ມອບ-ຮັບ ຫນ້າທີ່ ຫົວຫນ້າຫ້ອງການເມືອງ ກົມໃຫຍການເມືອງກອງທັບ

ໃນວັນທີ 27 ທັນວາ 2024 ນີ້, ຫ້ອງການເມືອງ ກົມໃຫຍ່ການເມືອງກອງທັບ
( ກມທ ) ໄດ້ຈັດພິທີມອບ-ຮັບ ຫນ້າທີ່ ຫົວຫນ້າຫ້ອງການເມືອງ ກົມໃຫຍ່ການເມືອງກອງທັບລະຫວ່າງສະຫາຍ ພັນເອກ ແພງສີເສັງວິໄຊ ຫົວຫນ້າຫ້ອງການເມືອງ ກົມໃຫຍ່ການເມືອງກອງທັບ ( ຜູ້ເກົ່າ ) ແລະ ສະຫາຍ ພັນເອກ ອໍາພອນ ສຸກວິໄຊ ຫົວຫນ້າຫ້ອງການເມືອງກົມໃຫຍ່ການ ເມືອງກອງທັບ ( ຜູ້ໃຫມ່ ), ໂດຍການເປັນປະທານຂອງ ສະຫາຍ ພົນຕີວົງສອນ ອິນປານພິມ ກໍາມະການຄະນະປະຈໍາພັກກະຊວງປ້ອງກັນປະເທດ, ຫົວຫນ້າກົມໃຫຍ່ການ ເມືອງກອງທັບ, ມີຄະນະພັກ-ຄະນະບັນຊາຫ້ອງການເມືອງ ພ້ອມດ້ວຍ ພະນັກງານຫຼັກແຫຼ່ງ ເຂົ້າຮ່ວມ.
ສະຫາຍ ພັນເອກ ແພງສີ ເສັງວິໄຊ ໄດ້ຜ່ານບົດສະຫຼຸບການເຄື່ອນໄຫວຊີ້ນໍາວຽກງານໃນໄລຍະຜ່ານມາ ທີ່ໄດ້ດໍາລົງຕໍາແຫນ່ງເປັນຫົວຫນ້າຫ້ອງການເມືອງ ກມທ ໄດ້ເປັນເຈົ້າການເອົາໃຈໃສ່ນໍາພາ-ຊີ້ນໍາ ວຽກງານຕ່າງໆຕາມພາລະບົດບາດ, ຫນ້າທີ່ຂອງຕົນ ສາມາດສ້າງໄດ້ຜົນງານຫຼາຍດ້ານ ເປັນຕົ້ນແມ່ນຮັກສາໄດ້ຄວາມສາມັກຄີເຮັດໃຫ້ສະພາບມີຄວາມສະຫງົບ, ພະນັກງານ-ສະມາຊິກພັກ ມີແນວຄິດການເມືອງຫນັກແຫນ້ນ, ມີຄວາມຈົງຮັກພັກດີຕໍ່ປະເທດຊາດ, ຕໍ່ພັກ, ຕໍ່ປະຊາຊົນ. ຈາກນັ້ນ, ສະຫາຍພັນເອກ ອໍາພອນ ສຸກວິໄຊ ກໍໄດ້ກ່າວຮັບຫນ້າທີ່ ພ້ອມທັງໃຫ້ຄໍາຫມັ້ນສັນຍາວ່າ ຈະໃຊ້ທຸກຄວາມຮູ້ຄວາມສາມາດເຂົ້າໃນການຈັດຕັ້ງປະຕິບັດຫນ້າທີ່ໃຫ້ດີທີ່ສຸດຕາມທິດຊີ້ນໍາ ຂອງຂັ້ນເທິງໃຫ້ມີຜົນສໍາເລັດ ແລະ ໄດ້ພ້ອມກັນລົງນາມບົດບັນທຶກການມອບ-ຮັບ ຫນ້າທີ່ຢ່າງເປັນທາງການ.
ສະຫາຍ ພົນຕີວົງສອນ ອິນປານພິມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ ສະຫາຍ ຫົວຫນ້າຫ້ອງການເມືອງ ກມທ ( ຜູ້ເກົ່າ ) ສ້າງມາໄດ້ໃນໄລຍະຜ່ານມາ. ພ້ອມທັງ, ໄດ້ເນັ້ນຫນັກໃຫ້ຜູ້ທີ່ໄດ້ຮັບຫນ້າທີ່ໃຫມ່ຈົ່ງເອົາໃຈໃສ່ສຶກສາອົມຮົບການເມືອງ-ນໍາພາແນວຄິດ, ຕັ້ງຫນ້າເຝິກຝົນຫຼໍ່ຫຼອມຕົນເອງໃນທຸກດ້ານ, ເພີ່ມທະວີບົດບາດໃນການນໍາພາ-ຊີ້ນໍາ ທຸກຂົງເຂດວຽກງານທີ່ຕົນເອງຮັບຜິດຊອບ ໃຫ້ມີຄຸນນະພາບສູງ, ຕັ້ງຫນ້າປະຕິບັດບັນດາຂໍ້ກໍານົດ, ກົດລະບຽບຂອງກອງທັບວາງອອກໃຫ້ເຂັ້ມງວດ ເພື່ອພ້ອມກັນເຮັດສໍາເລັດຫນ້າທີ່ທີ່ການຈັດຕັ້ງຂັ້ນເທິງມອບຫມາຍໃຫ້.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ