ກະຊວງປ້ອງກັນປະເທດ ມອບຫຼຽນໄຊພິລະອາດຫານ ໃຫ້ບໍລິສັດ ລາວິນາໂກ 36 ຈໍາກັດຜູ້ດຽວ

ວັນທີ 13 ມັງກອນ 2025 ນີ້, ກະຊວງປ້ອງກັນປະເທດ ໄດ້ຈັດພິທີ ມອບຫຼຽນໄຊພິລະອາດຫານ ໃຫ້ບໍລິສັດ ລາວິນາໂກ 36 ຈໍາກັດຜູ້ດຽວ ກອງທັບປະຊາຊົນຫວຽດນາມ, ໂດຍການເປັນປະທານຂອງສະຫາຍ ພົນຕີ ສອນທອງ ພົມລາວົງ ຮອງຫົວໜ້າກົມໃຫຍ່ການເມືອງກອງທັບ, ໂດຍມີພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.
ສະຫາຍ ພົນຈັດຕະວາ ວັນນະວົງ ນັນທະວົງ ຫົວໜ້າກົມນະໂຍບາຍ ກົມໃຫຍ່ການມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການມອບຫຼຽນໄຊພິລະອາດຫານ, ກະຊວງປ້ອງກັນປະເທດ ຕົກລົງ: ມອບຫຼຽນໄຊພິລະອາດຫານຊັ້ນ II ໃຫ້ບໍລິສັດ ລາວິນາໂກ 36 ຈໍາກັດຜູ້ດຽວ ແລະ ສະຫາຍ ພັນໂທ ເຈືອງ ກົງ ທີ້ງ ອໍານວຍການ ບໍລິສັດ ລາວິນາໂກ 36 ຈໍາກັດຜູ້ດຽວ, ມອບຫຼຽນໄຊພິລະອາດຫານຊັ້ນ III ໃຫ້ສະຫາຍ ພັນໂທ ດ່ວນ ມິງ ຫິ່ງ ຮອງອໍານວຍການ ບໍລິສັດ ລາວິນາໂກ 36 ແລະ ສະຫາຍ ພັນຕີ ຫ່ວງ ກວັກ ຕ້ວນ ຮອງອໍານວຍການ ບໍລິສັດ ລາວິນາໂກ 36 ແລະ ຜ່ານຂໍ້ຕົກລົງ ຂອງກົມໃຫຍ່ການເມືອງກອງທັບ ວ່າດ້ວຍການມອບໃບຍ້ອງຍໍ, ໃນນີ້, ຕົກລົງ ມອບໃບຍ້ອງຍໍ ກົມໃຫຍ່ການເມືອງກອງທັບ ໃຫ້ບໍລິສັດ ທີ່ປຶກສາກໍ່ສ້າງ 3 ເຊເວັນ (ອອກແບບ) ແລະ ທ່ານ ດາມ ດິງ ແທ່ງ ທີ່ປະກອບສ່ວນອັນໃຫຍ່ຫຼວງ ທາງດ້ານເຫື່ອແຮງ, ສະຕິປັນຍາ ແລະ ທຶນຮອນຈໍານວນຫຼາຍເຂົ້າໃນການກໍ່ສ້າງ ໂຮງຮຽນວັດທະນະທຳຊົນເຜົ່າກອງທັບ, ຫໍພິພິທະພັນປະຫວັດສາດກອງທັບ ແລະ ອື່ນໆ. ເນື່ອງໃນໂອກາດສະເຫຼີມສະຫຼອງ 2 ວັນປະຫວັດສາດ ວັນສ້າງຕັ້ງສາຍພົວພັນ ການທູດ ລາວ- ຫວຽດນາມ ຄົບຮອບ 60 ປີ (05/09/1962 – 05/09/2022) ແລະ ວັນເຊັນສົນທິສັນຍາມິດຕະພາບ ການຮ່ວມມື ລາວ – ຫວຽດນາມ ຄົບຮອບ 45 ປີ (18/07/1977-18/07/2022) ໃນຄັ້ງນີ້.
ໂອກາດນີ້, ສະຫາຍ ພົນຕີ ສອນທອງ ພົມລາວົງ ຕາງໜ້າຄະນະນໍາກະຊວງປ້ອງກັນປະເທດ ໄດ້ສະແດງ ຄວາມຮູ້ສຶກອັນເລິກເຊິ່ງ ແລະ ຈິງໃຈຕໍ່ຜົນງານ ຄຸນງາມຄວາມດີຂອງບັນດາກົມ ກອງລວມໝູ່ ແລະ ບຸກຄົນ ຂອງກອງທັບປະຊາຊົນຫວຽດນາມ ເວົ້າລວມ, ເວົ້າ ສະເພາະແມ່ນບໍລິສັດ ລາວິນາໂກ 36 ຈຳກັດຜູ້ດຽວ ທີ່ມີຕໍ່ກອງທັບປະຊາຊົນລາວ ຕະຫຼອດໄລຍະທີ່ຜ່ານມາ, ທັງເປັນການຢັ້ງຢືນເຖິງຜົນສຳເລັດ ແລະ ສະເຫຼີມສະຫຼອງ 2 ວັນປະຫວັດສາດ ຜົນງານ ແລະ ຄວາມດີດັ່ງກ່າວໄດ້ບັນທຶກໄວ້ໃນໜ້າປຶ້ມປະຫວັດສາດ ຂອງການປະຕິວັດລາວ ແລະ ຈະຕິດພັນຢູ່ກັບນໍ້າໃຈມິດຕະພາບຄວາມສາມັກດີແບບພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ ຕະຫຼອດໄປ.
ແຫຼ່ງທີ່ມາຂອງຂໍໍ້ມູນ: ໜັງສືພິມກອງທັບ