ຫົວໜ້າການເມືອງ ກອງບັນຊາການທະຫານຊາຍເເດນ ເຄື່ອນໄຫວຢ້ຽມຢາມ ກອງຮ້ອຍທະຫານຊາຍເເດນ 543

ວັນທີ 22 ກຸມພາ 2025 ນີ້, ສະຫາຍ ພົນຈັດຕະວາ ສີ ທະວີໄຊ ຫົວໜ້າການເມືອງ ກອງບັນຊາການທະຫານຊາຍເເດນ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມພະນັກງານ-ນັກຮົບ ກອງຮ້ອຍທະຫານຊາຍແດນ 543 ແຂວງອັດຕະປື, ໂດຍການຕ້ອນຮັບ ຂອງຄະນະພະແນກການທີ່ກ່ຽວຂ້ອງ, ຄະນະກອງຮ້ອຍທະຫານຊາຍເເດນ 4 ກົມກອງ ແລະ ພະນັກງານ-ນັກຮົບ ເຂົ້າຮ່ວມ.
ການເຄື່ອນໄຫວໃນຄັ້ງນີ້, ສະຫາຍ ພົນຈັດຕະວາ ສີ ທະວີໄຊ ໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ-ນັກຮົບ ທີ່ໄດ້ເອົາໃຈໃສ່ເຄື່ອນໄຫວເຮັດໜ້າທີ່ຂອງຕົນ ຕາມການໝອບໝາຍ ຂອງຂັ້ນເທິງ ຈົນມີຜົນສໍາເລັດເປັນກ້າວໆ ເຖິງວ່າຈະມີອຸປະສັກຫຍຸ້ງຍາກປານໃດກໍຕາມ ແຕ່ທຸກສະຫາຍ ກໍຍັງມີແນວຄິດອຸ່ນອຽນ, ທຸ່ນທ່ຽງ ຕໍ່ໜ້າທີ່ຂອງຕົນ ເພື່ອປະກອບສ່ວນເຂົ້າໃນວຽກງານລວມຂອງຊາດ ໂດຍສະເພາະແມ່ນການປ້ອງກັນຊາຍເເດນ ດ້ວຍຄວາມຮັບຜິດຊອບສູງ ພ້ອມທັງ ເນັ້ນໜັກໃຫ້ຜູ້ຮັບຜິດຊອບແຕ່ລະປ້ອມເອົາໃຈໃສ່ປ້ອງກັນເວນຍາມ, ຈັດຕັ້ງກຳລັງເຄື່ອນໄຫວກວດກາ ສາລະເວນ ຕິດຕາມກຳສະພາບການ ບໍ່ໃຫ້ພວກກຸ່ມຄົນບໍ່ດີເຂົ້າມາກໍ່ຄວາມບໍ່ສະຫງົບໃນຂອບເຂດຮັບຜິດຊອບຂອງຕົນ.
ໂອກາດດຽວກັນນີ້, ສະຫາຍພົນຈັດຕະວາ ສີ ທະວີໄຊ ພ້ອມດ້ວຍຄະນະ ຍັງໄດ້ມອບເຄື່ອງອຸປະໂພກ-ບໍລິໂພກ ຈຳນວນໜຶ່ງ ໃຫ້ພະນັກງານ-ນັກຮົບ ທີ່ປະຈຳການແຕ່ລະປ້ອມ ຕື່ມອີກ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ