ກອງປະຊຸມ ຜູ້ແທນສະຫະພັນແມ່ຍິງທົ່ວກອງທັບ ຄັ້ງທີ IX

ກອງປະຊຸມ ຜູ້ແທນສະຫະພັນແມ່ຍິງທົ່ວກອງທັບ ຄັ້ງທີ IX ໄດ້ຈັດຂຶ້ນໃນວັນທີ 30 ມັງກອນ 2025 ນີ້, ໂດຍມີ ສະຫາຍ ນາງ ອາລີ ວົງໜໍ່ບຸນທຳ ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ສະຫາຍ ພົນໂທ ສຈ ປອ ທອງລອຍ ສີລິວົງ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ຜູ້ຊີ້ນຳອົງການຈັດຕັ້ງມະຫາຊົນ, ສະຫາຍ ພົນຈັດຕະວາ ນາງ ໄພວອນ ອິນທະບຸດ ກຳມະການຄະນະບໍລິຫານງານສູນກາງສະຫະພັນແມ່ຍິງລາວ, ຫົວໜ້າຫ້ອງການສະຫະພັນແມ່ຍິງກອງທັບ, ມີຜູ້ຕາງໜ້າຫ້ອງການກຳມະບານກອງທັບ, ຫ້ອງການຊາວໜຸ່ມກອງທັບ, ແຂກຖືກເຊີນ, ຄະນະພັກ-ຄະນະບັນຊາ ແລະ ຄະນະນຳສະຫະພັນແມ່ຍິງ ບັນດາກົມກອງກຳລັງຫຼວງ-ກຳລັງທ້ອງຖິ່ນ ເຂົ້າຮ່ວມ.
ສະຫາຍ ພົນຈັດຕະວາ ນາງ ໄພວອນ ອິນທະບຸດ ໄດ້ກ່າວເປີດກອງປະຊຸມ ພ້ອມທັງຜ່ານບົດລາຍງານການເມືອງທັງສອງພາກ ເຊິ່ງໄດ້ຍົກໃຫ້ເຫັນ ຜົນສຳເລັດໃນການຈັດຕັ້ງປະຕິບັດ ມະຕິກອງປະຊຸມ ຜູ້ແທນສະຫະພັນແມ່ຍິງທົ່ວກອງທັບ ຄັ້ງທີ VIII ໃນໄລຍະ 5 ປີຜ່ານມາ ໃນນີ້, ໄດ້ເອົາໃຈໃສ່ເຮັດວຽກງານສຶກສາອົບຮົມການເມືອງ-ນຳພາແນວຄິດໃຫ້ສະມາຊິກສະຫະພັນແມ່ຍິງ ດ້ວຍການຈັດຕັ້ງເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ, ບັນດາມະຕິ, ຄຳສັ່ງຕ່າງໆ, ຂໍ້ກຳນົດ, ກົດລະບຽບຂອງກອງທັບ, ຂອງແມ່ຍິງ ແລະ ເອກະສານທີ່ກ່ຽວກັບແມ່ຍິງ ຢ່າງຕໍ່ເນື່ອງ, ໄດ້ຈັດຕັ້ງປາຖະກະຖາວັນສຳຄັນຕ່າງໆ ທັງຢູ່ສູນກາງ ແລະ ກົມກອງກຳລັງຫຼວງ 38 ກົມກອງ, ໄດ້ເອົາໃຈໃສ່ສ້າງແຜນກຳນົດພະນັກງານເພດຍິງ ສືບທອດປ່ຽນແທນໃຫ້ໄດ້ 3 ຮຸ່ນ, ບຳລຸງຍົກລະດັບທາງດ້ານທິດສະດີການເມືອງ-ການປົກຄອງ, ວິຊາສະເພາະ ແລະ ພາສາຕ່າງປະເທດ ຢູ່ທັງພາຍໃນ ແລະ ຕ່າງປະເທດ, ເປັນຕົວແທນປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ, ຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ໄດ້ເອົາໃຈໃສ່ປຸກລະດົມສະມາຊິກແມ່ຍິງ ສ້າງລາຍຮັບເຂົ້າຄອບຄົວ ຕາມທ່າແຮງບົ່ມຊ້ອນທີ່ມີຢູ່ກົມກອງທ້ອງຖິ່ນ ດ້ວຍການປູກຝັງ-ລ້ຽງສັດ, ຕ່ຳຫູກທໍໄໝ, ຈັກສານ ແລະ ຄ້າຂາຍ ເຮັດໃຫ້ຊີວິດການເປັນຢູ່ຂອງສະມາຊິກແມ່ຍິງນັບມື້ດີຂຶ້ນ, ໄດ້ຈັດຕັ້ງກຸ່ມທ້ອນເງິນພັດທະນາ ແລະ ກຸ່ມທ້ອນເງິນຊ່ວຍເຫຼືອເຊິ່ງກັນ ແລະ ກັນ ໃນນັ້ນ, ມີກຸ່ມທ້ອນເງິນພັດທະນາແມ່ຍິງ ຈຳນວນ 100 ກຸ່ມ, ມີສະມາສະມາຊິກທັງໝົດ 24.501 ສະຫາຍ, ມີເງິນທ້ອນ 52 ຕື້ກວ່າກີບ, ກຸ່ມທ້ອນເງິນຊ່ວຍເຫຼືອເຊິ່ງກັນ ແລະ ກັນ ມີສະມາຊິກທັງໝົດ 689 ສະຫາຍ, ມີເງິນທ້ອນ 1 ຕື້ກວ່າກີບ, ໄດ້ເອົາໃຈໃສ່ຊຸກຍູ້ຂະບວນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ຕິດພັນກັບໜ້າທີ່ການເມືອງຂອງແຕ່ລະກົມກອງ ສາມາດຄັດເລືອກໄດ້ ພົນລະເມືອງດີ 11.450 ສະຫາຍ, ພັດທະນາດີ 10.213 ສະຫາຍ, ສ້າງຄອບຄົວດີມີ 8.298 ສະຫາຍ, ບຸກຄົນ 3 ດີ ປະເພດ I ມີ 9.706 ສະຫາຍ, ບຸກຄົນ 3 ດີ ປະເພດ II ມີ 1.680 ສະຫາຍ, ບຸກຄົນຕົວແບບ 540 ສະຫາຍ, ຄອບຄົວຕົວແບບ 379 ຄອບຄົວ, ພະແນກ, ຂະແໜງ ແລະ ໜ່ວຍ 3 ດີມີ 483 ຫົວໜ່ວຍ, ກົມກອງ 3 ດີມີ 456 ກົມກອງ, ໄດ້ເອົາໃຈໃສ່ປະຕິບັດນະໂຍບາຍ ຍ້ອງຍໍຜົນງານ, ເລື່ອນຊັ້ນ, ເລື່ອນໜ້າທີ່ ຕໍ່ຜູ້ທີ່ມີຜົນງານດີເດັ່ນ, ເຄື່ອນໄຫວຢ້ຽມຢາມ, ອວຍພອນຄະນະນຳແຕ່ລະຂັ້ນ, ພະນັກງານປະຕິວັດອາວຸໂສບຳນານ ທັງສູນກາງ ແລະ ທ້ອງຖິ່ນ ເນື່ອງໃນໂອກາດວັນປະຫວັດສາດສຳຄັນຕ່າງໆ, ເຈັບເປັນນອນໂຮງໝໍ, ເສຍຊີວິດ, ອັກຄີໄພ ແລະ ອື່ນໆ, ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ສະມາຊິກແມ່ຍິງໄດ້ການຮັບການຍ້ອງຍໍ ປະເພດຫຼຽນໄຊອິດສະຫຼະ ຊັ້ນ II ມີ 23 ສະຫາຍ, ຫຼຽນໄຊອິດສະຫຼະ ຊັ້ນ III ມີ 1.468 ສະຫາຍ, ຫຼຽນໄຊແຮງງານ ຊັ້ນ II ມີ 2.482 ສະຫາຍ, ຊັ້ນ III ມີ 3.428 ສະຫາຍ, ຫຼຽນໄຊພິລະອາດຫານ ຊັ້ນ II ມີ 56 ສະຫາຍ, ຫຼຽນໄຊພິລະອາດຫານ ຊັ້ນ III ມີ 257 ສະຫາຍ, ຫຼຽນກາແຮງງານ 2.614 ສະຫາຍ, ໃບຍ້ອງຍໍລັດຖະບານ 1.415 ສະຫາຍ, ໃບຍ້ອງຍໍກະຊວງປ້ອງກັນປະເທດ 956 ສະຫາຍ ແລະ ໃບຍ້ອງຍໍກົມໃຫຍ່ການເມືອງກອງທັບ 689 ສະຫາຍ. ໃນກອງປະຊຸມ ຍັງໄດ້ຮັບຟັງການປະກອບຄຳຄິດເຫັນ ຈາກຄະນະພັກ-ຄະນະບັນຊາ ແລະ ຄະນະນຳສະຫະພັນແມ່ຍິງບັນດາກົມກອງ, ຮັບຟັງການລາຍງານຂອງບຸກຄົນ ແລະ ຄອບຄົວຕົວແບບດ້ານຕ່າງໆ ພ້ອມທັງໄດ້ມອບໃບຍ້ອງຍໍ ໃຫ້ຄະນະພັກ-ຄະນະບັນຊາ, ພະແນກ, ຂະແໜງ, ໜ່ວຍສະຫະພັນແມ່ຍິງເອກະລາດ, ບຸກຄົນ ແລະ ຄອບຄົວຕົວແບບ ຕື່ມອີກ.
ໃນໂອກາດນີ້, ສະຫາຍ ພົນໂທ ສຈ ປອ ທອງລອຍ ສີລິວົງ ແລະ ສະຫາຍ ນາງ ອາລີ ວົງໜໍ່ບຸນທຳ ໄດ້ຜັດປ່ຽນກັນມີຄຳເຫັນໂອ້ລົມຫຼາຍບັນຫາສຳຄັນ ເພື່ອເປັນທິດທາງ ແລະ ບ່ອນອີງ ໃຫ້ຄະນະນຳສະຫະພັນແມ່ຍິງທົ່ວກອງທັບ ໃນການນຳພາ-ຊີ້ນຳສະມາຊິກສະຫະພັນແມ່ຍິງ ເຄື່ອນໄຫວວຽກງານຕາມພາລະບົດບາດຂອງຕົນ ໃຫ້ໄດ້ຮັບໝາກຜົນສູງກວ່າເກົ່າ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ