ຄະນະຊີ້ນໍາການເຝີກຊ້ອມກອບກູ້ໄພພິບັດ 3 ກອງທັບ ຕິດຕາມຮັບຊົມການສະແດງເຝີກຊ້ອມປະສານທົດລອງ ຄັ້ງທີ 1

ວັນທີ 22 ພະຈິກ 2024 , ຄະນະຊີ້ນໍາການເຝີກຊ້ອມກອບກູ້ໄພພິບັດ 3 ກອງທັບ ກຳປູເຈຍ-ລາວ-ຫວຽດນາມ ໄດ້ຕິດຕາມຮັບຊົມການສະແດງເຝີກຊ້ອມປະສານທົດລອງ ຄັ້ງທີ 1, ໂດຍມີ ທ່ານ ພົນຕີ ແປນ ສຸເກຣິດວິດເຢຍ ຫົວໜ້າສຳນັກງານສູນເຝີກອົບຮົມ, ປະທານ ອະນຸກຳມະການເຝີກຊ້ອມ ກຳປູເຈຍ-ລາວ-ຫວຽດນາມ ພ້ອມຄະນະ, ທ່ານ ພັນໂທ ຄຳຜາຍ ອ້ວນວິໄລ ຮອງຫົວໜ້າກົມອົບຮົມ ກົມໃຫຍ່ເສນາທິການກອງທັບ, ຫົວໜ້າຄະນະເຝີກຊ້ອມກອບກູ້ໄພພິບັດ 3 ກອງທັບ ພ້ອມຄະນະ ແລະ ທ່ານ ພັນເອກພິເສດ ວໍ້ ວັນ ບ໋າ ຮອງຫົວໜ້າການທະຫານ ກອງບັນຊາການທະຫານເຂດ 5 ພ້ອມຄະນະ.
ການຕິດຕາມຮັບຊົມການສະແດງເຝີກຊ້ອມປະສານທົດລອງ ໃນຄັ້ງນີ້ ກໍເພື່ອເປັນການສັງລວມຄືນບັນດາເນື້ອໃນ, ບາດກ້າວດຳເນີນການເຝີກຊ້ອມຮ່ວມ ຂອງ 3 ກອງທັບ ເພື່ອກະກຽມຄວາມພ້ອມໃຫ້ການເຝີກຊ້ອມສະແດງຕົວຈິງ ໃຫ້ເຕັມໄປດ້ວຍເນື້ອໃນ, ຄວາມໝາຍເລິກເຊິ່ງ ແລະ ຮັບປະກັນໃຫ້ມີຄວາມປອດໄພ 100%. ພ້ອມທັງ ເປັນການສະແດງຜ່ານໃຫ້ຄະນະຊີ້ນຳ, ຄະນະອະນຸກຳ ມະການຮັບຜິດຊອບ ໄດ້ປະກອບຄຳຄິດເຫັນເພື່ອນຳໄປປັບປຸງແກ້ໄຂຂອດທີ່ຍັງຄົງຄ້າງໃຫ້ດີຂຶ້ນ ເພື່ອຮັບປະກັນໃຫ້ມື້ເຝິກຊ້ອມສະແດງຕົວຈິງໃນວັນທີ 25 ພະຈິກ 2024 ນີ້ ມີຜົນສໍາເລັດຢ່າງຈົບງາມ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ