ລັດຖະມົນຕີກະຊວງປ້ອງກັນປະເທດແຫ່ງ ສປ ຈີນ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ

ໃນວັນທີ 13 ກັນຍາ 2017, ທ່ານ ພົນໂທ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ໄດ້ຕ້ອນຮັບຜູ້ແທນທະຫານຂັ້ນສູງ ສປ ຈີນ ເຊິ່ງນໍາໂດຍທ່ານ ພົນເອກ ສາງວ້ານສວນ ທີ່ປຶກສາແຫ່ງລັດ, ລັດຖະມົນຕີກະຊວງປ້ອງກັນປະເທດ ແຫ່ງ ສປ ຈີນ

ພິທີຕ້ອນຮັບໄດ້ຈັດຂຶ້ນຢ່າງສົມກຽດທີ່ກະຊວງປ້ອງກັນປະເທດ, ຫຼັງຈາກນັ້ນກໍ່ໄດ້ມີການພົບປະສອງຝ່າຍ ລາວ-ຈີນ ແລະ ໄດ້ແຈ້ງສະພາບການພົ່ນເດັ່ນທາງດ້ານການເມືອງເສດຖະກິດ-ສັງຄົມຂອງສອງປະເທດ ໂດຍສະເພາະແມ່ນດ້ານວຽກງານປ້ອງກັນຊາດທີ່ຕ່າງຝ່ານມີຄວາມສົນໃຈ ແລະ ໄດ້ທົບທວນຄືນການຮ່ວມມືລະຫວ່າງສອງກະຊວງປ້ອງກັນປະເທດ ລາວ-ຈີນ, ຈີນ-ລາວ ໃນໄລຍະຜ່ານມາ ແລະ ທິດທາງຮ່ວມມືໃນຕໍ່ໜ້າ, ທັງນີ້ ຍັງແນ່ໃສ່ເພີ່ມທະວີການຮ່ວມມືດ້ານການທະຫານຢ່່າງຮອບດ້ານລະຫວ່າງສອງກະຊວງປ້ອງກັນປະເທດ ລາວ-ຈີນ ໃຫ້ມີຄວາມເຂັ້ມແຂງ ແລະ ຂະຫຍາຍຕົວຢ່າງບໍ່ຢຸດຢັ້ງ. ສອງຝ່າຍຍັງໄດ້ລົງນາມແຜນການຮ່ວມມືນໍາກັນໃນການແລກປ່ຽນຄະນະຜູ້ແທນການທະຫານຂັ້ນສູງ, ການກໍ່ສ້າງບຸກຄະລາກອນ, ປັບປຸງກົນໄກຄົບຖ້ວນວຽກງານການຮ່ວມມືປ້ອງກັນຊາຍແດນ, ວຽກງານການເມືອງ ແລະ ສປ ຈີນ ເຫັນດີຈະສືບຕໍ່ໃຫ້ການຊ່ວຍເຫຼືອທາງດ້ານອຸປະກອນເຕັກນິກ ທາງດ້ານການທະຫານໃຫ້ແກ່ກອງທັບປະຊາຊົນລາວ.

ໂອກາດນີ້, ທ່ານ ພົນໂທ ຈັນສະໝອນ ຈັນຍາລາດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ພົນເອກ ສາງວ້ານສວນ ພ້ອມຄະນະຜູ້ແທນການທະຫານຂັ້ນສູງ ສປ ຈີນ ເຊິ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນການຮ່ວມມືລະຫວ່າງປະຊາຊົນສອງຊາດ ລາວ-ຈີນໃຫ້ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວທັງທາງກວ້າງ ແລະ ທາງເລິກ ພ້ອມທັງສະແດງຄວາມຂອບໃຈຕໍ່ລັດຖະບານ ສປ ຈີນ ກໍຄືກະຊວງປ້ອງກັນປະເທດ ສປ ຈີນ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອແກ່ ສປປ ລາວ ດ້ວຍດີຕະຫຼອດມາ. ພ້ອມດຽວກັນນີ້, ກໍ່ໄດ້ມີພິທີປະດັບຫຼຽນໄຊພັດທະນາຊັ້ນ I ຢ່າງສົມກຽດໃຫ້ແກ່ກອງທັບປົດປ່ອຍປະຊາຊົນຈີນ ທີ່ມີຜົນງານຄຸນງາມຄວາມດີປະກອບສ່ວນຊ່ວຍເຫຼືອລ້າທາງດ້ານວັດຖຸ-ອຸປະກອນ ແລະ ພາຫະນະເຂົ້າໃນການກະກຽມ ແລະ ຈັດຕັ້ງກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທທີ 10 ທີ່ກະຊວງປ້ອງກັນປະເທດ ແຫ່ງ ສປປ ລາວຮັບກຽດເປັນເຈົ້າພາບໄດ້ຮັບຜົນສໍາເລັດເປັນຢ່າງດີ. ຜົນງານດັ່ງກ່າວ ເປັນການປະກອບສ່ວນທີ່ສໍາຄັນໃນການເສີມຂະຫຍາຍພົວພັນມິດຕະພາບ ແລະ ການຮ່ວມມືຮອບດ້ານ ລາວ-ຈີນຢ່າງບໍ່ຢຸດຢັ້ງ..