ຄະນະກົມໂຄສະນາອົບຮົມ ກົມໃຫຍ່ການເມືອງກອງທັບ ອວຍພອນ ຄະນະກົມໂຄສະນາອົບຮົມ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ

ວັນທີ 01 ເມສາ 2025 ນີ້, ຄະນະກົມໂຄສະນາອົບຮົມ ກົມໃຫຍ່ການເມືອງກອງທັບ ນໍາພາໂດຍ ສະຫາຍ ພັນເອກ ແກ້ວສຸວັນ ຜາງພິລາວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ ພ້ອມຄະນະ ໄດ້ນໍາເອົາກະຕ່າຂອງຂວັນ ເຂົ້າຢ້ຽມຢາມ ແລະ ອວຍພອນ ຄະນະກົມໂຄສະນາອົມຮົມ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ເນື່ອງໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 64 ປີ ( 5 ເມສາ 1961-5 ເມສາ 2025 ) ທີ່ຈະມາເຖິງນີ້, ໂດຍການຕ້ອນຮັບ ຂອງສະຫາຍ ພັນເອກ ປອ ສົມພັນ ສີວົງໄຊ ຫົວໜ້າກົມໂຄສະນາອົບຮົມ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ.
ສະຫາຍ ພັນເອກ ແກ້ວສຸວັນ ຜາງພິລາວົງ ໄດ້ສະແດງຄວາມຢ້ຽມຢາມຖາມຂ່າວ ພ້ອມທັງ ຍ້ອງຍໍຊົມເຊີຍ ຕໍ່ຜົນງານ ແລະ ໄຊຊະນະ ທີ່ທົ່ວກໍາລັງປ້ອງກັນຄວາມສະຫງົບ ຍາດໄດ້ໃນຕະຫຼອດໄລຍະຜ່ານມາ, ທັງເປັນກຳລັງທີ່ຄຽງບ່າຄຽງໄຫຼ່ ກັບກອງທັບປະຊາຊົນລາວ ເພື່ອປະຕິບັດໜ້າທີ່ໃນການປົກປັກຮັກສາຄວາມສະຫງົບ-ປອດໄພ ໃຫ້ທົ່ວສັງຄົມ ກໍຄືການປົກປັກຮັກສາປະເທດຊາດໄວ້ໄດ້ຢ່າງໝັ້ນຄົງ. ພ້ອມນີ້, ຍັງໄດ້ກ່າວຄໍາອວຍພອນໄຊອັນປະເສີດ ໃຫ້ຄະນະນໍາກະຊວງປ້ອງກັນຄວາມສະຫງົບ ຕະຫຼອດຮອດພະນັກງານ-ນັກຮົບ ຈົ່ງມີສຸຂະພາບແຂງແຮງ, ສືບຕໍ່ປະສານສົມທົບກັບກໍາລັງປ້ອງກັນຊາດ ປະຕິບັດໜ້າທີ່ວຽກງານອັນມີກຽດສະຫງ່າ ທີ່ພັກ-ລັດ ແລະ ປະຊາຊົນມອບໝາຍໃຫ້, ສືບຕໍ່ພັດທະນາກໍ່ສ້າງກໍາລັງປ້ອງກັນຄວາມສະຫງົບ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.
ສະຫາຍ ພັນເອກ ປອ ສົມພັນ ສີວົງໄຊ ໄດ້ສະແດງຄວາມຂອບໃຈ ຕໍ່ ສະຫາຍ ພັນເອກ ແກ້ວສຸວັນ ຜາງພິລາວົງ ພ້ອມດ້ວຍຄະນະ ທີ່ຍາມໃດ ກໍມີຄວາມເປັນຫ່ວງເປັນໃຍ, ໃກ້ຊິດຕິດແທດກັນຕະຫຼອດມາ ໂດຍສະເພາະຂົງເຂດວຽກງານໂຄສະນາ ທີ່ເປັນກະບອກສຽງໃຫ້ກັບປະຊາຊົນ. ສອງກໍາລັງປ້ອງກັນຊາດ ແລະ ປ້ອງກັນຄວາມສະຫງົບ ຍາມໃດ ກໍມີການປະສານງານພົວພັນຮ່ວມມືຊ່ວຍເຫຼືອເຊິ່ງກັນຫຼາຍດ້ານ ທີ່ປິ່ນອ້ອມໜ້າທີ່ການເມືອງ ຂອງສອງກໍາລັງ ນັບມື້ແໜ້ນແຟ້ນຍິ່ງໆ ຂຶ້ນ. ໂອກາດນີ້, ສອງພາກສ່ວນ ຍັງໄດ້ແຂ່ງຂັນກິລາມິດຕະພາບ ເພື່ອຮັດແໜ້ນຄວາມສາມັກຄີຕື່ມອີກ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ