ຫົວໜ້າກົມໃຫຍ່ການເມືອງກອງທັບ ອວຍພອນ ຫ້ອງການທີ່ປຶກສາທູດປ້ອງກັນຊາດ ສສ ຫວຽດນາມ ປະຈຳ ສປປ ລາວ

ວັນທີ 20 ທັນວາ 2024 ນີ້, ສະຫາຍ ພົນຕີ ວົງສອນ ອິນປານພິມ ຫົວໜ້າກົມໃຫຍ່ການເມືອງກອງທັບ ພ້ອມດ້ວຍຄະນະ ໄດ້ເຂົ້າອວຍພອນ ສະຫາຍ ພັນເອກ ຫງວຽນ ແມ້ງເກືອງ ຮອງຫົວໜ້າຫ້ອງການ ທີ່ປຶກສາທູດປ້ອງກັນຊາດ ສສ ຫວຽດນາມ ປະຈຳ ສປປ ລາວ ພ້ອມດ້ວຍຄະນະ ເນື່ອງໃນໂອກາດວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ (22 ທັນວາ 1944-22 ທັນວາ 2024) ແລະ ວັນສົ່ງທ້າຍປີເກົ່າຕ້ອນຮັບປີໃໝ່ສາກົນ ທີ່ຈະມາເຖິງນີ້.
ໂອກາດນີ້, ສະຫາຍ ພົນຕີ ວົງສອນ ອິນປານພິມ ໄດ້ຕາງໜ້າໃຫ້ຄະນະນໍາກົມໃຫຍ່ການເມືອງກອງທັບ ກໍຄືນາຍ ແລະ ພົນທະຫານ ໃນທົ່ວກົມໃຫຍ່ການເມືອງກອງທັບ ກ່າວຄໍາອວຍພອນໄຊອັນປະເສີດ ທີ່ເຕັມໄປດ້ວຍໄມຕີຈິດມິດຕະພາບ ມາຍັງ ຮອງຫົວໜ້າຫ້ອງການທີ່ປຶກສາທູດປ້ອງກັນຊາດ ສສ ຫວຽດນາມ ປະຈຳ ສປປ ລາວ ກໍຄື ພະນັກງານ-ນັກຮົບ ທົ່ວກອງທັບປະຊາຊົນຫວຽດນາມ ຈົ່ງປະສົບຜົນສຳເລັດໃນທຸກໜ້າທີ່ວຽກງານ, ສືບຕໍ່ປັບປຸງກໍ່ສ້າງກອງທັບ ໃຫ້ກາຍເປັນກອງທັບທີ່ເຂັ້ມແຂງ ທັນສະໄໝ, ພ້ອມທັງ ອວຍພອນໃຫ້ສາຍພົວພັນມິດຕະພາບ, ຄວາມສາມັກຄີແບບພິເສດ ທີ່ມີມູນເຊື້ອມາແຕ່ດົນນານ ລະຫວ່າງ ສອງພັກ, ສອງຊາດ, ສອງກອງທັບ ລາວ-ຫວຽດນາມ, ຫວຽດນາມ-ລາວ ໃຫ້ແໜ້ນແຟ້ນຍິ່ງໆຂຶ້ນ.
ໂອກາດນີ້, ສະຫາຍ ພັນເອກ ຫງວຽນ ແມ້ງເກືອງ ໄດ້ສະແດງຄວາມຂອບໃຈ ຕໍ່ສະຫາຍ ພົນຕີ ວົງສອນ ອິນປານພິມ ພ້ອມດ້ວຍຄະນະ ທີ່ໄດ້ນໍາເອົາຄໍາອວຍພອນອັນຈົບງາມ ແລະ ເຕັມໄປດ້ວຍໄມຕີຈິດມິດຕະພາບ ມາມອບໃຫ້ໃນຄັ້ງນີ້, ພ້ອມທັງ ອວຍພອນຄືນໃຫ້ ສະຫາຍ ຫົວໜ້າກົມໃຫຍ່ການເມືອງກອງທັບ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ເຮັດສຳເລັດໜ້າທີ່ວຽກງານອັນມີກຽດ, ສືບຕໍ່ເສີມຂະຫຍາຍນ້ຳໃຈໄມຕິຈິດມິດຕະພາບ, ຄວາມສາມັກຄີແບບພິເສດ ລະຫວ່າງ ສອງພັກ, ສອງຊາດ, ສອງກອງທັບ ຫວຽດນາມ-ລາວ, ລາວ-ຫວຽດນາມ ໃຫ້ແຕກດອກອອກຜົນຕະຫຼອດໄປ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ