ຊາວໜຸ່ມ ກົມໃຫຍ່ການເມືອງກອງທັບ ຢ້ຽມຊົມ ອະນຸສອນສະຖານ ປະທານ ໄກສອນ ພົມວິຫານ

ວັນທີ 17 ທັນວາ 2024 ນີ້, ສະຫາຍ ຮ້ອຍເອກ ເກີນ ສຸກຕະພັນ ຊ່ວຍວຽກພະແນກຊາວໜຸ່ມ ກົມໃຫຍ່ການເມືອງກອງທັບ ໄດ້ນໍາພາສະມາຊິກຊາວໜຸ່ມ ທົ່ວກົມໃຫຍ່ການເມືອງກອງທັບ ເຂົ້າຢ້ຽມຊົມ ອະນຸສອນສະຖານ ປະທານ ໄກສອນ ພົມວິຫານ ເນື່ອງໃນໂອກາດ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ແລະ ວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ.
ໂອກາດນີ້, ໄດ້ຮັບຟັງການບັນຍາຍເຖິງເຫດການ, ເລື່ອງລາວຕ່າງໆ ຂອງປະທານ ໄກສອນ ພົມວິຫານ ແຕ່ລະພາກ, ແຕ່ລະຂັ້ນຕອນ ທີ່ມີເນື້ອໃນເລິກເຊິ່ງ, ຄົບຖ້ວນ, ຊີ້ໃຫ້ເຫັນເຖິງນໍ້າໃຈຮັກຊາດ ອັນສູງສົ່ງ, ຄຸນສົມບັດສິນທຳປະຕິວັດຫຼາຍດ້ານ ຂອງປະທານ ໄກສອນ ພົມວິຫານ. ທັງນີ້, ເພື່ອເຮັດໃຫ້ສະມາຊິກຊາວໜຸ່ມ ທົ່ວກົມໃຫຍ່ການເມືອງກອງທັບ ໄດ້ຮຽນຮູ້ກ່ຽວກັບປະຫວັດການເຄື່ອນໄຫວປະຕິວັດຂອງປະທານ ໄກສອນ ພົມວິຫານ ໃນເມື່ອກ່ອນໃຫ້ເລິກເຊິ່ງ ເພາະວ່າປະທານ ໄກສອນ ພົມວິຫານ ແມ່ນໜຶ່ງໃນຜູ້ນໍາ ຂອງການປະຕິວັດທີ່ດີເດັ່ນ, ເປັນວີລະບູລຸດຂອງຊາດລາວ ແລະ ເປັນຜູ້ນໍາພາກໍ່ຕັ້ງ ກອງທັບລາວອິດສະຫຼະໃນເມື່ອກ່ອນ ເຊິ່ງແມ່ນຕົ້ນກຳເນີດ ຂອງກອງທັບປະຊາຊົນລາວ ໃນປັດຈຸບັນ, ທັງເປັນການສຶກສາອົບຮົມໃຫ້ສະມາຊິກຊາວໜຸ່ມ ເຫັນໄດ້ຄຸນສົມບັດສິນທຳປະຕິວັດອັນໂດດເດັ່ນ ຂອງປະທານ ໄກສອນ ພົມວິຫານ ເພື່ອເປັນບ່ອນອີງໃຫ້ແກ່ການເຝິກຝົນຫຼໍ່ຫຼອມຕົນເອງ ໃນຂະບວນການວຽກງານຕົວຈິງ ໃຫ້ກາຍເປັນຊາວໜຸ່ມທີ່ດີເດັ່ນຂອງກົມກອງ, ຂອງກອງທັບ ແລະ ຂອງຊາດ ພ້ອມທັງເປັນກຳລັງແຮງຕົ້ນຕໍ ໃນການປັບປຸງພັດທະນາກົມກອງ ໃຫ້ນັບມື້ເຂັ້ມແຂງ, ໜັກແໜ້ນ ແລະ ມີ ແບບແຜນທັນສະໄໝ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ