ໜ່ວຍຊາວໜຸ່ມ ກອງວາລະສານປ້ອງກັນຊາດ ສະຫຼຸບວຽກງານປະຈຳປີ 2023 ແລະ ວາງທິດທາງແຜນການ ປີ 2024.

ໜ່ວຍຊາວໜຸ່ມກອງວາລະສານປ້ອງກັນຊາດໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຊາວໜຸ່ມປະຈໍາປີ 2023 ແລະ ວາງທິດທາງແຜນການວຽກງານປີ 2024 ຂຶ້ນ ໃນວັນທີ 22 ກຸມພາ 2024 ໂດຍການເຂົ້າຮ່ວມຂອງສະຫາຍ ພັ.ທ ຄຳແສນ ສຸວັນນະຜ່ອງໃສ ຮອງຫົວໜ້າກອງວາລະສານປ້ອງຊາດ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີສະຫາຍ ຮ.ອ ຊາຍຊະນິດ ຄັດຕະມອນ ເລຂາໜ່ວຍຊາວໜຸ່ມ ພ້ອມດ້ວຍຄະນະ, ຕະຫຼອດຮອດສະມາຊິກຊາວໜຸ່ມ ເຂົ້າຮ່ວມ.
ສະຫາຍ ຮ.ອ ຊາຍຊະນິດ ຄັດຕະມອນ ເລຂາໜ່ວຍຊາວໜຸ່ມກອງວາລະສານປ້ອງກັນຊາດ ຂຶ້ນຜ່ານບົດສະຫຼຸບ ແລະ ທິດທາງໃນຕໍ່ໜ້າເຊິ່ງສະຫາຍໄດ້ຍົກໃຫ້ເຫັນຜົນງານການເຄື່ອນໄຫວທີ່ຍາດມາໄດ້ໃນໄລຍະ 1 ປີຜ່ານມາ ເປັນຕົ້ນແມ່ນ ເຂົ້າຮ່ວມກອງປະຊຸມເຜີຍແຜ່ເຊື່ອຊຶມ ແລະ ຜັນຂະຫຍາຍຜົນສໍາເລັດກອງປະຊຸມກາງສະໄໝຂອງຄະນະບໍລິຫານງານສູນກາງພັກສະໄໝທີ XI, ເຂົ້າຮ່ວມຮັບຟັງປາຖະກະຖາ ວັນຊາດທີ 2 ທັນວາ ຄົບຮອບ 48 ປີ, ວັນຄ້າຍວັນເກີດ ປະທານ ໄກສອນ ພົມວິຫານຄົບຮອບ 103 ປີ ແລະ ວັນລັດຖະທໍາມະນູນແຫ່ງ ສປປ ລາວ ຄົບຮອບ 32 ປີ, ລົງເຄື່ອນໄຫວລົງເກັບກໍາຂໍ້ມູນຢູ່ບັນດາກົມກອງກໍາລັງຫຼວງ ແລະ ກໍາລັງທ້ອງຖິ່ນ 13 ຄັ້ງ, ອອກແບບ ແລະ ກວດແກ້ຈັດໜ້າວາລະສານປ້ອງກັນຊາດ ປະຈໍາເດືອນ 1-12 ປີ 2023, ອອກແບບ, ຈັດໜ້າວາລະສານປ້ອງກັນຊາດ ປະຈໍາດືອນ 1 ປີ 2024 ( ສະບັບພິເສດ ) ຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ແຈກຢາຍ ແລະ ຈໍາໜ່າຍຮູບພາບຄະນະປະຈໍາພັກກະຊວງ ສະໄໝທີ V 33 ໃບ, ໂປຼດສະເຕີ 30 ແຜນ, ຮູບພາບຄະນະບໍລິຫານງານກົມການເມືອງສູນກາງພັກ ສະໄໝທີ XI 127 ໃບ, ໂປຼດສະເຕີ 119 ແຜນ, ແຈກຢາຍວາລະສານ, ໜັງສືພິມ, ຂ່າວຄົ້ນຄ້ວາ ປີ 2023 ໃຫ້ບັນດາກົມກອງກໍາລັງຫຼວງ ແລະ ກໍາລັງທ້ອງຖິ່ນ, ເກັບກໍາຮູບພາບລົງປື້ມວາລະສານປ້ອງກັນຊາດ ໄດ້ 16 ຮູບພາບ ແລະ ກວດແກ້ບົດລົງວາສະສານປ້ອງກັນຊາດ 13 ບົດ, ເກັບກໍາຮູບພາບການເຄື່ອນໄຫວຂອງຄະນະປະຈໍາພັກກະຊວງໄດ້ 837 ພ້ອມຄໍາອະທິບາຍ, ສໍາເນົາຮູບພາບມູນເຊື້ອ 477 ຮູບພາບ ແລະ ເກັບກໍາຂ່າວກອງປະຊຸມຕ່າງໆທີ່ກະຊວງ ແລະ ກົມໃຫຍ່ຈັດຂຶ້ນ ເນື່ອງໃນໂອການວັນສໍາຄັນຕ່າງໆ ຂອງຊາດ, ຂອງພັກ ແລະ ກອງທັບ 39 ຄັ້ງ, ສັງລວມຂ່າວເດັ່ນພາຍໃນປະເທດ, ຂອງກອງທັບ, ອັບເດດລົງ “ເວັບໄຊ’’ www.mps.gov.la ວາລະສານປ້ອງກັນຊາດ ໄດ້ 54 ບົດຂ່າວ, ມີຜູ້ເຂົ້າຊົມ 1,167 ເທື່ອຄົນ.
ໃນຕອນທ້າຍ ກອງປະຊຸມ ສະຫາຍ ພັ.ທ ຄໍາແສນ ສຸວັນນະຜ່ອງໃສ ໄດ້ໃຫ້ທິດຊີ້ນໍາໂອ້ລົມຕໍ່ກອງປະຊຸມ ເຊິ່ງສະແດງຄວາມຍອງຍໍ້ຊົມເຊີຍຕໍ່ກັບຜົນງານທີ່ຍາດມາໄດ້ ແລະ ຍັງໄດ້ເໜັ້ນໜັກເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມມີແນວຄິດໜັກແໜ້ນ, ມີສະຕິໃນການໃຊ້ສື່ສັງຄົມອອນໄລ໌, ປະຕິບັດລະບຽບວິໄນຂອງກອງທັບໃຫ້ເຂັ້ມງວດ, ພ້ອມກັນຍົກສູງຕໍ່ວຽກງານວິຊາສະເພາະ ແລະ ວຽກງານຂະບວນການ. ເຮັດສໍາເລັດໜ້າທີ່ ທີ່ການຈັດຕັ້ງມອບໝາຍເອົາໃຫ້ປາກົດຜົນເປັນຈິງ.