ປະກາດການແຕ່ງຕັ້ງຂັ້ນບັນຊາ ຂອງບັນດາກົມຂຶ້ນກັບກົມໃຫຍ່ການເມືອງກອງທັບ

ພິທີປະກາດການແຕ່ງຕັ້ງຂັ້ນບັນຊາ ຂອງບັນດາກົມຂຶ້ນກັບກົມໃຫຍ່ການເມືອງກອງທັບ ໄດ້ຈັດຂຶ້ນໃນວັນທີ 18 ທັນວາ 2024 ນີ້, ໂດຍການເປັນປະທານ ຂອງສະຫາຍ ພົນຕີ ສອນທອງ ພົມລາວົງ ກໍາມະການຄະນະປະຈໍາພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາ ບັນດາອົງການ, ກົມ, ກອງ ທີ່ຂຶ້ນກັບກົມໃຫຍ່ການເມືອງກອງທັບ ພ້ອມດ້ວຍບັນດາສະຫາຍທີ່ໄດ້ຮັບໜ້າທີ່ໃໝ່ເຂົ້າຮ່ວມ.
ສະຫາຍ ພັນເອກ ວົງເພັດ ວົງສາຫວັນ ຮອງຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການແຕ່ງຕັ້ງຫົວໜ້າກົມພະນັກງານ, ຂໍ້ຕົກລົງ ວ່າດ້ວຍການແຕ່ງຕັ້ງຫົວໜ້າກົມປະກັນສັງຄົມ, ຂໍ້ຕົກລົງ ວ່າດ້ວຍການແຕ່ງຕັ້ງຫົວໜ້າກົມກວດກາ ກະຊວງປ້ອງກັນປະເທດ, ຂໍ້ຕົກລົງ ວ່າດ້ວຍການແຕ່ງຕັ້ງຄະນະຫ້ອງການເມືອງ ກົມໃຫຍ່ການເມືອງກອງທັບ ໃນນີ້, ກະຊວງປ້ອງກັນປະເທດ ຕົກລົງ ແຕ່ງຕັ້ງ ສະຫາຍ ພັນເອກ ສອນໄຊ ຈັນຍາລາດ ເປັນຫົວໜ້າກົມພະນັກງານ, ແຕ່ງຕັ້ງ ສະຫາຍ ພັນເອກ ແພງສີ ເສັງວິໄຊ ເປັນຫົວໜ້າກົມກວດກາກະຊວງປ້ອງກັນປະເທດ, ແຕ່ງຕັ້ງ ສະຫາຍ ພັນເອກ ໄຊຍະແສງ ໄມມະນີ ເປັນຫົວໜ້າກົມປະກັນສັງຄົມ, ແຕ່ງຕັ້ງ ສະຫາຍ ພັນເອກ ອໍາພອນ ສຸກວິໄຊ ເປັນຫົວໜ້າຫ້ອງການເມືອງ ແລະ ຜ່ານຂໍ້ຕົກລົງຂອງກົມໃຫຍ່ການເມືອງກອງທັບ ວ່າດ້ວຍການແຕ່ງຕັ້ງຮອງຫົວໜ້າພະແນກຄຸ້ມຄອງກອງທຶນ ຂຶ້ນກັບກົມປະກັນສັງຄົມ ກົມໃຫຍ່ການເມືອງກອງທັບ ໃນນີ້, ແຕ່ງຕັ້ງ ສະຫາຍ ພັນຕີ ທັດສະພອນ ລຸດຈະດາ ເປັນຮອງຫົວໜ້າພະແນກຄຸ້ມຄອງກອງທຶນ ກົມປະກັນສັງຄົມ.
ໂອກາດນີ້, ສະຫາຍ ພົນຕີ ສອນທອງ ພົມລາວົງ ໄດ້ມີຄໍາເຫັນໂອ້ລົມ ສະແດງຄວາມຍ້ອງຍໍຊົມເຊີຍ ຕໍ່ບັນດາສະຫາຍທີ່ໄດ້ຮັບໜ້າທີ່ໃໝ່ ພ້ອມທັງເນັ້ນໜັກບາງບັນຫາທີ່ສໍາຄັນໃຫ້ສືບຕໍ່ເອົາໃຈໃສ່ ເພື່ອເຝິກຝົນຕົນເອງຮອບດ້ານ ໂດຍສະເພາະດ້ານຄຸນທາດການເມືອງ, ມີຄຸນສົມບັດສິນທໍາປະຕິວັດ, ຍົກສູງຄວາມຮັບຜິດຊອບການເມືອງໃຫ້ສູງຂຶ້ນ ພ້ອມນັ້ນ, ກໍຕັ້ງໜ້າຮ່ຳຮຽນວິຊາສະເພາະ, ຮໍ່າຮຽນທິດສະດີການເມືອງ ທັງມີແບບແຜນວິທີເຮັດວຽກຕາມຫຼັກການລວມສູນປະຊາທິປະໄຕ, ເອົາໃຈໃສ່ເຮັດວຽກງານກໍ່ສ້າງພັກ-ພະນັກງານໃຫ້ຖືກຕາມທິດນໍາ ແລະ ຫຼັກການຂອງພັກ, ມີຄວາມສາມັກສາມັກຄີເປັນປຶກແຜ່ນ ແລະ ພ້ອມກັນເຮັດສໍາເລັດໜ້າທີ່ການຈັດຕັ້ງຂັ້ນເທິງມອບໝາຍໃຫ້.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ