ວາລະສານປ້ອງກັນຊາດ ອວຍພອນ ວາລະສານປ້ອງກັນຄວາມສະຫງົບ

(ໃນໂອກາດວັນສ້າງຕັ້ງກຳລັງ ປກສ ຄົບຮອບ 64 ປີ)
ຄະນະບັນນາທິການວາລະສານປ້ອງກັນຊາດ ນຳໂດຍ ພັທ ບຸນໄມ ແສງອາລຸນ ຫົວໜ້າບັນນາທິການວາລະສານປ້ອງກັນຊາດພ້ອມດ້ວຍຄະນະ ໄດ້ນໍາເອົາກະຕ່າຂອງຂວັນເຂົ້າອວຍພອນ ພັທ ແສງເພັດ ສະໄໝໄຊຍະສິດ ຫົວໜ້າບັນນາທິການວາລະສານປ້ອງກັນຄວາມສະຫງົບ ພ້ອມດ້ວຍຄະນະ ເນື່ອງໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 64 ປີ ( 5 ເມສາ 1961 – 5 ເມສາ 2025 ) ທີ່ໃກ້ຈະມາເຖິງນີ້, ໃນວັນທີ 2 ເມສາ 2025 ຢູ່ທີ່ຫ້ອງມູນເຊື້ອ ກົມສື່ມວນຊົນປ້ອງກັນຄວາມສະຫງົບ ໂດຍມີຄະນະບັນຊາ,ພະນັກງານ-ນັກຮົບທັງສອງພາກສ່ວນ ເຂົ້າຮ່ວມ.
ໂອກາດນີ້, ຫົວໜ້າບັນນາທິການວາລະສານປ້ອງກັນຊາດ ໄດ້ນຳເອົາຄວາມຢ້ຽມຢາມຖາມຂ່າວ ແລະ ຄໍາອວຍພອນໄຊອັນປະເສີດ ມາຍັງຄະນະພັກ-ຄະນະກອງບັນນາທິການ ຕະຫຼອດຮອດນາຍ ແລະ ພົນຕຳຫຼວດ ພາຍໃນກອງບັນນາທິການວາລະສານ ປກສ ຈົ່ງມີສຸຂະພາບແຂງແຮງ, ມີຄວາມສຸກທາງກາຍ ແລະ ໃຈ, ມີຄວາມສຸກສ່ວນຕົວ ແລະ ຄອບຄົວ, ສືບຕໍ່ນຳພາວຽກງານວາລະສານ ປກສ ໃຫ້ກ້າວໜ້າຂຶ້ນໄປເລື່ອຍໆ.
ໂອກາດດຽວກັນ, ພັທ ແສງເພັດ ສະໄໝໄຊຍະສິດ ຫົວໜ້າບັນນາທິການວາລະສານປ້ອງກັນຄວາມສະຫົງບໄດ້ກ່າວສະແດງຄວາມຂອບໃຈ ຕໍ່ຄະນະບັນນາທິການວາລະສານປ້ອງກັນຊາດ ທີ່ໄດ້ນຳເອົາກະຕ່າຂອງຂວັນ ແລະ ຄໍາອວຍພອນອັນປະເສີດມາຢ້ຽມຢາມຖາມຂ່າວພະນັກງານ-ນັກຮົບວາລະສານ ປກສ ໃນໂອກາດທີ່ມີຄວາມໝາຍສຳຄັນນີ້ ແລະ ຂໍອວຍພອນໄຊໃຫ້ທຸກສະຫາຍໃນບັນນາທິການວາລະສານປ້ອງກັນຊາດຈົ່ງມີສຸຂະພາບແຮງແຮງ, ມີພາລະໄມສົມບູນ, ຈົ່ງປະສົບຜົນສໍາເລັດໃນທຸກໜ້າທີ່ວຽກງານການເມືອງທີ່ມີກຽດສະຫງ່າ ເຊັ່ນດຽວກັນ.
ແຫຼ່ງທີ່ມາຂອງຂໍ້ມູນ: ເພກເຟສບຸກວາລະສານປ້ອງກັນຄວາມສະຫງົບ