ປະກາດການເລື່ອນຊັ້ນນາຍທະຫານ ຊັ້ນພັນຕີ ຂຶ້ນ ຊັ້ນພັນໂທ ບັນດາກົມກອງກຳລັງຫຼວງ ແລະ ທ້ອງຖິ່ນ ຂອງກະຊວງປ້ອງກັນປະເທດ

ພິທີ ປະກາດການເລື່ອນຊັ້ນນາຍທະຫານ ຊັ້ນພັນຕີ ຂຶ້ນ ຊັ້ນພັນໂທ ບັນດາກົມກອງກໍາລັງຫຼວງ ແລະ ທ້ອງຖິ່ນ ຂອງກະຊວງປ້ອງກັນປະເທດ ໄດ້ຈັດຂຶ້ນໃນວັນທີ 1 ເມສາ 2025 ນີ້, ຢູ່ທີ່ສະໂມສອນກົມໃຫຍ່ການເມືອງກອງທັບ ໂດຍການເປັນປະທານ ຂອງສະຫາຍ ພົນຕີ ສອນທອງ ພົມລາວົງ ກໍາມະການຄະນະປະຈຳພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ມີບັນດາຄະນະນໍາກົມ, ຫ້ອງການ, ກົມກອງກຳລັງຫຼວງ, ກຳລັງທ້ອງຖິ່ນ, ວິທະຍາຄານ, ໂຮງຮຽນ, ໂຮງໝໍ, ພະນັກງານວິຊາການ ແລະ ນາຍທະຫານທີ່ໄດ້ຮັບຊັ້ນໃໝ່ ເຂົ້າຮ່ວມ.
ສະຫາຍ ພັນເອກ ສອນໄຊ ຈັນຍາລາດ ຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການເລື່ອນຊັ້ນນາຍທະຫານ ຊັ້ນພັນຕີ ຂຶ້ນ ຊັ້ນພັນໂທ ບັນດາກົມກອງກໍາລັງຫຼວງ ແລະ ທ້ອງຖິ່ນ ຈໍານວນ ທັງໝົດ 362 ສະຫາຍ ໃນນີ້, ຢູ່ກົມໃຫຍ່ເສນາທິການກອງທັບ ຈໍານວນ 46 ສະຫາຍ, ກົມໃຫຍ່ການເມືອງກອງທັບ ຈໍານວນ 25 ສະຫາຍ, ກົມໃຫຍ່ພະລາທິການກອງທັບ ຈໍານວນ 47 ສະຫາຍ, ກົມວິທະຍາສາດ-ປະຫວັດສາດ ການທະຫານ ຈໍານວນ 2 ສະຫາຍ, ຫ້ອງວ່າການກະຊວງປ້ອງກັນປະເທດ ຈໍານວນ 3 ສະຫາຍ, ກອງພົນທີ 2 ຈໍານວນ 8 ສະຫາຍ, ກອງພົນທີ 3 ຈໍານວນ 10 ສະຫາຍ, ກອງພົນທີ 4 ຈໍານວນ 2 ສະຫາຍ, ກອງບັນຊາການທະຫານແຂວງຜົ້ງສາລີ ຈໍານວນ 9 ສະຫາຍ, ກອງບັນຊາການທະຫານແຂວງຫຼວງນໍ້າທາ ຈໍານວນ 11 ສະຫາຍ, ກອງບັນຊາການທະຫານແຂວງອຸດົມໄຊ ຈໍານວນ 8 ສະຫາຍ, ກອງບັນຊາການທະຫານແຂວງຫຼວງພະບາງ ຈໍານວນ 17 ສະຫາຍ, ກອງບັນຊາການທະຫານແຂວງຫົວພັນ ຈໍານວນ 8 ສະຫາຍ, ກອງບັນຊາການທະຫານແຂວງຊຽງຂວາງ ຈໍານວນ 16 ສະຫາຍ, ກອງບັນຊາການທະຫານແຂວງວຽງຈັນ ຈໍານວນ 12 ສະຫາຍ, ກອງບັນຊາການທະຫານນະຄອນຫຼວງວຽງຈັນ ຈໍານວນ 10 ສະຫາຍ, ກອງບັນຊາການທະຫານແຂວງບໍລິຄໍາໄຊ ຈໍານວນ 19 ສະຫາຍ, ກອງບັນຊາການທະຫານແຂວງຄໍາມ່ວນ ຈໍານວນ 13 ສະຫາຍ, ກອງບັນຊາການທະຫານແຂວງສະຫວັນນະເຂດ ຈໍານວນ 16 ສະຫາຍ, ກອງບັນຊາການທະຫານແຂວງຈໍາປາສັກ ຈໍານວນ 8 ສະຫາຍ, ກອງບັນຊາການທະຫານແຂວງເຊກອງ ຈໍານວນ 6 ສະຫາຍ, ກອງບັນຊາການທະຫານອາກາດ ຈໍານວນ 11 ສະຫາຍ, ກອງພັນໃຫຍ່ 646 ຈໍານວນ 4 ສະຫາຍ, ວິທະຍາຄານປ້ອງກັນຊາດ ໄກສອນ ພົມວິຫານ ຈໍານວນ 35 ສະຫາຍ, ວິທະຍາຄານເຕັກນິກການທະຫານ ຈໍານວນ 1 ສະຫາຍ, ໂຮງຮຽນທິດສະດີການເມືອງກອງທັບ ຈໍານວນ 8 ສະຫາຍ, ນັກຮຽນຕ່າງປະເທດ ຈໍານວນ 6 ສະຫາຍ ແລະ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ປະເທດຟີລິບປິນ ຈໍານວນ 1 ສະຫາຍ.
ໂອກາດນີ້, ສະຫາຍ ພົນຕີ ສອນທອງ ພົມລາວົງ ໄດ້ສະແດງຄວາມຊົມເຊີຍຕໍ່ບັນດານາຍທະຫານທີ່ໄດ້ຮັບການເລື່ອນຊັ້ນພັນຕີ ຂຶ້ນ ຊັ້ນພັນໂທ ພ້ອມທັງ ເນັ້ນໜັກໃຫ້ຜູ້ທີ່ໄດ້ຮັບຊັ້ນໃໝ່ ໃນຄັ້ງນີ້ ຈົ່ງສືບຕໍ່ເຝິກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງທີ່ໜັກແໜ້ນ ເຂັ້ມແຂງ, ສ້າງຕົນເອງໃຫ້ມີຄວາມຮູ້ຄວາມສາມາດ, ມີຄຸນສົມບັດສິນທໍາປະຕິວັດ ແລະ ພ້ອມກັນຕັ້ງໜ້າປັບປຸງກົມກອງຂອງຕົນ ໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ