ຮອງຫົວໜ້າກົມໃຫຍ່ເສນາທິການກອງທັບ ລົງຢ້ຽມຢາມ ແລະ ກວດກາເບິ່ງສະໜາມການເຝິກຊ້ອມກອບກູ້ໄພພິບັດຮ່ວມ 3 ກອງທັບ

ເນື່ອງໃນໂອກາດທີ່ເດີນທາງມາເຂົ້າຮ່ວມພິທີປີດ ການເຝິກຊ້ອມກອບກູ້ໄພພິບັດຮ່ວມ 3 ກອງທັບ ທີ່ຣາຊະອານາຈັກກຳປູເຈຍ ເປັນເຈົ້າພາບ ວັນທີ 23 ພະຈິກ 2024 ນີ້, ທ່ານ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ, ຮອງຫົວໜ້າຄະນະຊີ້ນຳ ການເຝິກຊ້ອມກອບກູ້ໄພພິບັດຮ່ວມ 3 ກອງທັບ (ລາວ, ຫວຽດນາມ ແລະ ກຳປູເຈຍ) ພ້ອມດ້ວຍຄະນະ ໄດ້ລົງຢ້ຽມຢາມ ແລະ ກວດກາເບີ່ງສະໜາມເຝີກຊ້ອມກອບກູ້ໄພພິບັດຮ່ວມ 3 ກອງທັບ, ໂດຍການຕ້ອນຮັບຂອງທ່ານ ພົນຕີ ແປນ ສຸກຣິດວິດເຢຍ ຫົວໜ້າສໍານັກງານເຝີກອົບຮົມ, ປະທານອະນຸກຳມະການເຝີກຊ້ອມກອບກູ້ ໄພພິບັດ ກຳປູເຈຍ-ລາວ-ຫວຽດນາມ ແຫ່ງ ກອງທັບຣາຊະອານາຈັກກຳປູເຈຍ ພ້ອມດ້ວຍຄະນະ, ມີຄະນະຊີ້ນຳພາກສະໜາມ ຂອງກອງທັບປະຊາຊົນລາວ ແລະ ຫວຽດນາມ ເຂົ້າຮ່ວມ.
ການລົງຢ້ຽມຢາມ ແລະ ກວດກາເບີ່ງສະໜາມເຝີກຊ້ອມກອບກູ້ໄພພິບັດຮ່ວມ 3 ກອງທັບ ໃນຄັ້ງນີ້, ກໍເພື່ອເບີ່ງການກະກຽມຄວາມພ້ອມຮອບ ດ້ານຂອງເຈົ້າພາບ ໃນການດຳເນີນພິທີປີດການເຝີກຊ້ອມ, ການຈັດວາງກຳລັງ, ຮູບແບບການສະແດງ ແລະ ຮູບການເຄື່ອນໄຫວຕ່າງໆ ພ້ອມທັງ ເປັນການເອກະພາບແຜນການເຄື່ອນໄຫວ ຂອງ 3 ລັດຖະມົົນຕີກະຊວງປ້ອງກັນປະເທດ ລາວ-ຫວຽດນາມ-ກຳປູເຈຍ ທີ່ຈະເດີນທາງມາເຂົ້າຮ່ວມພິທີປີດການເຝີກຊ້ອມ ໃນວັນທີ 25 ພະຈິກ 2024 ນີ້ ໃຫ້ມີຄວາມເປັນເອກະພາບກັນ ເພື່ອຄວາມເປັນລະບຽບຮຽບຮ້ອຍ ເຮັດໃຫ້ການເຝີກຊ້ອມຮ່ວມໃນຄັ້ງນີ້ ມີຜົນສຳເລັດຢ່າງຈົບງາມ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ