mps.gov.la ວາລະສານປ້ອງກັນຊາດ
ກອງປະຊຸມຄັ້ງທີ 47 ຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ປະຈຳປີ 2025 ໄດ້ຈັດຂຶ້ນ ໃນວັນທີ 9 ມັງກອນ 2025 ນີ້, ຢູ່ນະຄອນຫຼວງວຽງຈັນ ໂດຍການເປັນປະທານຊີ້ນຳກອງປະຊຸມຂອງ ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຟ້າມ ມິງຈິງ ນາຍົກລັດຖະມົນຕີ ແຫ່ງ ສສ ຫວຽດນາມ, ມີການນຳພັກ, ລັດ, ບັນດາລັດຖະມົນຕີ, ຮອງລັດຖະມົນຕີ ຈາກກະຊວງ, ຂະແໜງການກ່ຽວຂ້ອງ ຂອງທັງສອງປະເທດ ເຂົ້າຮ່ວມ ແລະ ທັງສອງຝ່າຍພ້ອມກັນຕີລາຄາຜົນຂອງການຈັດຕັ້ງປະຕິບັດ ຂໍ້ຕົກລົງຂອງການນໍາຂັ້ນສູງ ກໍຄື ແຜນການຮ່ວມມື ລະຫວ່າງສອງລັດຖະບານ ປະຈຳປີ 2024 ແລະ ປຶກສາຫາລືວາງທິດທາງແຜນການຮ່ວມມື ປີ 2025. ໂອກາດດັ່ງກ່າວ, ນາຍົກລັດຖະມົນຕີ ສອງປະເທດ ໄດ້ຕີລາຄາສູງ ຕໍ່ບັນດາຜົນສຳເລັດ ຂອງການຈັດຕັ້ງປະຕິບັດຂໍ້ຕົກລົງແຜນການຮ່ວມມື ປະຈໍາປີ 2024 ກໍຄືທິດທາງແຜນການຮ່ວມມື ປະຈໍາປີ 2025. ໃນນັ້ນ, ການຮ່ວມມືດ້ານການເມືອງ-ການຕ່າງປະເທດ, ປ້ອງກັນຊາດ-ປ້ອງກັນຄວາມສະຫງົບ ສືບຕໍ່ມີສະຖຽນລະພາບ, ສ້າງຄວາມໄວ້ເນື້ອເຊື່ອໃຈ ເຊິ່ງກັນ ແລະ ກັນ ນັບມື້ນັບຫຼາຍຂຶ້ນ, ມູນຄ່າການຄ້າຂອງສອງປະເທດ ບັນລຸໄດ້ຫຼາຍກວ່າ 2 ຕື້ໂດລາສະຫະລັດ, ເພີ່ມຂຶ້ນປະມານ 34% ທຽບໃສ່ປີ 2023, ລື່ນຄາດໝາຍທີ່ສອງຝ່າຍ ໄດ້ກຳນົດໄວ້, ການລົງທຶນຂອງຫວຽດນາມ ຢູ່ລາວ ບັນລຸໄດ້ໝາກຜົນຢ່າງຕັ້ງໜ້າ, ໂຄງການຂະໜາດໃຫຍ່ຈໍານວນໜຶ່ງໃນຂົງເຂດພະລັງງານ ເປັນຕົ້ນ ໂຄງການໄຟຟ້າພະລັງງານລົມ ເຈື່ອງເຊີນ, ໂຄງການພະລັງງານລົມສະຫວັນ 1 ໄດ້ຮັບການຊຸກຍູ້ຈັດຕັ້ງຜັນຂະຫຍາຍເປັນຢ່າງດີ, ເຮັດໃຫ້ມູນຄ່າທຶນຈົດທະບຽນການລົງທຶນ ຂອງວິສາຫະກິດຫວຽດນາມ ເຂົ້າ ມາລາວ ໃນປີ 2024 ບັນລຸ 191,1 ລ້ານໂດລາສະຫະລັດ, ເພີ່ມຂຶ້ນ 61,1% ທຽບໃສ່ປີ 2023. ພ້ອມນີ້, ລັດຖະບານຫວຽດນາມ ໄດ້ສືບຕໍ່ຊ່ວຍທຶນກໍ່ສ້າງ ພະນັກງານ ແລະ ນັກຮຽນ, ນັກສຶກສາລາວ ໄປຮຽນຢູ່ຫວຽດນາມ, ສະເພາະປີ 2025 ນີ້ ແມ່ນ 1.160 ທຶນ. ຜົນສໍາເລັດ ຂອງກອງປະຊຸມໃນຄັ້ງນີ້, ເປັນການປະກອບສ່ວນສຳຄັນ ໃນການເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ ລາວ-ຫວຽດນາມ ໃຫ້ຂະຫຍາຍຕົວຢ່າງບໍ່ຢຸດຢັ້ງ. ໃນໂອກາດດຽວກັນ, ນາຍົກລັດຖະມົນຕີຂອງ ລາວ-ຫວຽດນາມ ຍັງ ໄດ້ເປັນສັກຂີພິຍານ ໃນການລົງນາມບົດບັນທຶກກອງປະຊຸມ ຄັ້ງທີ 47, ຂໍ້ຕົກລົງວ່າດ້ວຍແຜນການຮ່ວມມື ປະຈຳປີ 2025 ຂອງສອງຄະນະກໍາມະການຮ່ວມມື ລາວ-ຫວຽດນາມ ແລະ ບັນດາເອກະສານຮ່ວມມື ລະຫວ່າງສອງຝ່າຍ ອີກຈໍານວນໜຶ່ງ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ
ກ່ຽວກັບ mps
