ມອບ-ຮັບ ລົດໄຟຟ້າຂົນສົ່ງຄົນເຈັບ

ວັນທີ 12 ທັນວາ 2024 ນີ້, ຢູ່ທີ່ໂຮງໝໍສູນກາງ 103 ກອງທັບປະຊາຊົນລາວ ໄດ້ມີການ ມອບ-ຮັບ ລົດໄຟຟ້າຂົນສົ່ງຄົນເຈັບ ຈໍານວນ 1 ຄັນ. ມອບໂດຍ ສະຫາຍ ພົນຈັດຕະວາ ຮສ ປອ ດຣ ຫງວຽນວັນນາມ ຮອງຫົວໜ້າການເມືອງ ວິທະຍາຄານການແພດ ກອງທັບປະຊາຊົນຫວຽດນາມ ແລະ ຮັບໂດຍ ສະຫາຍ ພົນຈັດຕະວາ ຮສ ປອ ດຣ ສະແຫວງໄຊ ດາລາສາດ ຫົວໜ້າການທະຫານ ໂຮງໝໍສູນກາງ 103 ກອງທັບ ໂດຍມີພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມ ເປັນສັກຂີພະຍານ.
ເນື່ອງໃນໂອກາດກະກຽມສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ, ວິທະຍາຄານການແພດ ກອງທັບປະຊາຊົນຫວຽດນາມ ໄດ້ນໍາເອົາລົດໄຟຟ້າຂົນສົ່ງຄົນເຈັບ ມາມອບໃຫ້ໂຮງໝໍສູນກາງ 103 ກອງທັບປະຊາຊົນລາວ ເພື່ອນໍາໃຊ້ຂົນສົ່ງ, ຍົກຍ້າຍຄົນເຈັບພາຍໃນໂຮງໝໍໃຫ້ມີຄວາມສະດວກສະບາຍ ເພື່ອປະກອບສ່ວນຈັດຕັ້ງວຽກງານ 5 ດີ 1 ພໍໃຈ ໃຫ້ປະສົບຜົນສໍາເລັດຕາມເປົ້າໝາຍ ທີ່ໂຮງໝໍ ແລະ ກະຊວງສາທາລະນະສຸກວາງໄວ້. ສະຫາຍ ພົນຈັດຕະວາ ຮສ ປອ ດຣ ສະແຫວງໄຊ ດາລາສາດ ໄດ້ສະແດງຄວາມຂອບໃຈຢ່າງສູງ ຕໍ່ການຊ່ວຍເຫຼືອ ຂອງວິທະຍາຄານການແພດ ກອງທັບປະຊາຊົນຫວຽດນາມໃນຄັ້ງນີ້ ແລະ ໃຫ້ຄໍາໝັ້ນສັນຍາວ່າ ຈະນໍາໃຊ້ລົດດັ່ງກ່າວເຂົ້າໃນການບໍລິການດ້ານວຽກງານການແພດຢູ່ພາຍໃນໂຮງໝໍໃຫ້ມີປະສິດທິພາບ ແລະ ປະສິດທິຜົນສູງສຸດ ໂດຍບໍ່ໄດ້ເກັບຄ່ານໍາໃຊ້ແຕ່ປະການໃດ ຕໍ່ຜູ້ບາດເຈັບ ແລະ ເຈັບປ່ວຍທີ່ເຂົ້າມາຮັບການປິ່ນປົວ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ