ສຳເລັດກອງປະຊຸມ ສະຫຼຸບວຽກງານຮອບດ້ານຂອງກະຊວງປ້ອງກັນປະເທດ ປະຈຳປິ 2024

ພາຍຫຼັງທີ່ໄດ້ດຳເນີນມາເປັນເວລາ 2 ວັນ, ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານ ຂອງກະຊວງປ້ອງກັນປະເທດປະຈຳປີ 2024 ແລະ ທິດທາງແຜນການປີ 2025, ໄດ້ປິດລົງດ້ວຍຜົນສໍາເລັດອັນຈົບງາມ ໃນວັນທີ 26 ທັນວາ 2024 ນີ້, ໂດຍການເປັນປະທານຂອງສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ, ມີບັນດາສະຫາຍຄະນະນຳກະຊວງ, ຄະນະນຳບັນດາກົມໃຫຍ່, ຫ້ອງວ່າການກະຊວງ, ຫ້ອງການຄະນະກຳມະການປກຊ-ປກສ ສູນກາງ, ວິທະຍາຄານ, ກອງພົນ, ກອງພັນໃຫຍ່, ກອງບັນຊາການທະຫານແຂວງ ແລະ ນະຄອນຫຼວງວຽງຈັນ, ໂຮງຮຽນ, ໂຮງໝໍ, ລັດວິສາຫະກິດໃນກອງທັບ ພ້ອມດ້ວຍພະນັກງານຫຼັກແຫຼ່ງກົມກອງອ້ອມຂ້າງກະຊວງປ້ອງກັນປະເທດ ເຂົ້າຮ່ວມ.
ສະຫາຍ ພົນໂທ ຄຳລຽງ ອຸທະໄກສອນ ໄດ້ກ່າວປິດກອງ ປະຊຸມວ່າ: ກອງປະຊຸມໄດ້ດຳເນີນໄປດ້ວຍ ບັນຍາກາດຟົດຟື້ນ ແລະ ມີຄວາມຮັບຜິດຊອບສູງຂອງບັນດາສະຫາຍ, ໃນວາລະດຳເນີນກອງປະຊຸມ, ແຕ່ລະສະຫາຍ ໄດ້ພ້ອມກັນຄົ້ນຄວ້າຕີລາຄາສະພາບການທີ່ສົ່ງຜົນກະທົບຕໍ່ການຈັດຕັ້ງປະຕິບັດວຽກງານປ້ອງກັນຊາດໃນປີ 2024 ກໍຄື ການເຄື່ອນໄຫວປັບປຸງກໍ່ສ້າງກຳລັງທາງດ້ານການເມືອງ-ແນວຄິດ ແລະ ການຈັດຕັ້ງ ແລະ ການປະຕິບັດໜ້າທີ່ຂອງບັນດາອົງການ, ກົມກອງທ້ອງຖິ່ນເຊິ່ງໄດ້ຍົກໃຫ້ເຫັນຜົນງານດ້ານຕັ້ງໜ້າ, ບັນດາຈຸດອ່ອນທີ່ຍັງຄົງຄ້າງ, ວິທີການປັບ ປຸງແກ້ໄຂ ແລະ ເປັນເອກະພາບຕໍ່ທິດທາງວຽກງານຈຸດສຸມໃນປີຕໍ່ໜ້າ ເພື່ອສືບຕໍ່ກໍ່ສ້າງກອງທັບໃຫ້ກາຍເປັນກອງທັບທີ່ມີແບບແຜນ ແລະ ທັນສະໄໝ. ໃນປີ 24 ຄະນະນຳກະຊວງໄດ້ຊີ້ນຳ 2024 ແລະ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິສະໄໝທີ V ຂອງ ຄະນະພັກກະຊວງປ້ອງກັນປະເທດຢ່າງມີຈຸດສຸມ ແລະ ແທດ
ເໝາະກັບຕົວຈິງ, ມີໝາກຜົນໃນ ຫຼາຍດ້ານເປັນຕົ້ນແມ່ນການເຮັດໜ້າທີ່ຮັກສາຄວາມສະຫງົບປອດໄພໃຫ້ການ
ນຳພັກ-ລັດ, ແຂກພາຍໃນ ແລະ ຕ່າງປະເທດ, ປ້ອງກັນບັນດາກອງປະຊຸມສໍາຄັນຕ່າງໆ, ບັນດາວັນບຸນປະຫວັດສາດຂອງຊາດ, ຂອງພັກ, ຂອງກອງທັບ, ປ້ອງກັນສຳນັກງານອົງການ, ສະໜາມບິນ, ເສັ້ນທາງທຸລະກັນດານ, ບັນດາ ໂຄງການກໍ່ສ້າງຂອງລັດຖະບານ, ມີຄວາມສະຫງົບປອດໄພ 100%, ບັນດາອົງການ, ກົມກອງ-ທ້ອງຖິ່ນ ກໍມີຜົນສຳເລັດຫຼາຍດ້ານ, ພະນັກງານ-ສະມາຊິກພັກ ມີແນວຄິດອຸ່ນອຽນທຸ່ນທ່ຽງ ແລະ ທ້າວຫັນປະຕິບັດໜ້າທີ່ວຽກງານ ເຊິ່ງສະແດງອອກຫຼາຍກົມກອງກຳລັງຫຼວງ ແລະ ກຳລັງທ້ອງຖິ່ນ ໄດ້ສຸມໃສ່ເຄື່ອນໄຫວປະຕິບັດໜ້າທີ່ຢູ່ເຂດທຸລະ ກັນດານ, ຫ່າງໄກສອກຫຼີກ, ຕັ້ງໜ້າບຸກບືນຫ້າວຫັນ, ເປັນແບບຢ່າງຊີ້ນຳ-ນຳພາ, ໃກ້ຊິດຕິດແທດກັບອ້າຍນ້ອງ ດ້ວຍ ຄວາມຮັບຜິດຊອບສູງ ສາມາດເຮັດສຳເລັດໜ້າທີ່ການເມືອງຂອງຕົນ, ປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ສ້າງເງື່ອນໄຂເອື້ອອຳນວຍ ໃຫ້ແກ່ການພັດທະນາເສດຖະກິດ-ສັງຄົມຂອງຊາດສືບຕໍ່ຂະຫຍາຍຕົວຢ່າງຕໍ່ເນື່ອງ.
ພ້ອມນັ້ນ, ສະຫາຍລັດຖະມົນຕີ ກະຊວງປ້ອງກັນປະເທດ ຍັງໄດ້ເນັ້ນໜັກວຽກງານທີ່ຈະສຸມໃສ່ຈັດຕັ້ງປະຕິບັດ ໃນປີ 2025 ເປັນຕົ້ນແມ່ນ ເພີ່ມທະວີການຊີ້ນຳ- ນຳພາວຽກງານປ້ອງກັນຊາດ- ປ້ອງກັນຄວາມສະຫງົບ ເພື່ອຮັບ ປະກັນສະຖຽນລະພາບ ແລະ ຄວາມໝັ້ນຄົງຂອງປະເທດຊາດ, ຕັ້ງໜ້າສະກັດກັ້ນ ແລະ ຕ້ານທຸກກົນອຸບາຍລ່ຽມລາຍຂອງສັດຕູ, ທັບມ້າງຍຸດທະສາດຫັນປ່ຽນໂດຍສັນຕິຂອງອິດທິກຳລັງປໍລະປັກ, ເປັນເຈົ້າການໃນການປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຂອງພັກ, ປົກປັກຮັກສາລະບອບໃໝ່ປະຊາທິປະໄຕປະຊາຊົນໄວ້ໃຫ້ໝັ້ນຄົງ, ສືບຕໍ່ຈັດຕັ້ງກຳລັງລົງກໍ່ສ້າງຮາກຖນການເມືອງ, ສ້າງທ່າສະໜາມ 3 ຂັ້ນຕິດພັນກັບວຽກງານ 3 ສ້າງ ໂດຍສຸມໃສ່ບໍລິເວນຊາຍແດນ, ເຂດຫ່າງໄກສອກຫຼີກ ແລະ ບັນດາຈຸດສຸມຂອງກະຊວງໄປພ້ອມກັບການປັບປຸງລະບົບການຈັດຕັ້ງຢູ່ຮາກຖານໃຫ້ໜັກແໜ້ນເຂັ້ມແຂງໃນທຸກດ້ານ, ເອົາໃຈໃສ່ຍົກສູງສະຕິລະວັງຕົວ, ກຽມພ້ອມສູ້ຮົບ, ເດັດດ່ຽວຕອບຕ້ານທຸກ ການເຄື່ອນໄຫວຂອງສັດຕູຢ່າງທັນການ, ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ເລິກເຊິ່ງ, ແທດເຖິງແຕ່ລະ ເປົ້າໝາຍ, ຕັ້ງໜ້າປັບປຸງກໍ່ສ້າງກອງທັບໃຫ້ເຂັ້ມແຂງຮອບດ້ານ, ເພີ່ມທະວີການນຳພາຂອງພັກຕໍ່ກຳລັງປະກອບອາວຸດຕິດພັນກັບການສ້າງໜ່ວຍພັກປອດໃສເຂັ້ມແຂງໜັກແໜ້ນ, ສ້າງກົມກອງ 3 ປອດ, ກົມກອງ- ນັກຮົບວັດທະນະທຳໃຫ້ມີຄຸນນະພາບ ແລະ ສ້າງພະນັກງານສືບທອດປ່ຽນແທນໃຫ້ຄົບເງື່ອນໄຂມາດຖານ, ເອົາໃຈໃສ່ຄົ້ນຄວ້າ ໂຄງການ-ຫຼັກສູດການຮຽນການສອນໃຫ້ແກ່ໂຄງການກໍ່ສ້າງ-ບຳລຸງ ຢູ່ບັນດາສະຖາບັນການສຶກສາ, ວຽກງານອົບຮົມ-ຫັດແອບ, ປັບປຸງລະບຽບແບບແຜນຂອງກອງທັບໃຫ້ມີຄຸນນະພາບ, ສຸມໃສ່ສ້າງພະລາທິການກັບໜ້າທີ່ຕົ້ນຕໍ ແມ່ນ ຮັບປະກັນໃຫ້ໄດ້ດ້ານສະບຽງອາຫານ, ການຈັດຕັ້ງລ້ຽງດູທັບ, ຮັບປະກັນເງິນເດືອນ-ເງິນກິນ, ດ້ານເຄື່ອງນຸ່ງຫົ່ມ, ນ້ຳມັນເຊື້ອໄຟ, ຢາປົວພະຍາດ, ການຈັດຊື້-ຈັດຫາ, ວຽກງານຂົນສົ່ງ, ຍູ້ແຮງການຜະລິດ ແລະ ຂະຫຍາຍເຂດຜະລິດກະສິກຳຂັ້ນກະຊວງ, ບັນດາກົມກອງເພື່ອຍົກລະດັບຊີວິດການເປັນຢູ່ຂອງກົມກອງທະຫານໃຫ້ດີຂຶ້ນ, ເອົາໃຈໃສ່ວຽກງານເຕັກນິກການທະຫານປົກປັກຮັກສາ ແລະ ບົວລະບັດຜັດເຊັດພາຫະນະເຕັກນິກ, ອາວຸດ- ກະສູນໃຫ້ດີ, ປັບປຸງຄືນລະບົບສາງຄັງເກັບມ້ຽນ, ເອກະສານນິຕິກຳໃນການຄຸ້ມຄອງ-ນຳໃຊ້ໃຫ້ເຂົ້າສູ່ລະບົບ, ຮັບປະກັນຄຸນນະພາບ, ຕິດຕາມແຜນການດັດແປງພາຫະນະ-ເຕັກນິກ, ຜະລິດເຄື່ອງອາໄຫຼ່, ສ້ອມແປງພາຫະນະໃຫ້ສຳເລັດຕາມແຜນການ ແລະ ສືບຕໍ່ເພີ່ມທະວີການພົວພັນຮ່ວມມືກັບກອງທັບ ບັນດາປະເທດເພື່ອນມິດຍຸດທະສາດ, ເພື່ອນມິດໃກ້ຄຽງ ແລະ ໃນໂລກ ເພື່ອ ປະກອບສ່ວນເຂົ້າໃນການເສີມສ້າງສັນຕິພາບ, ສະຖຽນລະພາບ ແລະ ການຮ່ວມມືກັບພາກພື້ນແລະ ສາກົນ
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ