ເປີດຊຸດເຝິກອົບຮົມວຽກງານກວດກູ້-ທໍາລາຍລະເບີດ ໃຫ້ນາຍ ແລະ ພົນທະຫານ ກອງທັບປະຊາຊົນລາວ

ວັນທີ 18 ທັນວາ 2024 ນີ້, ຢູ່ທີ່ສະໂມສອນ ກອງບັນຊາການທະຫານເມືອງວຽງໄຊ ແຂວງຫົວພັນ ໄດ້ເປີດຊຸດເຝິກອົບຮົມວຽກງານກວດກູ້-ທໍາລາຍລະເບີດ ໃຫ້ນາຍ ແລະ ພົນທະຫານ ກອງທັບປະຊາຊົນລາວ ໂດຍການເປັນປະທານຮ່ວມ ຂອງສະຫາຍ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບ, ຮອງຄະນະຊີ້ນໍາລວມ ການຮ່ວມມືແກ້ໄຂ ລະເບີດບໍ່ທັນແຕກ ລາວ-ຣັດເຊຍ ແລະ ສະຫາຍ ພັນເອກ ລີຄາເຊັບ ອັນເດຣ ເປຣໂຕ ວິດ ທູດປ້ອງກັນຊາດ ສ ຣັດເຊຍ ປະຈຳ ສປປ ລາວ, ມີຄະນະຮັບຜິດຊອບວຽກງານເຝິກອົບຮົມ, ຄູ-ອາຈານ ແລະ ນັກເຝິກອົບຮົມ ເຂົ້າຮ່ວມ.
ສະຫາຍ ພັນເອກ ບຸນສົດ ອິນສີນາ ຮອງຫົວໜ້າກົມຊ່າງແສງ ກົມໃຫຍ່ເສນາທິການການທັບ, ຫົວໜ້າຮັບຜິດຊອບຊຸດເຝິກອົບຮົມ ໄດ້ຜ່ານແຜນການເຝິກອົບຮົມວຽກງານກວດກູ້-ທໍາລາຍລະເບີດ, ຈຸດປະສົງເພື່ອສືບຕໍ່ຜັນຂະຫຍາຍແຜນການພົວພັນຮ່ວມມື ລະຫວ່າງ ສອງກະຊວງປ້ອງກັນປະເທດ ລາວ-ຣັດເຊຍ, ເພື່ອຍົກລະດັບທາງດ້ານວຽກງານແກ້ໄຂ ລະເບີດ, ມິນ ທີ່ບໍ່ທັນແຕກທີ່ຕົກຄ້າງໃຫ້ກຳລັງຂອງເຫຼົ່າຮົບຊ່າງແສງ ກຳແໜ້ນຫຼັກການວິຊາສະເພາະ ແລະ ມີຄວາມສາມາດປະຕິບັດຕົວຈິງຢູ່ພາກສະໜາມ, ເພື່ອເປັນການຍົກລະດັບວິຊາການກວດກູ້ ແລະ ທຳລາຍລະເບີດ ໃຫ້ແກ່ກຳລັງ ຂອງເຫຼົ່າຮົບຊ່າງແສງ ຈາກຂັ້ນ 1 (ນັກກວດກູ້) ຂຶ້ນສູ່ລະດັບ 2 ( ຫົວໜ້າທີມ) ແລະ ເປັນການຍາດແຍ່ງເອົາບົດຮຽນ ແລະ ປະສົບການຈາກຊ່ຽວຊານ, ຄູເຝິກດ້ານການກວດກູ້ ແລະ ທຳລາຍ ລະເບີດບໍ່ທັນແຕກ ດ້ານມະນຸດສະທຳ ຂອງກອງກວດກູ້ມິນສາກົນ ແຫ່ງ ສ ຣັດເຊຍ ມາຈັດຕັ້ງປະຕິບັດຜັນຂະຫຍາຍຢູ່ໃນເຫຼົ່າຮົບຊ່າງແສງ ກໍຄືກະຊວງປ້ອງກັນປະເທດ ສ ປປ ລາວ, ເນື້ອໃນທີ່ນໍາເຝິກອົບຮົມໃນຄັ້ງນີ້ປະກອບມີ: ຄວາມຮູ້ກ່ຽວກັບທາດລະເບີດ, ວັດຖຸລະເບີດ ແລະ ການຈໍາແນກປະເພດທາດລະເບີດ, ວຽກງານຕັດຕໍ່ຫໍ່ຈຸດ, ນຸແຊ, ແກັບ, ສາຍຂະນວນ TNT ແລະ C4, ວິທີຈັດວາງແປງລະເບີດ ແລະ ວົງຈອນໄຟຟ້າໃນການລະເບີດ, ອຸປະກອນຄົ້ນຫາວັດຖຸ, ລະເບີດ ແຕ່ລະຊະນິດ ຈຳນວນ 7 ເຄື່ອງ, ການທໍາລາຍສໍາພາວຸດທີ່ຍັງຕົກຄ້າງ ຫຼື ວັດຖຸທີ່ເປັນອັນຕະລາຍ, ການນໍາໃຊ້ ຈັກຈຸດ ແລະ ເຄື່ອງວັດແທກຄວາມຕ້ານຂອງສາຍໄຟ, ວິທີຄິດໄລ່ດ້ວຍສູດ ເພື່ອທໍາລາຍໄມ້, ແຜ່ນເຫຼັກ, ທໍ່ເຫຼັກ, ເຫຼັກເສັ້ນ ແລະ ສາຍກາບ, ວຽກງານການຄຸ້ມຄອງ ແລະ ຫຼັກການ ເຮັດວຽກກ່ຽວກັບກວດ-ກູ້ລະເບີດດ້ານມະນຸດສະທຳ ແລະ ຄວາມຮູ້ພື້ນຖານ ກ່ຽວກັບສໍາພາວຸດ ເປັນຕົ້ນແມ່ນ ມິນຕ້ານທະຫານຮາບ, ມິນຕ້ານລົດຕັງ, ມິນຊ້ອນ, ລູກປືນໃຫຍ່, ລູກຈະຫຼວດຕໍ່ຕ້ານລົດຕັງ ແລະ ບົມ ທີ່ຖີ້ມຈາກທາງອາກາດ, ມີນັກເຝິກອົບຮົມເຂົ້າຮ່ວມ 26 ສະຫາຍ ທີ່ຄັດເລືອກມາຈາກກອງພັນ 579 ເຊິ່ງຈະໃຊ້ເວລາເຝິກອົບຮົມທັງພາກທິດສະດີ ແລະ ພາກປະຕິບັດໂຕຈິງ 3 ເດືອນ ຈຶ່ງຈະສໍາເລັດ.
ໂອກາດນີ້, ສະຫາຍ ພົນຕີ ສົມພອນ ມິດຕະພອນ ໄດ້ໂອ້ລົມ ແລະ ເນັ້ນໜັກໃຫ້ນັກເຝິກອົບຮົບແຕ່ລະສະຫາຍ ຕ້ອງເອົາໃຈໃສ່ສຶກສາຄົ້ນຄວ້າ ແລະ ຍາດແຍ່ງເອົາບົດຮຽນຈາກຊ່ຽວຊານ, ຄູເຝິກ ທັງພາກທິດສະດີ ແລະ ພາກປະຕິບັດຕົວຈິງ ເພື່ອນຳໄປໝູນໃຊ້ຈັດຕັ້ງປະຕິບັດຜັນຂະຫຍາຍເຂົ້າໃນໜ້າທີ່ວຽກງານ ຂອງເຫຼົ່າຮົບຊ່າງແສງໃຫ້ໄດ້ຮັບຜົນດີ ພ້ອມກັນນັ້ນ, ກໍຕ້ອງເອົາໃຈໃສ່ປະຕິບັດຕາມໂມງເວລາໃນການຂຶ້ນຫ້ອງຮໍ່າຮຽນ ແລະ ບັນດາຂໍ້ກຳນົດ, ກົດລະບຽບກອງທັບວາງອອກຢ່າງເຂັ້ມງວດ.
ຈາກນັ້ນ, ສະຫາຍປະທານ ພ້ອມດ້ວຍຄະນະ ໄດ້ຢ້ຽມຊົມເຄື່ອງມືກວດກູ້ລະເບີດ ແລະ ສະໜາມກວດກູ້ຈໍາລອງ ອີກດ້ວຍ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ