ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ຕ້ອນຮັບຮອງລັດຖະມົນຕີ ກະຊວງປ້ອງກັນປະເທດ ແຫ່ງ ສສ ຫວຽດນາມ

ວັນທີ 9 ມັງກອນ 2025 ນີ້, ຢູ່ທີ່ກະຊວງປ້ອງກັນປະເທດ, ສະຫາຍ ພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ພົນໂທ ຮວ່າງ ຊວັນຈຽນ ຮອງລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ ພ້ອມຄະນະ ໃນໂອກາດທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ.
ໂອກາດນີ້, ສະຫາຍ ພົນໂທ ຄໍາລຽງ ອຸທະໄກສອນ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນ ເຕັມໄປດ້ວຍໄມຕີຈິດມິດຕະພາບ ພ້ອມທັງ ຕີລາຄາສູງຕໍ່ສາຍພົວພັນ ແລະ ການຮ່ວມມືຊ່ວຍເຫຼືອເຊິ່ງກັນ ແລະ ກັນຂອງສອງຊາດ, ສອງກອງທັບ ລາວ-ຫວຽດນາມ ໃນໄລຍະຜ່ານມາ ໃນຫຼາຍດ້ານ ແລະ ສືບຕໍ່ພົວພັນຮ່ວມມືກັນຫຼາຍດ້ານໃນຕໍ່ໜ້າ ນັບມື້ເພີ່ມທະວີຍິ່ງໆຂຶ້ນ, ເປັນການປະກອບສ່ວນທີ່ສຳຄັນເຂົ້າໃນການເສີມສ້າງສາຍພົວພັນມິດຕະພາບ ຄວາມສາມັກຄີພິເສດ ແລະ ການຊ່ວຍເຫຼືອເຊິ່ງກັນ ແລະ ກັນ ໂດຍສະເພາະ ຂົງເຂດວຽກງານປ້ອງກັນຊາດ ສອງກອງທັບລາວ-ຫວຽດນາມ, ຫວຽດນາມ-ລາວ ໃຫ້ນັບມື້ແຕກດອກອອກຜົນ.
ສະຫາຍ ພົນໂທ ຮວ່າງ ຊວັນ ຈຽນ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ສະຫາຍ ລັດຖະມົນຕີກະຊວງປ້ອງກັນປະເທດລາວ ພ້ອມດ້ວຍຄະນະ ແລະ ພ້ອມທັງຕີລາເຖິງ ການພົວພັນຮ່ວມມືຂອງສອງກອງທັບ ຫວຽດນາມ-ລາວ ໃນແຕ່ລະຂົງເຂດໃນໄລຍະຜ່ານມາ ແລະ ອະນາຄົດຕໍ່ໜ້າ ແມ່ນຍິ່ງຈະໄດ້ຮັບການເສີມຂະຫຍາຍການຮ່ວມມືກັນຢ່າງໃກ້ຊິດ ແລະ ແໜ້ນແຟ້ນ. ພ້ອມທັງອວຍພອນໃຫ້ມິດຕະພາບການຮ່ວມມືຮອບດ້ານສອງພັກ, ສອງລັດກໍຄືສອງກອງທັບ ຫວຽດນາມ-ລາວ, ລາວ-ຫວຽດນາມ ເພີ່ມພູນຄູນສ້າງຂຶ້ນສູ່ລະດັບສູງ.
ວັນດຽວກັນ, ສະຫາຍ ພົນໂທ ຮວ່າງ ຊວັນ ຈຽນ ພ້ອມຄະນະ ກໍໄດ້ເຂົ້າຢ້ຽມຂໍ່ານັບ ສະຫາຍ ພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ຕື່ມອີກ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ