mps.gov.la ວາລະສານປ້ອງກັນຊາດ
ວັນທີ 18 ກຸມພາ 2025 ນີ້, ສະຫະພັນແມ່ຍິງ ສະພາແຫ່ງຊາດ ແລະ ຄອບຄົວການນໍາຂັ້ນສູງ ນໍາພາໂດຍ ສະຫາຍ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ເຄື່ອນໄຫວຢ້ຽມຢາມ ແລະ ມອບເຄື່ອງອຸປະໂພກ-ບໍລິໂພກ ໃຫ້ກອງພັນໃຫຍ່ 497 ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ, ມີສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ສະຫາຍ ພົນຈັດຕະວາ ນາງ ໄພວອນ ອິນທະບຸດ ກໍາມະການຄະນະບໍລິຫານງານສູນກາງສະຫະພັນແມ່ຍິງລາວ, ຫົວໜ້າຫ້ອງການສະຫະພັນແມ່ຍິງກອງທັບ, ຄອບຄົວການນໍາສະພາແຫ່ງຊາດ, ຄະນະສະຫະພັນແມ່ຍິງສະພາແຫ່ງຊາດ ແລະ ຫ້ອງການສະຫະພັນແມ່ຍິງກອງທັບ ເຂົ້າຮ່ວມ.
ໂອກາດນີ້, ສະຫາຍ ນາງ ສູນທອນ ໄຊຍະຈັກ ໄດ້ກ່າວມອບເຄື່ອງ ເຊິ່ງລວມມີ ເຄື່ອງອຸປະໂພກ-ບໍລິໂພກ ແລະ ເຄື່ອງກິລາ ລວມມູນຄ່າທັງໝົດ 50.000.000 ກີບ ແລະ ເງິນສົດຈໍານວນ 50.000.000 ກີບ ພ້ອມທັງ ອວຍພອນອັນປະເສີດ ໃຫ້ນາຍ ແລະ ພົນທະຫານ ທົ່ວກອງພັນໃຫຍ່ 497 ຈົ່ງມີສຸຂະພາບແຂງແຮງ, ສືບຕໍ່ເຮັດສໍາເລັດໜ້າທີ່ການເມືອງຂອງກົມກອງ ໃນການປະຕິບັດໜ້າທີ່ ເປັນຮົ້ວປ້ອງກັນຊາດທີ່ເຂັ້ມແຂງ ແລະ ສ້າງຜົນງານອັນໃໝ່ໃຫຍ່ຫຼວງກວ່າເກົ່າ.
ສະຫາຍ ພັນເອກ ພອນໄຊ ບໍລະດົມ ຫົວໜ້າການເມືອງ ກອງພັນໃຫຍ່ 497 ໄດ້ຕາງໜ້າຄະນະພັກ-ຄະນະບັນຊາ ແລະ ພະນັກງານ-ນັກຮົບ ກ່າວຮັບເຄື່ອງ ພ້ອມທັງສະແດງຄວາມຂອບໃຈ ມາຍັງ ສະຫະພັນແມ່ຍິງສະພາແຫ່ງຊາດ ແລະ ຄອບຄົວການນໍາສະພາແຫ່ງຊາດ ທີ່ມີຄວາມເປັນຫ່ວງເປັນໃຍຕໍ່ພະນັກງານ-ນັກຮົບ ກອງພັນໃຫຍ່ 497 ຈຶ່ງໄດ້ນໍາເອົາເຄື່ອງອຸປະໂພກ-ບໍລິໂພກ ແລະ ເຄື່ອງກິລາ ມາມອບໃຫ້ ໃນຄັ້ງນີ້, ເຊິ່ງເປັນການປະກອບສ່ວນອັນສໍາຄັນ ເຂົ້າໃນການຊຸກຍູ້ພະນັກງານ-ນັກຮົບໃນກົມກອງ ໃຫ້ມີກໍາລັງໃຈປະຕິບັດໜ້າທີ່ການເມືອງຂອງຕົນ ພ້ອມທັງ ໃຫ້ຄຳໝັ້ນສັນຍາວ່າ: ຈະນໍາເອົາເຄື່ອງຈໍານວນດັ່ງກ່າວ ໄປແຈກຢາຍໃຫ້ພະນັກງານ-ນັກຮົບຢ່າງທົ່ວເຖິງ ແລະ ໝູນໃຊ້ໃຫ້ເກີດປະໂຫຍດສູງສຸດ.
ຈາກນັ້ນ, ຄະນະພັກ-ຄະນະບັນຊາ ກອງພັນໃຫຍ່ 497 ໄດ້ນໍາພາຢ້ຽມຊົມ ການສະແດງທາງດ້ານຍຸດທະວິທີວິຊາສະເພາະ ແລະ ການຫັດກາຍມວຍຕ່າງໆ ຂອງເຫຼົ່າຮົບຕີພິເສດ.
ພາຍຫຼັງສໍາເລັດການຢ້ຽມຢາມ ກອງພັນໃຫຍ່ 497, ສະຫະພັນແມ່ຍິງສະພາແຫ່ງຊາດ ແລະ ຄອບຄົວການນໍາສະພາແຫ່ງຊາດ ຍັງໄດ້ນໍາເອົາເງິນສົດ ແລະ ເຄື່ອງໃຊ້ຈໍາເປັນຈໍານວນໜຶ່ງ ໄປມອບໃຫ້ໂຮງຮຽນສີບຸນເຮືອງ ບ້ານເກີນ ເມືອງທຸລະຄົມ ແຂວງວຽງຈັນ ຕື່ມອີກ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ
ກ່ຽວກັບ mps
