ສະຫຼຸບຖອດຖອນບົດຮຽນ ວຽກງານການເຄື່ອນໄຫວ ເຮັດໃຫ້ສະພາບມີຄວາມສະຫງົບຢູ່ ແຂວງໄຊຍະບູລີ

ກອງປະຊຸມສະຫຼຸບຖອດຖອນບົດຮຽນວຽກງານການເຄື່ອນໄຫວ ເຮັດໃຫ້ສະພາບມີຄວາມສະຫງົບຢູ່ແຂວງໄຊຍະບູລີ ໄດ້ຈັດຂຶ້ນໃນວັນທີ 23 ທັນວາ 2024 ນີ້, ໂດຍການເປັນປະທານຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ, ມີທ່ານ ພົງສະຫວັນ ສິດທະວົງ ກຳມະການສູນກາງພັກ, ເຈົ້າແຂວງໄຊຍະບູລີ, ມີຜູ້ຕ່າງໜ້າບັນດາກົມທີ່ກ່ຽວຂ້ອງກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ການນຳຂອງແຂວງ, ມີຄະນະພັກ-ຄະນະບັນຊາ ກອງບັນຊາການທະຫານແຂວງ, ກອງບັນຊາການ ປກສ ແຂວງ, ກອງພົນທີ 2, ກອງພັກໃຫຍ່ 301, ບັນດາເຈົ້າເມືອງ ແລະ ນາຍທະຫານທີ່ກ່ຽວຂ້ອງເຂົ້າຮ່ວມ.
ສະຫາຍ ພັນເອກ ຄຳຊາວ ລິນທະກຸນແກ້ວ ຮອງຫົວໜ້າກົມສູ້ຮົບ ກົມໃຫຍ່ເສນາທິການກອງທັບໄດ້ ຜ່ານບົດສະຫຼຸບການເຄື່ອນໄຫວວຽກງານເຮັດໃຫ້ສະພາບມີຄວາມສະຫງົບຢູ່ແຂວງໄຊຍະບູ ໂດຍສະເພາະໄດ້ຈັດຕັ້ງກຳລັງລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ສຶກສາອົບຮົມການເມືອງນໍາພາແນວຄິດເຮັດໃຫ້ປະຊາຊົນມີຄວາມຕືນຕົວຈັດຕັ້ງປະຕິບັດແນວທາງນະໂຍ ບາຍຂອງພັກ, ກົດໝາຍຂອງລັດ, ຕັ້ງໜ້າປົກປັກຮັກສາ ແລະ ສ້າງສາພັດທະນາປະເທດຊາດ, ອັນພົ້ນເດັ່ນໄລຍະຜ່ານມາທັງສອງກຳລັງໄດ້ປະສານສົມທົບແລກປ່ຽນຂໍ້ມູນຂ່າວສານວິຊາສະເພາະ, ສົມທົບກັບອຳນາດການປົກຄອງທ້ອງຖິ່ນ ພ້ອມກັນແກ້ໄຂບັນຫາປະກົດການຫຍໍ້ທໍ້ຕ່າງໆເຊັ່ນ: ການຄ້າຂາຍເຖື່ອນ, ບັນຫາຢາເສບຕິດ, ສາດສະໜາ, ການນຳເຂົ້າພາຫະນະທີ່ບໍ່ຖືກຕ້ອງ, ການລັກລອບຕັດໄມ້ທຳລາຍປ່າຊະຊາຍ, ການເກີດອຸປະຕິເຫດຕາມທອງຖະໜົນ, ການຂີ້ລັກງັດແງະ, ການມີອາວຸດເສິກໄວ້ໃນຄອບຄອງ, ອາວຸດລ່າເນື້ອ, ການເຂົ້າ-ອອກເມືອງຜ່ານຊາຍແດນແບບຜິດລະບຽບກົດໝາຍ ແລະ ບັນຫາອື່ນໆ.
ໂອກາດນີ້, ຜູ້ແທນກອງປະຊຸມຍັງໄດ້ພ້ອມກັນປະກອບຄຳຄິດເຫັນແລກປ່ຽນບົດຮຽນໝາກຜົນ ໃນການຈັດຕັ້ງປະຕິບັດວຽກງານການ ເຄື່ອນໄຫວຂອບເຂດຄວາມຮັບຜິດຊອບຂອງຕົນເພື່ອຄົ້ນຄວ້າເອກະພາບກັນ ນໍາໄປຈັດຕັ້ງປະຕິບັດວຽກງານຈຸດສຸມໃນຕໍ່ໜ້າໃຫ້ໄດ້ຮັບໝາກຜົນສູງ.
ສະຫາຍ ພົນໂທ ຄຳລຽງ ອຸທະໄກສອນ ໄດ້ຍ້ອງຍໍຊົມເຊີຍແຕ່ລະກົມກອງທີ່ເຮັດສໍາເລັດໜ້າທີການເມືອງຂອງຕົນ. ພ້ອມທັງ, ເນັ້ນໝັກໃຫ້ຄະນະພັກ-ຄະນະບັນຊາ, ຄະນະກຳມະການ ປກຊ-ປກສ ແຕ່ລະຂັ້ນເອົາໃຈໃສ່ເຮັດ ວຽກງານວິຊາສະເພາະສືບຂ່າວ, ເພື່ອກຳແໜ້ນສະພາບກົນອຸບາຍຍຸດທະສາດ ແລະ ແຜນການເຄື່ອນໄຫວຂອງກຳລັງອິດທິປໍລະປັກ ແລະ ກຸ່ມຄົນບໍ່ຫວັງດີ ພິເສດຢູ່ເຂດຫຼໍ່ແຫຼມ, ກຳແໜ້ນສະພາບຢູ່ຮາກຖານປະຊາຊົນ, ສະກັດກັ້ນບໍ່ໃຫ້ກຸ່ມຄົນບໍ່ຫວັງດີໂຄສະນາ ຍຸແຍ່ແກ່ດຶງປະຊາຊົນ, ໄປພ້ອມກັບການໂຄສະນາສຶກສາອົບຮົມປະຊາຊົນບັນດາເຜົ່າໃຫ້ຮັບຮູ້ເຊື່ອມຊຶມຕໍ່ ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ສົມທົບແໜ້ນກັບບັນດາວຽກງານຕ່າງໆ ເພື່ອຮັບປະກັນເຮັດໃຫ້ແຂວງ ມີສະຖຽນລະພາບທາງດ້ານການເມືອງ ມີຄວາມສະຫງົບປອດໄພ ແລະ ສັງຄົມມີຄວາມເປັນລະບຽບຮຽບຮ້ອຍດ້ວຍການສຸມໃສ່ແກ້ໄຂບັນຫາປະກົດການຫຍໍ້ທໍ້ໃຫ້ຫຼຸດໜ້ອຍຖອຍລົງ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ