ກອງປະຊຸມຄະນະບໍລິຫານງານພັກກະຊວງປ້ອງກັນປະເທດ ເປີດກວ້າງ ຄັ້ງທີ 8 ສະໄໝທີ V

ກອງປະຊຸມຄະນະບໍລິຫານງານພັກກະຊວງປ້ອງກັນປະເທດ ເປີດກວ້າງຄັ້ງທີ 8 ສະໄໝທີ V ໄດ້ຈັດຂຶ້ນໃນວັນທີ 24 ທັນວາ 2024 ນີ້, ໂດຍການເປັນປະທານຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງປ້ອງກັນປະເທດ, ມີຄະນະປະຈຳພັກ ແລະ ກຳມະການຄະນະພັກກະຊວງປ້ອງກັນປະເທດ ເຂົ້າ ຮ່ວມ.
ສະຫາຍ ພົນໂທ ຄຳລຽງ ອຸທະໄກສອນ ໄດ້ກ່າວເປີດກອງປະຊຸມວ່າ: ກອງປະຊຸມຄົບຄະນະ ບໍລິຫານງານພັກກະຊວງປ້ອງກັນປະເທດ ເປີດກວ້າງຄັ້ງທີ 8 ສະໄໝທີ V ໄດ້ຮັບຟັງການຕີລາຄາຜົນສຳເລັດການນຳພາ ຂອງຄະນະບໍລິຫານງານພັກກະຊວງປ້ອງກັນປະເທດປະຈຳ ປີ 2024 ແລະ ວາງທິດທາງແຜນການປະຈຳປີ 2025 ພ້ອມນັ້ນ ກໍໄດພ້້ອມກັນສຸມໃສຄົ້ນຄວ້າປະກອບຄຳເຫັນໃສ່ບົດສະຫຼຸບ ແລະ ທິດທາງແຜນການເພື່ອເຮັດ ໃຫ້ກອງປະຊຸມຄັ້ງນີ້ມີປະສິດທິຜົນສູງ. ຈາກນັ້ນ ສະຫາຍ ພົນຕີ ວົງສອນ ອິນປານພິມ ກຳມະການ ຄະນະປະຈຳພັກກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ ໄດ້ຜ່ານບົດສະຫຼຸບການນຳພາຂອງຄະນະພັກກະຊວງປ້ອງກັນປະເທດປະຈຳປີ 2024 ແລະ ທິດທາງແຜນການປີ 2025 ເຊິ່ງຄະນະພັກກະຊວງປ້ອງກັນປະເທດ ໄດ້ເປັນໃຈກາງໃນການ ນຳພາ-ຊີ້ນຳ ທົ່ວກອງທັບຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດວາງອອກ, ຊີ້ນຳຮັບປະກັນເຮັດໃຫ້ປະເທດຊາດມີຄວາມສະຫງົບໃນນີ້, ໄດ້ສຸມໃສ່ຊີ້ນຳການຫັນລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ແລະ ສ້າງທ່າສະໜາມສົງຄາມປະຊາຊົນ 3 ຂັ້ນ ຢູ່ບັນດາຈຸດທີ່ຫຼໍ່ແຫຼມ, ເຄື່ອນໄຫວຊີ້ນຳ-ກວດກາວຽກງານເຮັດໃຫ້ສະພາບມີຄວາມສະຫງົບ ໃນຂອບເຂດທົ່ວປະເທດຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ຍົກສູງສະຕິກຽມພ້ອມສູ້ຮົບ ແລະ ຈັດຕັ້ງລົງກວດກາວຽກງານກຽມພ້ອມສູ້ຮົບຂອງບັນດາກົມກອງທົ່ວກອງທັບ, ເອົາໃຈໃສ່ຊ ີ້ນຳສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບໃນທົ່ວກອງທັບ, ຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ແລະ ເອກະສານທີ່ສຳຄັນຕິດພັນກັບການໂຄສະນາປາຖະກະຖາວັນສຳຄັນຕ່າງໆຂອງຊາດ, ຂອງພັກ, ຂອງກອງທັບຢ່າງເປັນຂະບວນການກວ້າງຂວາງ, ເອົາໃຈໃສ່ປັບປຸງບູລະນະການຈັດຕັ້ງພັກ ຕິດພັນກັບການບູລະນະການຈັດຕັ້ງບັນຊາເປັນລະບົບ ແລະ ມີຄວາມເຂັ້ມແຂງ, ຄົ້ນຄ້ວາປັບປຸງໂຄງປະກອບການຈັດຕັ້ງ ແລະ ບຸກຄະລາກອນຢູ່ອົງການກະຊວງ, ກົມກອງກຳລັງຫຼວງກຳລັງທ້ອງຖິ່ນ, ຊີ້ນຳອົງການຈັດຕັ້ງມະຫາຊົນໃນກອງທັບ ເຄື່ອນໄຫວຕາມພາລະບົດບາດຂອງຕົນ, ຈັດຕັ້ງປະຕິບັດວຽກງານ ແລະ ສ້າງຂະບວນການ ດ້ານຕ່າງໆຂອງກົມກອງ, ຊີ້ນຳໃຫ້ເອົາໃຈໃສ່ໃນການປະຕິບັດນະໂຍບາຍຕພະນັກກງານ-ນັກຮົບ, ພະນັກງານບຳນານໃນທົ່ວກອງທັບ, ຊີ້ນຳຄົ້ນຄວ້າ, ປັບປຸງບັນດາກົດໝາຍ ແລະ ນິຕິກຳຂອງກອງທັບ ທັງສຸມໃສ່ຊີ້ນຳໜ້າທີ່ຮັບປະກັນພະລາທິການ-ເຕັກນິກ ຄຽງຄູ່ກັນນັ້ນກໍໄດ້ພົວພັນ ແລະ ຮ່ວມມືກັບຕ່າງປະເທດຊີ້ນຳຈັດຕັ້ງປະຕິບັດແນວທາງການຕ່າງປະເທດ ຂອງພັກຢ່າງຕັ້ງໜ້າ, ເພີ່ມທະວີ ຮ່ວມມືກັບປະເທດ ເພື່ອນມິດຍຸດທະສາດ ໃນການແລກປ່ຽນຄະນະຜູ້ແທນລະດັບຕ່າງໆ. ໃນກອງປະຊຸມບັນດາຄະນະປະຈຳພັກ ແລະ ກຳມະການຄະນະພັກກະຊວງປ້ອງກັນປະເທດ ໄດ້ປະກອບຄຳເຫັນ ຕໍ່ຜົນສຳເລັດການນຳພາຂອງຄະນະບໍລິຫານງານພັກກະຊວງປ້ອງກັນປະເທດປະຈຳປີ 2024 ແລະ ທິດທາງແຜນການປະຈຳປີ 2025 ເພື່ອຮັບປະກັນວຽກງານການນຳພາເສີມຂະຫຍາຍກອງທັບປະຊາຊົນ ລາວ ໃຫ້ມີຄວາມເຂັ້ມແຂງຢ່າງບໍ່ຢຸດຢັ້ງ.
ໂອກາດນີ້, ສະຫາຍ ພົນໂທ ຄຳລຽງ ອຸທະໄກສອນ ໄດ້ສະແດງຄວາມຍ້ອງຍໍຊົມເຊີຍຜົນງານໃນການນຳພາ-ຊີ້ນຳ ຂອງຄະນະບໍລິຫານງານພັກກະຊວງປ້ອງກັນປະເທດ ໃນໄລຍະຜ່ານມາ ພ້ອມທັງ ຮຽກຮ້ອງໃຫ້ສືບຕໍ່ເພີ່ມທະວີສຶກສາອົບຮົມການ ເມືອງ-ນຳພາແນວຄິດໃຫ້ບັນດາກົມກອງເຊື່ອມຊຶມກຳແໜ້ນ, ຜັນຂະຫຍາຍ ແລະ ຫັນບັນດາມະຕິຂອງສູນກາງພັກ, ມະຕິວ່າດ້ວຍ 4 ໜ້າທີ່ໃຫຍ່ 26 ແຜນ ງານ ແລະ 5 ບຸກທະລຸ, ເພີ່ມທະວີຄວາມເປັນເອກະພາບພາຍໃນຄະນະພັກ-ຄະນະບັນຊາແຕ່ລະຂັ້ນ ທັງປະຕິບັດລະບອບກວດກາ, ຕິດຕາມຊຸກຍູ້ອຳນວຍຄວາມສະດວກ ແລະ ສະຫຼຸບຖອດຖອນບົດຮຽນບັນດາວຽກງານໃນແຕ່ລະໄລຍະໃຫ້ເປັນປົກກະຕິ, ສົ່ງເສີມດ້ານຕັ້ງໜ້າ ແລະ ປະຕິບັດນະໂຍບາຍໃຫ້ຖືກຕ້ອງ ແລະ ແກ້ໄຂດ້ານຫຍໍ້ທໍ້ຕ່າງໆໃຫ້ທັນເວລາ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ