ປິດຊຸດອົບຮົມໄລຍະສັ້ນໃຫ້ກອງພັນເຄື່ອນທີ່ໄວ ແລະ ໂຮງຮຽນ 303

ພິທີປິດຊຸດອົບຮົມໄລຍະສັ້ນໃຫ້ກອງພັນເຄື່ອນທີ່ໄວ ແລະ ໂຮງຮຽນ 303 ໄດ້ຈັດຂຶ້ນໃນວັນທີ 8 ມັງກອນ 2025 ນີ້, ໂດຍການເປັນປະທານຂອງສະຫາຍ ພົນຈັດຕະວາ ບຸນຕຽນ ໄຊຍໍາວົງທັນ ຫົວໜ້າກົມ 49, ມີບັນດາຄະນະກົມອ້ອມຂ້າງກະຊວງປ້ອງກັນປະເທດ, ມີຄະນະພັກ-ຄະນະບັນຊາ ກົມກອງຂຶ້ນກັບ, ຄະນະຊ່ຽວຊານຫວຽດນາມ ພ້ອມດ້ວຍແຂກຖືກເຊີນ ເເລະ ນັກເຝິກອົບຮົມເຂົ້າຮ່ວມ.
ສະຫາຍ ພັນໂທ ສຸລິພົນ ເລື່ອນສົມຫວັງ ຮອງຫົວໜ້າພະເເນກອົບຮົບ ກົມ 49 ກົມໃຫຍ່ເສນາທິການກອງທັບ ໄດ້ຜ່ານບົດສະຫຼຸບການເຝິກອົບຮົມ-ຫັດແອບໄລຍະສັ້ນ 3 ເດືອນທີ່ທາງກອງບັນຊາການຕີພິເສດຫວຽດນາມ ມາຊວ່ຍເຝິກອົບຮົມໂດຍລົງເລິກ 4 ວິຊາຫຼັກ ຢູ່ກອງພັນ 428, ກອງພັນໃຫຍ່ 497 ແລະ ຊວ່ຍສ້າງໂຄງການຫຼັກສູດການຮຽນການສອນຢູ່ໂຮງຮຽນ 303 ປະຈໍາປີ 2025, ເຊິ່ງເລີ່ມອົບຮົມ-ຫັດແອບ ນັບແຕ່ວັນທີ 21 ຕຸລາ 2024 – 8 ມັງກອນ 2025, ໃນນີ້, ມີຫົວໜ້າຄະນະແລະ ຄະນະຄູເຝິກຫວຽດນາມ 7 ສະຫາຍ, ມີນັກເຝິກອົບຮົມ 104 ສະຫາຍ ໄດ້ຈັດຕັ້ງເປັນ 2 ພາກສ່ວນຄື: ພາກສ່ວນ 1 ແມ່ນອົບຮົມໃຫ້ຄູອາຈານຢູ່ໂຮງຮຽນ 303 ຈຳນວນ 10 ສະຫາຍ ເພື່ອຂຽນໂຄງການຫຼັກສູດຍົກຂັ້ນ ນາຍຮ້ອຍ, ພາກສ່ວນທີ່ 2 ໄດ້ຈັດຕັ້ງເປັນ 1 ກອງຮ້ອຍ ໃນນັ້ນໄດ້ແບ່ງອອກເປັນ 4 ປີກນັກຮຽນຂຶ້ນຫ້ອງຫັດແອບ ຄື: ປີກຕີພິເສດນໍ້າ, ປີກຕີເສດຕົວເມືອງ, ປີກຕີພິເສດບົກ, ປີກຕີພິເສດຕອບໄດ້ໄວ, ພ້ອມທັງໄດ້ຂຽນບົດປະກອບໃສ່ໂຄງຮ່າງຫຼັກສູດ ໃນນີ້, ມີວິທີການຄົ້ນຄ້ວາວິທະຍາສາດ, ວິທີການຄົ້ນຄວ້າວິທະຍາສາດການທະຫານ, ເອກະສານແນະນໍາວິທີການອົບຮົມຮູບແຖວຍຸດທະວິທີ ຂັ້ນຈຸຕີພິເສດ, ເອກກະສານປີກຕີພິເສດປິດລັບຫຼອນຕີສັດຕູໃນຂຸມຄອງ, ຫຼັກສູດສິນລະປະຍຸດເຄື່ອນທີ່ພື້ນຖານຂອງຕີພິເສດບົກ, ຫຼັກສູດປີກຕີພິເສດປິດລັບຫຼອນຕີສັດຕູພັກທັບຊົ່ວຄາວ, ຫຼັກສູດປີກຕິພິເສດແກ້ໄຂຊ່ວຍເຫຼືອຕົວປະກັນ, ໄດ້ອົບຮົມຫັດແອບດ້ານສິນລະປະຍຸດ-ຍຸດທະວິທີ ມີ: ສີລະປະຍຸດ-ຍຸດທະວິທີຕິພິເສດນໍ້າ, ຕີພິເສດບົກ, ຕີພິເສດຕົວເມືອງ, ຕີພິເສດຕອບໂຕ້ໄວ. ຜ່ານການອົບຮົມຫັດແອບສາມາດຕີລາຄາໄດ້ ໃນການຮຽນ-ການສອນ ໂຄງການຫຼັກຂຽນສູດຂັ້ນນາຍຮ້ອຍ, ແມ່ນມີການເອົາໃຈໃສ່ປະຕິບັດບັນດາຂໍ້ກຳນົດກົດລະບຽບ, ຜ່ານຜ່າຄວາມຫຍຸ້ງຍາກ, ສາມາດກໍາໄດ້ເນື້ອໃນພື້ນຖານຂອງແຕ່ລະບົດ, ເອົາໃຈໃສ່ຄົ້ນຄວ້າຫັດແອບຮໍ່າຮຽນຮູ້ໜູນໃຊ້ສິນລະປະຍຸດ-ຍຸດທະວິທີ ເພື່ອແກ້ໄຂໄດ້ຂອງບັນດາກໍລະນີຍຸດທະວິທີຮູ້ຈັກນໍາໃຊ້ເຂົ້າໃນເງື່ອນໄຂສູ້ຮົບຕົວຈິງ, ສາມາດສະເລ່ຍຕີລາຄາໄດ້ 100%, ຮັບປະກັນຄວາມປອດໄພ ພ້ອມນີ້ ໃນພິທິຍັງໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການມອບຫຼຽນກາມິດຕະພາບກອງທັບປະຊາຊົນລາວໃຫ້ຄະນະຊ່ຽວຊຽນ ສສ ຫວຽດນາມ ຈຳນວນ 7 ສະຫາຍ ເເລະ ມອບໃບຢັ້ງຢືນເຝິກອົບຮົມໄລຍະສັ້ນໃຫ້ນັກເຝິກອົບຮົມ.
ສະຫາຍ ພົນຈັດຕະວາ ບຸນຕຽນ ໄຊຍໍາວົງທັນ ກໍໄດ້ມີຄຳເຫັນໂອ້ລົມ ເຊິ່ງສະຫາຍໄດ້ຍ້ອງຍໍຜົນສຳເລັດ, ພ້ອມທັງໄດ້ເນັ້ນໜັກໃຫ້ນັກເຝິກອົບຮົມເອົາໃຈໃສ່ຍົກສູງຄວາມຮັບຜິດຊອບຕໍ່ວຽກງານທີ່ໄດ້ມອບໝາຍໃຫ້, ມີນ້ຳໃຈສູ້ຮົບສູງໃນການປະຕິບັດໜ້າທີ່, ເສີມຂະຫຍາຍມູນເຊື້ອຮັກຊາດອັນດີງາມ, ຖືເອົາການສຶກສາອົບຮົມການເມືອງ – ແນວຄິດດ້ວຍຫຼາຍຮູບການໃຫ້ເເທດເໝາະກັບວິຊາສະເພາະດ້ວຍຫຼາຍວິທີຢ່າງຕໍ່ເນື່ືອງ, ຫັນເອົາວິຊາສະເພາະທີ່ຮຽນມາຈັດຕັ້ງຜັນຂະຫຍາຍໃນກົມກອງຂອງຕົນໃຫ້ເກີດດອກອອກຜົນເພື່ອພັດທະນາກົມກອງໃຫ້ມີເເບບເເຜນທີ່ທັນສະໄໜ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ