແລະ ເງິນເດືອນຂຶ້ນກັບກົມໃຫຍ່ພະລາທິການກອງທັບ ເປັນຫົວໜ່ວຍງົບປະມານເອກະລາດ ແລະ ດ້ານວຽກງານເຕັກນິກ ຂຶ້ນກັບກົມໃຫຍ່ເຕັກນິກກອງທັບ, ມີພາລະບົດບາດໜ້າທີ່ກຽມພ້ອມສູ້ຮົບ ແລະ ເຄື່ອນໄຫວສູ້ຮົບປົກປັກຮັກສາປະເທດຊາດ ເວົ້າລວມ, ເວົ້າສະເພາະ ແມ່ນອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ ກໍຄືເສັ້ນຊາຍແດນແຫ່ງຊາດ, ເປັນກຳລັງຫຼັກແຫຼ່ງ ໃນການເຮັດໜ້າທີ່ປ້ອງກັນຊາຍແດນ ແລະ ວຽກງານການປັບປຸງກໍ່ສ້າງກໍາລັງເຮັດໜ້າທີ່ກຽມພ້ອມສູ້ຮົບ ແລະ ສູ້ຮົບ ກໍຄືການຊ່ວຍເຫຼືອປັບປຸງອໍານາດການປົກຄອງທ້ອງຖິ່ນຕາມການມອບໝາຍຂອງຂັ້ນເທິງ.
ພ້ອມດຽວກັນນີ້, ຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະບັນຊາກອງບັນຊາການທະຫານຊາຍແດນ ປະກອບມີ: ສະຫາຍ ພົນຈັດຕະວາ ສີ ທະວີໄຊ ເປັນຮັກສາການຫົວໜ້າການເມືອງ,ສະຫາຍ ພັນເອກ ອຸ່ນຄຳ ສີແຫວນວົງສັກ ເປັນຮັກສາການຜູ້ບັນຊາການທະຫານຊາຍແດນ,ແຕ່ງຕັ້ງ ສະຫາຍ ພັນເອກ ອໍາພັນ ໄຊຍາສຸບັດ ເປັນຮອງຫົວໜ້າຜູ້ບັນຊາການ ທັງເປັນຫົວໜ້າຫ້ອງເສນາທິການ,ສະຫາຍ ພັນເອກ ດາວໄກ ເລີດລີວັນ ເປັນຮອງຫົວໜ້າການເມືອງ ທັງເປັນຫົວໜ້າຫ້ອງການເມືອງ,ສະຫາຍ ພັນເອກ ສັກສິດ ພິຈິດ ເປັນຮອງຫົວໜ້າກອງບັນຊາການ ທັງເປັນຫົວໜ້າຫ້ອງສືບຂ່າວຊາຍແດນ,ສະຫາຍ ພັນໂທ ພຸດສະດີ ເລືອງວັນໄຊ ເປັນຮອງຫົວໜ້າກອງບັນຊາການ ຮັບຜິດຊອບວຽກງານພະລາ ທັງເປັນຫົວໜ້າຫ້ອງພະລາທິການ,ສະຫາຍ ພັນໂທ ຄໍາປານ ບົວລະບັດ ເປັນຮອງຫົວໜ້າກອງບັນຊາການ ຮັບຜິດຊອບວຽກງານເຕັກນິກທັງເປັນຫົວໜ້າຫ້ອງເຕັກນິກ ພ້ອມນັ້ນຍັງໄດ້ຜ່ານຂໍ້ຕົກລົງແຕ່ງຕັ້ງຄະນະນະຫ້ອງຈໍານວນໜຶ່ງຕືີມອີກ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄໍາເຫັນໂອ້ລົມຫຼາຍບັນຫາສໍາຄັນ ບາງຕອນໄດ້ເນັ້ນໃຫ້ ຄະນະພັກ-ຄະນະບັນຊາກອງບັນຊາທະຫານຊາຍແດນ ກໍາແໜ້ນແນວທາງນະໂຍບາຍຂອງພັກ-ລັດ, ໜ້າທີ່ການເມືອງຂອງກອງທັບ, ພາລະບົດບາດ, ໜ້າທີ່ຄວາມຮັບຜິດຊອບຂອງຕົນ ແລະ ເຄື່ອນໄຫວໃຫ້ຖືກຕ້ອງ, ເພີ່ມທະວີຄວາມສາມັກຄີເປັນເອກະພາບຢູ່ພາຍໃນ, ຕັ້ງໜ້າປັບປຸງກໍ່ສ້າງກົມກອງໃຫ້ໜັກແໜ້ນເຂັ້ມແຂງໃນທຸກດ້ານ, ເອົາໃຈໃສ່ວຽກງານກໍ່ສ້າງພັກ-ກໍ່ສ້າງພະນັກງານ ໃຫ້ຖືກກັບທິດນໍາ ແລະ ຫຼັກການຂອງພັກ, ຕັ້ງໜ້າປະຕິບັດຕາມທິດນໍາເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງຕາມເງື່ອນໄຂ ແລະ ຄວາມສາມາດຂອງກົມກອງ ພ້ອມທັງ ເອົາໃຈໃສ່ປະຕິບັດແນວທາງການຕ່າງປະເທດຂອງພັກ ໂດຍສະເພາະ ເພີ່ມທະວີການພົວພັນຮ່ວມມືກັບບັນດາປະເທດເພື່ອນມິດຍຸດທະສາດ ແລະ ສາກົນ ເພື່ອຍາດແຍ່ງເອົາການສະໜັບສະໜູນ, ບົດຮຽນ ແລະ ປະສົບການຕ່າງໆຕາມການຕົກລົງຂອງຂັ້ນເທິງ ພ້ອມນັ້ນ, ກໍຮຽກຮ້ອງໃຫ້ອໍານາດການປົກຄອງທ້ອງຖິ່ນ, ກົມກອງກໍາລັງຫຼວງ-ກຳລັງທ້ອງຖິ່ນ ຈົ່ງຊ່ວຍເຫຼືອ ແລະ ອໍານວຍຄວາມສະດວກໃຫ້ກອງບັນຊາການທະຫານຊາຍແດນ ໄດ້ພັດທະນາກົມກອງ ໃຫ້ມີຄວາມເຕີບໃຫຍ່ເຂັ້ມແຂງ ແລະ ເຮັດສຳເລັດໜ້າທີ່ ທີ່ຂັ້ນເທິງມອບໝາຍໃຫ້.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ