ກົມໃຫຍ່ການເມືອງກອງທັບ ປິດບັ້ນອົບຮົມ-ຫັດແອບ ປະຈຳປີ 2024

ວັນທີ 18 ທັນວາ 2024 ນີ້, ກົມໃຫຍ່ການເມືອງກອງທັບ ໄດ້ປິດບັ້ນອົບຮົມ-ຫັດແອບ ວຽກງານການທະຫານ, ປັບປຸງລະບຽບແບບແຜນ, ເຝິກຝົນກຳລັງແຮງກາຍ ແລະ ພາກປະຕິບັດຍິງເປົ້າໝາຍດ້ວຍລູກປືນແທ້ ປະຈຳປີ 2024 ໂດຍການເປັນປະທານ ຂອງສະຫາຍ ພັນເອກ ໄມທອນ ແກ້ວລໍວັນເຮືອງ ຫົວໜ້າຫ້ອງການບໍລິຫານ ກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາບັນດາກົມ, ຫ້ອງການ, ກອງ, ສູນເສຍອົງຄະ ແລະ ພະນັກງານ-ນັກຮົບ ເຂົ້າຮ່ວມ.
ສະຫາຍ ພັັນໂທ ສຸກສົມບັດ ລັດຖະຈັກ ຮອງຫົວໜ້າຫ້ອງການບໍລິຫານ ກົມໃຫຍ່ການເມືອງກອງທັບ ໄດ້ສະຫຼຸບຜົນການຈັດຕັ້ງອົບຮົມ-ຫັດແອບ ວຽກງານການທະຫານ ປະຈຳປີ 2024 ຕະຫຼອດໄລຍະການອົບຮົມ-ຫັດແອບ ຄະນະຮັບຜິດຊອບ ໄດ້ເອົາໃຈໃສ່ຍົກສູງຄວາມຮັບຜິດຊອບໃນດ້ານຕ່າງໆ ແລະ ຄູ-ອາຈານ ໄດ້ເອົາໃຈໃສ່ໃນການສິດສອນ ເຮັດໃຫ້ບັ້ນອົບຮົມຄັ້ງນີ້ ດຳເນີນໄປຕາມແຜນການທີ່ໄດ້ກຳນົດໄວ້. ຜ່ານການອົບຮົມ-ຫັດແອບ ທັງພາກທິດສະດີຫຼັກການ ແລະ ພາກປະຕິບັດຕົວຈິງ ສາມາດສະຫຼຸບໄດ້ດັ່ງນີ້: ພາກທິດສະດີ ເທົ່າກັບ 85%, ພາກລະບຽບແບບແຜນ ເທົ່າກັບ 92%, ການນຸ່ງຖືເປັນລະບຽບຮຽບຮ້ອຍດີ ເທົ່າກັບ 98%, ຜົນການຍິງເປົ້າໝາຍດ້ວຍລູກປືນແທ້ ປືນ AK ປະເພດເກັ່ງ 289 ສະຫາຍ, ປະເພດດີ 499 ສະຫາຍ, ຄາດໝາຍ 533 ສະຫາຍ ແລະ ປືນ K59 ຂັ້ນນາຍພັນຂຶ້ນໄປ ປະເພດເກັ່ງ 55 ສະຫາຍ, ປະເພດດີ 191 ສະຫາຍ, ຄາດໝາຍ 253 ສະຫາຍ.
ໂອກາດນີ້, ສະຫາຍ ພັນເອກ ໄມທອນ ແກ້ວລໍວັນເຮືອງ ໄດ້ເນັ້ນໜັກໃຫ້ນັກເຝິກອົບຮົມ ທີ່ສຳເລັດບັ້ນອົບຮົມຄັ້ງນີ້, ສືບຕໍ່ຮ່ຳຮຽນແນວທາງປ້ອງກັນຊາດ, ຕັ້ງໜ້າເຝິກຝົນຫຼໍ່ຫຼອມຕົນເອງ ໃຫ້ມີຄວາມຮູ້ຄວາມສາມາດສູງຂຶ້ນ, ເສີມຂະຫຍາຍມູນເຊື້ອທາດແທ້ກອງທັບປະຕິວັດ, ເອົາໃຈໃສ່ປະຕິບັດລະບຽບວິໄນ ຂອງກອງທັບຢ່າງເຂັ້ມງວດ ແລະ ນຳເອົາບົດຮຽນທີ່ໄດ້ຮັບ ໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງໃຫ້ມີບາດກ້າວທີ່ດີຂຶ້ນ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ