ເປີດຊ້ອມຮົບປະສານສຽງແຕກ 2 ຂັ້ນຝ່າຍດຽວ ( ຂັ້ນ ກອງພັນ ແລະ ກອງຮ້ອຍ ) “ກໍາປັ້ນເຫຼັກ 05”

ວັນທີ 10 ທັນວາ 2024 ກອງພັນໃຫຍ່ 11 ໄດ້ເປີດຊ້ອມຮົບປະສານສຽງແຕກ 2 ຂັ້ນຝ່າຍດຽວ (ຂັ້ນ ກອງພັນ ແລະ ກອງຮ້ອຍ) “ກໍາປັ້ນເຫຼັກ 05”. ໂດຍການເປັນປະທານ ຂອງສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບ, ມີສະຫາຍ ພັນເອກ ສົມແພງ ແກ້ວສີລາ ຫົວໜ້າການທະຫານ ກອງພັນໃຫຍ່11 ພ້ອມດ້ວຍຄະນະ, ມີບັນດາແຂກຈາກກົມກອງອ້ອມຂ້າງ ແລະ ພະນັກງານ-ນັກຮົບ ເຂົ້າຮ່ວມ.
ສະຫາຍ ພັນໂທ ໂພທະເລ ທຳມະວົງສາ ຮອງຫົວໜ້າພະແນກເສນາທິການ ກອງພັນໃຫຍ່ 11 ໄດ້ຜ່ານແຜນການຊ້ອມຮົບປະສານສຽງແຕກ ເພື່ອເປັນການຕີລາຄາຜົນໄດ້ຮັບ ຂອງການອົບຮົມ-ຫັດແອບ ປະຈຳປີ 2024, ທັງເປັນການກວດກາຄືນຕີລາຄາວຽກງານກຽມພ້ອມສູ້ຮົບຮອບດ້ານ ແລະ ຄວາມອາດສາມາດການສູ້ຮົບຕົວຈິງ ຂອງກຳລັງພົນ, ພາຫະນະ, ອາວຸດ ຍຸດໂທປະກອນ ຕາມການປະກອບຂອງກົມກອງ ແລະ ເປັນການຍົກລະດັບຄວາມຮູ້ຄວາມສາມາດ ແລະ ຄວາມເຂົ້າໃຈ ກ່ຽວກັບວຽກງານເສນາທິການ ແລະ ວຽກງານການເມືອງ, ພະລາທິການ, ເຕັກນິກຮັບໃຊ້ສູ້ຮົບ ໃຫ້ຜູ້ບັນຊາ-ນຳພາ ແລະ ພາກສ່ວນຮັບປະກັນ ພ້ອມທັງ ເຮັດໃຫ້ຜູ້ບັນຊາແຕ່ລະຂັ້ນ, ພະນັກງານ-ນັກຮົບໃນກົມກອງ ໄດ້ເຝິກຝົນຫຼໍ່ຫຼອມຄຸນທາດການເມືອງ, ເຝິກແອບຮ່ຳຮຽນສິລະປະຍຸດ-ຍຸດທະວິທີ, ລະບຽບແບບແຜນ ແລະ ເຝິກຝົນກຳລັງແຮງກາຍ ເປັນກິດຈະກຳປະຈຳວັນ, ຕໍ່ເນື່ອງ ໃນການເຄື່ອນໄຫວຊ້ອມຮົບຄ້າຍຄືກັບເຄື່ອນໄຫວສູ້ຮົບຕົວຈິງຢູ່ເທິງພູມີປະເທດ. ພ້ອມນີ້, ຍັງເປັນການຄົ້ນຄວ້າຕີລາຄາສະພາບການກົນອຸບາຍລ່ຽມລາຍສູ້ຮົບສັດຕູພາຍໃນ ແລະ ກຸ່ມຄົນບໍ່ຫວັງດີພາຍນອກ ເພື່ອກຽມພ້ອມຕີຕອບຕ້ານໃຫ້ທັນເວລາ ແລະ ມີປະສິດທິພາບ.
ໂອກາດນີ້, ສະຫາຍປະທານ ໄດ້ໂອ້ລົມ ຍົກໃຫ້ເຫັນບັນຫາຫຼາຍດ້ານ ພ້ອມທັງ ເນັ້ນໜັກໃຫ້ແຕ່ລະສະຫາຍທີ່ເຂົ້າຮ່ວມບັ້ນຊ້ອມຮົບນີ້ ຕ້ອງຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ພ້ອມທັງເສີມຂະຫຍາຍຫົວຄິດປະດິດສ້າງ, ກ້າຄິດ, ກ້າຕັດສິນໃຈ, ເປັນເຈົ້າການແກ້ທຸກບັນຫາທີ່ເກີດຂຶ້ນໃນການອົບຮົມ-ຫັດແອບ, ກຳແໜ້ນທິດສະດີຫຼັກການທ່າຈັງຫວະ, ບາດກ້າວໃນການຊ້ອມຮົບ, ເພີ່ມທະວີຄວາມຮູ້ ຄວາມສາມາດທາງດ້ານສິລະປະຍຸດ-ຍຸດທະວິທີ ຮູ້ໝູນໃຊ້ເຂົ້າກັບພາກທິດສະດີໃນພູມີປະເທດ ແລະ ເງື່ອນໄຂສະພາບຕົວຈິງ ເພື່ອບັນລຸໃຫ້ໄດ້ຕາມລະດັບຄາດໝາຍທີ່ຂັ້ນເທິງວາງອອກ ພ້ອມທັງຮັບປະກັນໃຫ້ມີຄວາມປອດໄພ 100%.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ