ຮອງລັດຖະມົນຕີ ກະຊວງປ້ອງກັນປະເທດ ພົບປະໂອ້ລົມປະຊາຊົນ ກຸ່ມບ້ານມາລີເທົາ

ວັນທີ 5 ມັງກອນ 2025 ນີ້, ສະຫາຍ ພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ພ້ອມຄະນະ ໄດ້ລົງພົບປະໂອ້ລົມພໍ່ແມ່ປະຊາຊົນກຸ່ມບ້ານມາລີເທົາ ຂຶ້ນກັບເມືອງຍອດອູ ແຂວງຜົ້ງສາລີ. ໂດຍມີອໍານາດການປົກຄອງ, ກຸ່ມບ້ານ, ປະຊາຊົນ ແລະ ນ້ອງນ້ອຍນັກຮຽນໃຫ້ການຕ້ອນຮັບຢ່າງອົບອຸ່ນ. ໂອກາດນີ້, ຕາງໜ້າໃຫ້ກຸ່ມບ້ານມາລີເທົາ ໄດ້ລາຍງານສະພາບໂດຍຫຍໍ້ໃຫ້ຄະນະຮັບຊາບ ເປັນຕົ້ນແມ່ນກຸ່ມບ້ານມາລີເທົາ ແມ່ນກຸ່ມບ້ານໜຶ່ງທີ່ຂຶ້ນກັບເມືອງຍອດອູ ແຂວງຜົ້ງສາລີ ເຊິ່ງປະກອບມີ 5 ບ້ານ ຂຶ້ນກັບ. ປະ ຊາຊົນຍຶດຖື ອາຊີບ ປູກຝັງ-ລ້ຽງສັດ ເປັນຕົ້ນຕໍ ເຊິ່ງໄລຍະຜ່ານມາກຸ່ມບ້ານກໍ່ໄດ້ເປັນເຈົ້າການ ໃນການປະກອບສ່ວນເຂົ້າໃນໜ້າວຽກທີ່ສໍາຄັນ ໂດຍສະເພາະແມ່ນການປຸກລະດົມຂົນຂວາຍພໍ່ແມ່ປະຊາຊົນ ເຮັດແນວຄິດການເມືອງໃຫ້ໜັກແໜ້ນເຂັ້ມແຂງ ເຊື່ອໜັ້ນຕໍ່ການນໍາພາຂອງ ພັກ-ລັດ ປະກອບສ່ວນເຂົ້າໃນວຽກງານ ປກຊ-ປກສ ຂັ້ນບ້ານ ເຮັດໃຫ້ຮາກຖານບ້ານມີຄວາມສະຫງົບປອດໄພ. ສະຫາຍ ພົນໂທ ວົງຄໍາ ພົມມະກອນ ໄດ້ຍ້ອງຍໍຊົມເຊີຍຕໍ່ຄະນະກຸ່ມບ້ານ ຕະຫຼອດຮອດປະຊາຊົນ ທີ່ຍາມໃດກໍໄດ້ເອົາໃຈໃສ່ຕໍ່ການ ກໍ່ສ້າງພື້ນຖານໂຄງລ່າງຂອງຕົນ ໃນການດໍາລົງຊີວິດທີ່ມີບາດກ້າວຂະຫຍາຍຕົວຂຶ້ນໄປເລື້ອຍໆ. ພ້ອມທັງ, ເນັ້ນໜັກໃຫ້ປະຊາຊົນ ໃນກຸ່ມບ້ານ ພ້ອມກັນເປັນເຈົ້າການສົ່ງເສີມ ແລະ ມີສ່ວນຮ່ວມໃນການບຸທະລຸເສັ້ນທາງໄປຫາຈຸດສາມແຈ ຫຼື 3 ປະເທດ (ລາວ, ຫວຽດນາມ, ຈີນ) ເພື່ອສ້າງໃຫ້ປະຊາຊົນໃນກຸ່ມບ້ານແຫ່ງນີ້ໄດ້ໄປມາສະດວກສະບາຍ ແລະ ມີການພັດທະນາຂຶ້ນໄປເລື້ອຍໆ.
ສະຫາຍ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ມອບເງິນຊຸກຍູ້ໃຫ້ 5 ບ້ານດັ່ງກ່າວ ແລະ ຜ້າຮົ່ມຈໍານວນ 500 ຜືນ, ກະເປົາ, ຊຸດນັກຮຽນ ແລະ ເຄື່ອງປະເພດອື່ນໆອີກຈໍານວນໜຶ່ງ. ພ້ອມທັງໄດ້ໄປຢ້ຽມຢາມ ກອງຮ້ອຍທະຫານຊາຍແດນ 118 ທີ່ຂຶ້ນກັບ ກອງບັນຊາການທະຫານແຂວງຜົ້ງສາລີ ພ້ອມທັງມອບເຄື່ອງອຸປະໂພກ-ບໍລິໂພກ ແລະ ມອບເງິນຊຸກຍູ້ຊື້ໂຮງສີເຂົ້າອີກຈໍານວນໜຶ່ງ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ